Luka 1:17 - Biblía Axweesantá Hhohho' ar Mungú 2004

¹⁷ Inós in geeraá Aakoó wa hi'iit ar muunuú adór kuduú Eliya nee /uuruuwós, as munér baabi'i ngiwa warqeesi iwa amór na/ií ki/, nee mukdá' iiawaslén nguwa fuqurángw hotaá ganaa'á' i slay, as múk Aako nguwa geerií amohhe'eesi.»

Ya/abtór hho' 1977

¹⁷ Inós in geeraawós wa hi'iit ar muunuú adór kuduú Eliya nee /uuruuwós, as munér baabi'i ngiwa warqeesi iwa amór na/'ií ki/, nee mukdá' aa dakuus kuwa fuqurángw i haniisi, fuqurangwduú múk gan'amu, as múk Aako nguwa geerí amohhe'eesi.”

Luka 1:17 Iomraidhean Croise

1 WAAWITÁ 17:1

Aarusmooko ta bay Eliya oo Tishbe oo yaamaá Gileadi, waawutmo Ahabu guri báy, «Ar umuú AAKOÓ MUNGÚ, Munguú múk Israeli kudá' slaáf, kudá' aníng ni sagadiyuus, tluwaay i baloó taxaatiiká, laqaá hara' u aandaaká ay dír aníng kaangw gway oo'.»

1 WAAWITÁ 18:18

Eliya guri báy, «Múk Israeli heé gwa slahh'amuúr ay a aningeeká, an kuúng nee múk doó baabuúwók, asma kuungá' hara'ayár AAKOÓ MUNGÚ ana sié' nee slaqsi'iidaá munguaá ta bay Ba'ali kiri sluufmisé'.

1 WAAWITÁ 21:20

Ahabu Eliya nguwa ár iri oó', «Aá wakusmooeé', iga harati'íti?» Eliya iri oó', «Án kuúng gár usa harati'iít asma kuúng tina kilók weerís baraá tlakweema dír geeraá AAKOÓ MUNGUHE.

2 WAAWITÁ 1:16

Eliya waawutmo guri báy, «AAKOÓ MUNGÚ i kaahi, ‹Gár muu kusa ya/áp amór Ba'alsebubu, munguú gixsár Ekroni, a Mungú in káhhi baraá yaamaá Israeliro, kuúng a awedká gawaá qatanisinge, looeemaawo kuúng a gwá'.› »

1 QOM'I 29:18

AAKOÓ MUNGÚ, Munguú baabi'iirén, Abrahamu nee Isaka nee Yakobo, adoorí mukók aa tleéhh tsuuqeek, nee munér inkihhimuú koom i kumaamit, nee munér mukók amoorók xu'usek.

2 QOM'I 29:36

Waawutmo Hesekia nee muu sleémeero tari ló'wa qwalaá/ asma adoodá' Mungú aa tleéhh, asma adoorí ina gaanslár tleehharút.

WARA'AMI 10:17

AAKOÓ MUNGÚ, /aa/aá heé tsá' iga axás, kuri iiárií qás, kuri gurkwa/ás.

WARA'AMI 111:10

Ilaiwa/amér AAKOÓ MUNGÚ an iimu/úngw sagalooa. Múk adoorí ga /iimiís sager'ín i gwa/át. Xirfuuwós in kumamiit kureerisleém.

WARA'AMI 78:8

Eeít, matawa adór baabi'ii'ín tleehhiít, qartá sagegawden nee ar aa dee/aanut, qartá baraá muner'ine Mungú gu gaárí xuaaká, ta inkihhimuú konká amór Munguhe.

ISAYA 29:24

Mukdá' baraá hotaá qeeruuwo aa dakuus tsaahha gari ya/án, tam mukdá' qununu/umamiít intsaahhatisa gari ya/án.»

AMOS 4:12

«Gawaá adoorihe, aá múk Israeli kuungá' nu muúx. As adoorí ni dirhúngí tleehha, gimsé' ti amohhe'ese' sakwasleemar'eé' tihe.»

Matayo 11:14

Ala kuungá' bar sla'á' haratlintaaooro, inós an Eliadá' hardáh.

Matayo 14:4

Asma Yohane Herode guna báy, «A hariímarooká kuúng harér hhiyaawók kawa dux.»

