ISAYA 9:17 - Biblía Axweesantá Hhohho' ar Mungú 2004

¹⁷ Gawaá adoorihe, Aako masoombar'ín ga gurtlayká, sleeme i gurtleemuú konká dír panaay nee kwaeeliiwo. Asma heé Munguú ilaiwawaá/ i kaahh, umuú heewo a lamusmo. Tam adoorihe muneerós gaa gu/iiká, tam hamí dakós i loloqoosárí kaahh.

ISAYA 9:17 Iomraidhean Croise

YOBU 15:34

Kudá' sleémeero Mungú ngu da'ayuumita'aaká, na/ii ngi slay'aaká. Asla maraá múk slukmadaá /aa/aáy gi qororo'ós.

WARA'AMI 109:12

Heé gu gurtláw masók i kaahh, laqaá tam oo na/iiwós kudá' panaay gi amohhe'eemiís i qwaari.

WARA'AMI 147:10

Ku qwal/amiisiiká nee /uuruú faras, laqaá /uuruú miguuse gu sa qwalaala/iiká.

ISAYA 1:4

Tsaxwaahúng kuugaásíng xoorór iringuuse. Kuungá' a múk taa al'ilooúy nee tlakweema, xwaylár tlakweemaá tlehhaahhiit, na/aá al/aymárár hotaatimá'. Kuungá' AAKOÓ MUNGÚ ugwa geexeeré', kudá' Hhoohhoó' oo Israeli ugwa waaqaé', taa falo kwahhé', tari alií ki/é'.

ISAYA 10:2

Gan'amuú múk aleemaá koóm kun /itiitín, nee muruú narkuute kun fisiisín kuduú gan'amuuín, kwaeeli a adór maraando dir'ine, panaay a sluqor'ín.

ISAYA 10:4

Gár ti meta' aqo an kulala'amitá' tla/ángw múk taa tseegi, laqaá an pahhá' baraá tla/ángw múk ta baraá slaqwarár wa tsu/i. Tam adoorihe, AAKOÓ MUNGÚ muneerós gaa gu/iiká, tam hamí dakós i loloqoosárí kaahh.

ISAYA 10:6

Una ya/aáw xoorór tlaakw ngiwa muxi, una ádbáw mukdá' naa i buúhh nguwa muxi nee ngiwa haasaáng wa ar tlay, ngiwa yaamií kalaa/i adór hhapér baraá loohi.»

ISAYA 13:18

Masoombár daaqaay kan tsuu/ ar ga/alduín, inooín i baloó gurtleemuú kon'aaká daanduú xwaylár heewo, tam na/aá ninakw ngi baloó gurtlatlay'aaká.

ISAYA 14:20

Kuúng tu alfooliiká dinkwa nee inooín, asma kuúng yaamuuwók ina gás, mukók kuri tsú/. «Xwaylár múk tlákw alók in hhaán geeraawo.

ISAYA 24:5

Yaamu kaa meetagaás nee mukdá' gi hoót, asma hara'ayár Mungú ngina hhitiné', nee kaahirós ngina si'iyé', nee alqadoodár alhhe'eesay wasl ngiri si'iyé'.

ISAYA 27:11

Haleemaá xaai nina kahiyé' niri qeqtiné', /ameena nin hardát giri sleemís giri ásltár oohamís. Asma mukwí gár aa tsaáhh i káhh, gawaá adoorihe, tleehharusmooín gi sangw gurtlayká, kudá' inooín gaa tleehh gi sangw i gurtlayká.

ISAYA 3:8

Asma múk Yerusalemu taa dukuúts, nee oo Yuda aa huú', asma AAKOÓ MUNGÚ nguna si'iyé', ar tlehhmi'ii'ín nee axweesanay'ín, xirfuuwós ngwaa gaárií xui'iiká baraá tla/angw'ine.

ISAYA 31:2

Tam adoorihe Mungú ku sagaloó', i slahh'amuú huwahuuw, Inós axweesantós ga warqeesiiká, Ala in sihhiit iwa slaqwi nee maraá múk tlákw nee in slaaqw nee mukdá' múk tlakweemaá tlehhahhiít gu alee/iimamiís.

ISAYA 31:3

Múk Misri a muu, inooín a Munguheeká, nee farsuuín a makaay, slám a qeeruwoká. Qoomár AAKOÓ MUNGÚ dakós burngwa tleés xooroodá' ale/isoó hanmamiis kan gee/aasl nee tidá' ta alee/iimisi in hú', xoorduuká tsaraawo niri hhaná'.

ISAYA 33:11

Muruuhúng sleémeero oo taa qoomaamesé' a adór muundáy, nee gár ta sleera baraá muruuhúng kwisinge a slaapú, hiinsluuhúng an asltá kuungá' nu /aay.

ISAYA 33:12

Xoordu kin daa/ adór múk busluú /awák gu tlehhiít tari adór laqayaá ta tsaát kiri qaás baraá asla.

ISAYA 40:30

Tam masoomba in nusqumít iri slaaqamít, tam masoombár daaqaay in huuhu'uún.

