YEREMIA 12:1 - Biblía Axweesantá Hhohho' ar Mungú 2004

¹ Aá AAKOÓ MUNGÚ, kuúng an ganá' aníng tam ui qununu/a. Aníng yaahasarka a koóm diroge. Ahaá múk tlákw baré gadiyeduuín i ya/aa/á'? Ahaá baré múk al/aymuuse aa diihhe'eés?

YEREMIA 12:1 Iomraidhean Croise

IIMU/UUNGW 18:25

Aasla'áy, adoosíng ma tleehhaar, heé hota ganaá' nee tlakusmo kiwa alqwaares. Heé hota ganaá' tawa adór heé tlakusmo, Aasla'áy, sakwasleemusmoó yaamu sleémeero gan'amu gu tleehhikáhe?»

ESRA 9:15

Aá AAKOÓ MUNGÚ, Munguú Israeli, kuúng an gan'amuú koón, atén tina meetís, tari kotsqotaán adoorí tay diriaan. Ga/aaweek, atén a dír geeraawók i diriiaán, atén awa tlakuuse, asma heé hariím sihhtanór dír geeraawoge i kaahh as tlakweemaaká'.»

NEHEMIA 9:33

Tam adoorihe kuúng gan'amu u koón baraá muruuwí sleémeero atén taa slayi, asma kuúng tu inkihhím, atén a tlakuuse.

YOBU 12:6

Hotaá malguuse i wayduú koná', múk Mungú buhhtimís i hoot ar saxareema, Munguúín an /uuruuín.

YOBU 13:3

Ala aníng geera a slaá' nee Munguú /uuruú koóm tawa axweesaan, a slaá' tiwa dír geeraawós wá aleekalaa/.

YOBU 24:12

Baraá ayko /ifór múk slahhaá' tiqtiro a axamiisaán, nee múk slahhaá' inkahhi'iiwo i alee/isoó firiirín, ay nee hamí Mungú /aa/aá mukwí gi axamiisiiká.

YOBU 24:23

Inós gina amohhooárí haniís nari ak diihhe'eesiyá'. Ala inós lohduuín gi ga/áy.

YOBU 8:17

Dee/áruuwós tin baraá tsirxadaá tlaa/ér marmaar, iri baraá guruú tlaa/árí dah.

WARA'AMI 116:5

AAKOÓ MUNGÚ i haats gurhhooaro nee gana'amuwo, Munguúrén i gurtleemuú kón.

WARA'AMI 119:137

AAKOÓ MUNGÚ, kuúng a ganá', sakwasleemarók i ganá' sleeme.

WARA'AMI 119:75

AAKOÓ MUNGÚ, aníng a xuú' kuúng sakwasleema an tléhh ar loohír ganaa', nee bir múx gár is mux i deer.

WARA'AMI 145:17

AAKOÓ MUNGÚ i gan'amaayér kón baraá lohuwós sleémeero, nee ku hhoó' baraá umuúqo gár i /imiisi.

WARA'AMI 37:1

Kuúng ma daawimitaar as kudá' tlakweemaá tlehhiitá', tam mi waatlakwemisaar kudá' muruú tlákw tlehhiitá'.

WARA'AMI 37:35

Heé tlaákw una ár adór ir ló'wa xaraasli. Tina tsaafiís adór haleemaá xaa'aá miereési ar gawaá tloomár Lebanoni.

WARA'AMI 51:4

Án kuúng una tlakweemáy tleéhh, kuúngú kilá', nee muruú slasl/arén una tleéhh dír geeraá ilaawoge, gawaá adoorihe kuúng tu tsaahhi adór tar dakuúsár koondaaká bar axwés, nee kwasleema bar tléhh i hariín.

WARA'AMI 51:6

Qaytsiít, kuúng tu sla'atimis nee looeemaá baraá muuná, kuúng aníng intsaahhatisáng sagalooaroge.

WARA'AMI 92:7

Tam múk hota ganaa'aaká ni harma/i adór gitsór wa ale, nee kudá' sleémeero muruú tlákw tlehhiitá' birna slu/ubibiné', ala ki qwaarees ay alhhe'eesay wasle.

AXWEESANOÓ SAGALOOA 1:32

Asma muu bira sií' baraá iimibo/ár wa alé an gár gi tsuu/, nee daktana bar daktu'uumar'ín ngaa algeemayé' gi hhaamís.

DAHARUSMO 8:14

Garka wák baraá daanduú yaamuwo aga ár ar tawór huwisha, sakwasleemár múk tlákw wá hariim múk hota ganaá' gun sleér, nee qeemuú múk hota ganaá' wa hariím múk tlákw gun sláy. Án a kah tí sleeme a tawór huwisha.

ISAYA 41:21

AAKOÓ MUNGÚ, waawutmoó Yakobo i kaahi, «Kuungá' munguaá xoordu, sakwasleemarhúng huwaare', axweesantahúng tidá' ta koonda ooár awaare',

ISAYA 48:8

Kuungá' kaangwí ugwa axasi'iiká, sleeme ugwa xui'iiká. Iimír iimu/uungo iaahúng i xaaxay'aaká, asma aníng a xuú' adór kuungá' tara naagisé' al/aymaaro, nee iimír xwaylarhunge tunduna báy, dee/anuuse.