Matayo 3:3

Asma Yohanewí an kudá' kangós taa axweés nee aarusmo Isaya iwa kaahi, «Afór hee iiárií qaasaak ar tseeamiim baraá darmuú wa ale, ar kah, ‹Loohír Aako amohhe'eesaak, nee waarahhmawós gan'aasaak.› »

Matayo 3:4

Yohane tlawuú aa tsiít kuna tleéhh ar se'éngw angamía, nee afetloowós a himuú kaahari, nee muruú /aymaarós a ingigi nee danuú darma.

Luka 1:16

Múk yaariír oo Israeli gu amór Aakoó Munguúíní ki/is.

Luka 1:76

Nee ná/aay, kuúng sleeme tu bay aarusmoó Kudá' Gáwtí dirií', asma geeraá Aako in hát, as luhuuwós kiwa amohhe'es,

Yohana 1:13

Kudá' taa laqwaliiká adór na/iír ale, laqaá ar sla'aarír slaqwa, laqaá ar sla'aarír hee, ala ar sla'aarír Mungú.

Yohana 1:34

Nee tí aníng aga ár, slám aga lamabu'uúm adór kwí tar Garmoó Mungú.»

Yohana 3:28

Kuungá' kilá' aníng ina lamabu'uundé' niwa oó', ‹Aníng a Kristowooká, ala án tina ya/aáw geeraawós wa ale.›

Tlehhema'aá ya/Abuuse 10:33

Nee hamtidár kilae án muu nguri ya/aáw ay amoorók. Nee kuúng adór hhoo' aga tléhh niwa hardát. Ala hám daxta atén sleémeero a dír geeraá Mungú i diriiaán, as tidá' sleémeero ar Aako naa kuúng i hara'ayín kawa axaasaan.»

Rumi 9:23

Adoorí gana tleéhh as xooslaadá' gurtleemuú slaw ngiwa xirfuuwós oo yaariír i geehhooeesi. Kuká' an kudá' aa amohhe'eés as xirif kuwa slay.

Kolosai 1:12

Daqaní kuungá' Baabá kuri sluufmisá' ar qwal/amaaye, kudá' naa aleesleemuú i haniis oo tawa al dinku'uumisa' nee múk hhohhó' oo Mungú baraá aalír waawuti'iimár gwa/aateemaawo.

2 Timoteo 2:21

Ala hee bir taa hhoohhooeés nee tiri paraatl dír muruuwí tlákw naa alki/iít, inós daqaní a xooslmoó taa qaás as gadiyér xirfuú koom, kudá' taa hhoohhooeés, oo Aakoó do'dá' wa hariím, nee slám a kudá' hariím baraá umuúqo gadiyér hhooe.

1 Petro 2:9

Ala kuungá' a xoorór taa tsawaár, kaahamuusér waawuti'iimár Mungú, xoorór hhoohhoo', xooroodá' Mungú aa tós tleéhh, as kuungá' tlehhemi'iiwós kudá' xirfayen kiwa alki/ita', kudá' inós aa tleéhh. Inós kuungá' nuna ateét baraá giwtír wa ale, nuri dahaás baraá gwa/aateemaawós kudá' waa/oo/amór koomá'.

1 Yohana 2:28

Kuungá' laqwalór ninakw, baraawós wa hootaak, as qoomár Kristo birna hardáh, burkwa geehhooeés, atén mitiwa mureekeés dír geeraawós wa ale.

Geehhoeemaá 20:4

Aluudae kiteeraá aleesleemu ngiri ár, nee muu gaa i iwiít. Mukwí kwaa aleesleemuú i haniís oo sakwasleema kawa tleehhi. Nee slám qeereemo ngiri ár awa mukdá' taa sagetlaáq as Yesu kuwa lamabu'ún nee as axweesantá Mungú. Mukwí an kudá' makiito'oodá' gaa i tumbarara'atiiká, nee murslaaqatuuwós kudae, nee slám layaadá' kaa ya/anká gawaá gitsee/er'ine, laqaá tam baraá daber'ine. Mukwí iri slafíngwií kií/, tari waawuti'ii'ín dinkwa nee Kristo kureeri kumuú wák.

1 SAMUELI 7:5

Samueli iri oó', «Múk Israeli sleémeero burumburaak Mispa, daqaní aníng nu alefiriím dír AAKOÓ MUNGÚ.»