ISAYA 5:24

Gawaá adoorihe, adoodá' tsángw asla hhaanslaá kaaharen ngir /aa/ayi, nee adór gitsór kaaharen ir slururuumaamit, dee/áruuín in slupuut, nee /ayor'ín ka gáwtí ufaahh adór teeri. Asma dabér AAKOÓ MUNGÚ Aleesleemusmo ngaa si'iyé', nee axweesantá Kudá' Hhoohhoó' oo Israeli ngaa waaqaaiyé'.

ISAYA 5:25

Gawaá adoorihe, AAKOÓ MUNGÚ mukós gwaa i daa/atúy buhhtaawo. Inós gaa dákwí tleés as ngiwa muxi, tam tlom'i niri daaraaxiyé', tu'uuín baraá loohdaá tla/ángw gixsaro a adór xwaansláy. Tam adoorihe muneerós gaa gu/iiká, in kumiit muxtaaro.

ISAYA 62:5

Asma adoodá' masoomo dasír /amaatliito'o ngir duxaxiti, an adór mukók yaamuuwók ngir aali, adór hhawaata dasiidá' aa duúx ngir saqwalaala/i, an adór MUNGÚ kiíng ir saqwalaala/i.

ISAYA 65:19

Aníng Yerusalemu an saqwalalaá/, nee muk'eé' un sabaraá/. Baraadae afór tsuunqumis ka baloó axasiiká, nee /aa/aá slahh'amaaye i baloó ki/iaaká.

ISAYA 9:12

Bihhaá da/aawe a múk Aramu, bihhaá /uwaawo a múk Filisti, afer'ín sleémeero ngaa awaatliyé' as Israeli ngiwa gu/iya'. Tam adoorihe muneerós aa baráy ki/ká, tam hamí dakós i loloqoosárí kaahh.

ISAYA 9:21

Manase i Efraimu i slaaqw, Efraimu i Manase i slaaqw. Inooín tsaraawo ta Yuda i slaaqw. Tam adoorihe AAKOÓ MUNGÚ muneerós gaa gu/iiká. Tam hamí dakós i loloqoosárí kaahh.

YEREMIA 18:21

Gawaá adoorihe, hám daxta na/ii'ín maweek ki tsu/i nee qwari, inooín ki tsu/i ar paánga baraá slaqwaraaro, nee /ameenar'ín i kampeerut, nee i kwaali'iimit. Maweek hhawaate ki tsu/i nee tiqtír pu/i, nee masoombar'ín ka iso tlaaqi ar paánga baraá slaqwaraaro.

YEREMIA 5:1

Axáy baraá lohdaá Yerusalemu wa hi'iimitaak, xuuxuaak nee ka gooiindá'. Didá' boo/oó muu i dirii'i iwa xuuxu'uumaak, axáy heé gan'amúr hoót u sleerá'a, nee oo looeemaá leelehhiít. Bura sleeré', daqaní aníng múk Yerusalemu u gurtláw.

ESEKIELI 20:33

«Adoodá' aníng nir hotaatima, anuú Aakoó MUNGÚ lo'o aga /aáy, ana oó', ‹Aníng kuungá' nu sawaawuti'iím ar dakw'eé' oo ló'wa /uuruú koóm ar xarasleema, nee nuri i buúhh.

AMOS 4:10

«Aníng kuungá' nuna pú/tií tleés adór tooaáng naa tleés baraá yaamaá Misri. Aníng masoombarhúng ana tsuú/ baraá slaqwaarár wa ale, farsuuhúng oo slaqwara una ar tláw. Tu'u baraá marayhúng ngiri dalaa/iyé', tsuts'ir'ín baraá duungerhúng gay hatsís. Tam adoorihe kuungá' naa amor'eéní ki/i'iiká. Anuú AAKOÓ MUNGÚ tí ngina oó'.

AMOS 8:13

«Baalaadae masoombár slaqo hho' ar daaqaay nee dasuwo tari /araarán as waxe.

MIKA 7:2

Heé inkihhím i kaahh baraá ayaawihe, Heé gan'amuú tlehhiít i kaahh. Umuúqo heewo gár i leelehhiiti a hee nguwa gaasi. Umuúqo heewo hhiyaawós gun tsaaxweelír i qamín.

SEKARIA 9:17

Xáy parootirós i hhohhoaaeér, daaqaay nee dasuuwo slaqo ngin tlehhiitiyá' ar balángw yaariír nee difaáír /aben.

Matayo 12:34

Kuungá' xwaylár dayshe, kuungaásingá' tlakw, adór axweesanoó hhó' kur axwesá'? Asma hee gár i axweesi a tidá' muunaáwós iwa hatsi.

Matayo 16:3

Looa binda tleér a kata', ‹Laarí tluwaay i tluuw, asma doori ki daa/aat, slám i huunkoó koná'.› Kuungá' a hhaahhafuuse. Afaá doori tsatsahhaango i aleesleerá', ala layár de'emuuká' tsaahharo mas aleesleera'aaká.