YEREMIA 11:20

Ala aá AAKOÓ MUNGÚ Aleesleemusmo, kudá' sakwasleema ga adór ganaá'ár tleéhh. Kuúng munér muu nee fuqureeri'ine in tsee/aariín. Aníng masók an ár adór kuúng li/aywí ugwa bú', asma aníng umuú gaaro ngaa gawaá dabaawógií qaás.

YEREMIA 12:6

Asma tam hhaeewók, múk doohúnguú kilá', kuúng una geewaqaát. Inooín kuúng un iigahhamitiyá'. Kuúng inooín mi haratlintatiaar tam i axweesanoó tsuúár axweesiia.»

YEREMIA 3:20

Ala daanduú tihe, kuungá' xoorór Israeli ana inkihhimu waslesé' dir'eene, adór harér inkihhimu wasl i tlehhaahhit dír hhawaatuuwose. Anuú AAKOÓ MUNGÚ tí ngina oó'

YEREMIA 3:7

Aníng ngi xuu' tí sleémeero tleehharo birnga hhe'eesiyé' ni amor'eé' ki/iyá'. Ala naa baloó amor'eénií ki/i'iiká. Nee hhaeeín awa Yuda sleémeero ngaa ariyé'.

YEREMIA 32:16

Alaá gooidá' taa gooín haniisaro ngiwa hhe'eés dír Baruku, garmoó Neria, gooidá' taa gooín as qaymo tawa te'eé'. AAKOÓ MUNGÚ una firiím, niri oó',

YEREMIA 5:11

Asma múk Israeli nee oo Yuda naa ló'wa inkihhimu wasleesiyé' dir'eene. Anuú AAKOÓ MUNGÚ tí ngina oó'.

YEREMIA 9:2

Masók dír hotaaeé' baraá xaanxaywo i deer tidá' aauuse i qaqatatiin. As muk'eé' nguwa geexaw nari diya/aát, asma inooín sleémeero an fuquuse, nee múk nee /aytuuse dinku'uumisá'.»

WA/AA/I 1:18

«AAKOÓ MUNGÚ i baraá gan'amu, asma aníng axweesantós ana aáhh. Ala kuungaá muu sleémeero iia qaasaak, nee slahh'amuueé' ga/aawaak, dasuueé' nee daaqay'eene kira tláy baraá loohaay.

ESEKIELI 18:25

«Ala kuungá' a kata', ‹Gár Aakoó Mungú i tlehhiiti i qoondaaká.› Kuungaá múk Israeli, iia qaasaak daxta. Xáy, gár aníng ni tleehhiít iqo tsuwa qoondaakáhe? Gár kuungá' ta tlehhita' an tidá' qoomaaká.

DANIELI 9:14

Gawaá adoorihe, AAKOÓ MUNGÚ, kuúng tiri amohhe'és atén tiwa mux, nee adoorí kari tléhh. Asma kuúng AAKOÓ MUNGÚ, a ganá' baraá umuúqo gár ta tlehhita. Nee atén axweesantók aga iilooeesaniiká.

DANIELI 9:7

Aá Aáko, diroge gan'amu i deer, ala atén umuú deeloro mure taa fák. Kaangwí sleémeero a ló' dír ateéká' Yudeár hootá' nee yaamuloouusér Yerusalemuro, nee múk Israeli sleémeero kudá' taa diyá/ baraá yaamaá saawá' nee awa tsewene, asma inkihhimu nguwa dakuusiyé' diroge.

HOSEA 6:7

Ala inooín alqado ngaa mayé', adoodá' naa tleehhiyé' amór yaamuudá' ta bay Adam wa alé, slám inooín naa iia wasleesiyé' dir'eene.

HABAKUKI 1:4

Gawaá adoorihe dabe kaa waaslaá', nee sakwasleemár ganaa' i káhh, asma múk tlákw múk hota ganaá' guna /amaatseék. Gawaá adoorihe tam sakwasleemár ganaa' barka tleéhh, kan isa geeqáy.»

SEFANIA 3:5

Ala AAKOÓ MUNGÚ baraadae in hota ganaa' gár tlaakw ga baloó tleehhiiká, Umuú matlaatlér xawa sakwasleemarós tidá' ganaa' gan geehhooatimis. Umuú looár tlawa aa baloó munesi'iiká, ala tam adoorihe múk tlákw mure ga xuiiká.

MALAKI 2:17

AAKOÓ MUNGÚ ugwa slaaqatisé' ar /aymi'iihúng. Ala kuungá' a kata', «/Ayma'aá kura slaaqatiisaán a gaalá?» Asma tawa kata', «Umuúqo heé tlakweemaá tlehhiít ku hhoó' dír ilaá AAKOÓ MUNGUHE. Inós múk adór kwí gun sa qwalalaa/,» laqaá tawa kata', «Munguúdá' sakwasleemár ganaa' ga tleéhh i amá?»

MALAKI 3:15

Adór atén kar tsatsahhaamana múk sagegawdén an ak múk amohhoó', nee múk slasla/aruú tlehhiít, an múk gár slasláw. Nee kudá' Mungú ngu iiara'ará', an múk aa /uy.› »

DABE 32:4

Inós a tlaa/a, gadiyeérós gár kawa /aár i káhh lohduuwós sleémeero i ganaaiyá'. Inós a Munguú inkihhím nee ku dakuús wásl, inós ku hhoó' nee i ganaa'.