Matayo 5:37 - Biblía Axweesantá Hhohho' ar Mungú 2004

³⁷ Ala axweesantahúng masók a ‹Ka hhoo',› laqaá ‹Aasla'áy›. Asma ar dír tihe aa harwaarahh, amór i dahh a amór kudá' tlaákw.»

Ya/abtór hho' 1977

³⁷ Ala axweesantahúng masók a ‘Ka hhoo',’ laqaá ‘Aasla'áy’. Axweesantá dír tihe aa waarahh, a tidá' amór Kudá' tlaákw daahh.”

Matayo 5:37 Iomraidhean Croise

Matayo 13:19

Umuúqo heewo oo axweesantá waawuti'iima gaa axaas, nee gídaabárós birnga tsaahhiiká, kudá' tlaákw nin hardah, nee /aymuudá' taa baraá muunuú heéwi dahaás guri hingees. Kwí an kudá' aa paahh afaá loohi.

Matayo 13:38

Qaymoodá' a yaamu. Dahaasingwdá' hhó' a mukdá' baraá waawuti'iimár Mungú i dirií'. Nee sla/atadár baraá qaymo a múk kudá' tlaákw.

Matayo 15:19

Asma baraá muunuú heewo gár ti'imiit a inslawoó tlákw, nee tsu/uta, nee fuqi, nee tsaatu'uuma, nee fiiso, nee lamabu'úngw lama, nee /ooslisliingw.

Matayo 5:36

Laqaá lo'o ma huwaar ar sagók, asma tam se'eemír wák kawa /awaakes laqaá kawa boo/es a aleesleeraaká.

Matayo 6:13

Atén miti baraá iiara'aduú uhisar, ala atén ti ba/amis kudá' tlaakwe. [ Asma waawuti'iima a tók, nee aleesleemu, nee xirif, ay alhhe'eesay wasle. Amin.]›

Yohana 17:15

Aníng a fiririimaaká as inooín kiwa hinges baraaká' yaamuwo, ala kiwa xuun dír kudá' tlaakwe.

Yohana 8:44

Kuungá' amór ta dahha' a amór baabuúhúng, Neetlaangw, nee ilatleerír baabuúhúng an tidá' ta sla'a' tlehhmuuwo. Inós a tsu/utusmo iimír iimu/uungo, tam aa sihhiitiiká baraá looeemá i alé, asma looeema baraawose i kahhiyá'. Bir lamtá axwees, a tós kilós gan axwees, asma inós a lamusmo nee a baabuú lama.

Efeso 4:25

Gawaá adoorihe, lama mawaak. Kuungá' looeema kilooín na axweesaak baraá tla/angwhunge. Asma atén sleémeero a diqoó slaqwtá wák, tidár Kristo.

Efeso 6:16

Nee gaambór ta koonda' umuúqo qoomaaro masók a haratlintaao, nee gaamboósinge daqaní kuungá' maheeridá' asltá koomá' sleémeero awa kudá' tlaákw, i aleesleerá' baqto.

Kolosai 3:9

Kuungá' kiloohúng miti lamtí tlaaqara'. Asma kuungá' munerhúng tidá' ar aáng aga warqesé', dinkwa nee tlehhemi'iiwós kudá' tlakwe.

Kolosai 4:6

Axweesanayhúng umuúqo daqto masók a axweesanoó tsatsaa'arén, nee oo gídaabár koóm, as umuúqo heewo oo gár yaahamiís, gaarós tidá' i yaahamiisi ngiwa tsaahhi ar hariima.

2 Tesalonike 3:3

Ala Aako i inkihhimuú kón. Kuungá' inós nu /uurií haniis, nee nu de'en dír kudá' tlaakwe.

Yakobo 5:12

Alaá tí sleémeerowo, hhaee'eé', kuungá' lo'o ma huwahuwaara'. Miti lu'umisaara' ar doori, laqaá ar yaamu, laqaá miti lu'umisaara' ar umuúqo gaaro. «Ka hhoo'» bara oé', masók an «Ka hhoo',» nee «Aasla'áy» bara oé', masók an «Aasla'áy,» as sakwasleemár Mungú kuungá' munduwa sleér.

1 Yohana 2:13

Kuungá' ín baabá kaangwí nguna dirhúngií gooiím, asma kudá' daadáw iimír iimu/uungo ugwa xué'. Kuungá' masoómba, kaangwí nguna dirhúngií gooiím asma kudá' tlaákw ugwa ar ba/é'.

1 Yohana 3:12

Atén mawa adór Kaini tleehhitaán. Inós bartá kudá' tlaákw gana áy, hhiyaawós guri gaás. Kaini hhiyaawós gár ngusa gaás a milá? Gár ngusa gaás a tlehhemi'iiwós kin tlakw, ala awa hhiyaawós in ganaaiyá'.

1 Yohana 5:18

Atén a xuaán adór heé taa laqwaál nee Mungú ir tlakweemaá tlehhiitiiká, ala inós ku harmagagaahh nee Garmoó Mungú, tam kudá' tlaákw gu kwatiitiiká.