ISAYA 56:7 - Biblía Axweesantá Hhohho' ar Mungú 2004

⁷ Mukwí aníng un huúw gawaá tloomar'eé' tidá' hhoohhoo', aníng inooín ngiri baraá dooeé' kuduú firór wa qwal/atamís. Ilahhooar'ín ar da/a nee ar muruú ta tsu/i kin ya/án dír kitangw'eé' oo ilahhooaro. Asma dooeé' kun babay a doó firo as muu sleémeero.»

ISAYA 56:7 Iomraidhean Croise

1 WAAWITÁ 8:41

«Tam hoomo sleeme oo naa xay amór yaamaá saawá' wa alé, oo heé Israeliwooká as umuuwók,

WARA'AMI 2:6

«Án waawutmooeé' ngwa qaás gawaá Siyoni, tloomar'eé' tidá' hhoohhoo'.»

TI'INAANGW 28:38

Aroni parereehhamtí ngin gawaá gitse/aawósí qaas, nee gawaá parereehhamtihe lo'odu nee tlakweema sleémeero awa xoorór Israeli naa tleehhiyé', qoomár niwa ilahhooár hhohhó' hanmisiya', ngin gagaar, aníng ilahhooadá' ngari ya/aám.

ISAYA 11:9

Baraá tloomár AAKOÓ MUNGÚ tidá' hhoohhooe gár gi slahh'ees i káhh laqaá ar gi hhaamiis, asma yaamu nin hatsiyá' xu'utír AAKOÓ MUNGUHE, adoodár ma'aay tlawi ngira hatsisiyé'.

ISAYA 19:19

Baalaadae kitángw ilahhooa kawa hanmiis dír AAKOÓ MUNGÚ kuri tleehh baraá tla/ángw yaamaá Misri, nee uhmoó taa paraátl as AAKOÓ MUNGÚ kuri siihh baraá digeemaá yaamaá Misri.

ISAYA 19:21

AAKOÓ MUNGÚ tiri xu'utis dír múk Misri. Nee múk Misri AAKOÓ MUNGÚ nguri xuiyá', nguri sluufmiisiyá' ar ilahhooár muruú ta tsu/i, nee ilahhooár da/a/ango, nee al'axweesani ngiri oiná' dír AAKOÓ MUNGÚ, ngiri boo/eesiyá'.

ISAYA 25:6

Gawaá tloomár Siyoniro, AAKOÓ MUNGÚ Aleesleemusmo xoordu sleémeero gin muruú /aymár hhóí qaas, nee difaáír tsuua, nee fu'uunaá wahhaará' ló'wa ale, nee difaáír tsuu' ar ló'wa hhohho'.

ISAYA 56:5

Aníng inooín baraá guruú dooeene nee baraá guruú baquuwo in dír xiríf i haniís. Umuú ló'wa afhhamít oo na/aá daaqaay nee awa dasuuwo gi baa/ un haniís. Aníng in umií haniís oo ta inslaslay kureeri sleem oo ta baloó fitsiiká.

ISAYA 57:13

Qoomár bar /aa/amiindá', gimsé' kár ala munguiihúng awa slaqsi'i kwisiingá' taa burumburiindé' nu tu/iye'. Fur'a gin amór saáw i ufáhh, tam hiinsluú hee gin amór saáw i puruuts. Ala heé naa amor'eé' goow yaamu gi aal, nee tloomar'eé' tidá' hhoohhoo' tari tós.

ISAYA 60:11

Afér gixsaarók kan gweermoórí máy tlatla/aangw nee xweeraawo ka tseegiiká, as xoordu nee waawitaáine, daqaari'iimar'ín ngiwa huwiya' amoorók.

ISAYA 60:7

Daqoroó bee/aangw oo Kedari kungu diróg i burumbuur. Gwaandaawér Nebayoti kari ilahhooár da/tá wa hanís, gwaandaweedá' kari ya/án gawaá kitangw'eé' oo ilahhooaro. Nee dooeé' kudá' xiríf nguri xirfayeés.

ISAYA 61:10

Aníng an ló'wa qwalalaá/ baraá AAKOÓ MUNGÚ wá ale. Muunaáeé' i baraa/ as Munguúeé', asma inós aníng iga uuntsuús ar tlabaá ba/ama, iga hotaá ganaa'ár tsiitiís adór hiyaay. Adoodá' garmoó duxuxuúm tir parootumamisi ar slamángw /ayo, nee adór dasír ta duxuuti tir parootumaamis, ar kwaslaá tlaxo gawden.

ISAYA 65:11

Ala kuungaádá' AAKOÓ MUNGÚ ugwa sie', kudá' tloomar'eé' tidá' hhoohhoo' aga gunqaarese', kudá' muruú /ayma ngwa amohhe'eese' dír Munguúdá' ta bay ‹Gitsee/aá Hhooá'.› nee kudá' slooqomo ngu hatsimiisá' difaáiro as Munguúdá' ta bay ‹Gitsee/aá Tlaakwá'.›

ISAYA 65:25

Tawer nee bee/aangw tari alqáy, direeri gitso ngin adór hikwaá wa /ayiyá' nee dayshe hhape gan /ák muruú /aymár wá ale. Gawaá tloomar'eé' tidá' hhoohhoo' sleémeerowo, makiito'ór ta slahh'eesi laqaá ar ta gaasi i káhh.» AAKOÓ MUNGÚ tí gan kah.

YEREMIA 7:11

Xaysé', do'owí taa umuuér ateét dír ilaahunge aa warqáyi tawa mar'ír fisuuse? Ga/aawaak anuú kilá' ilaeene kangwsíng ugwa ár. Anuú AAKOÓ MUNGÚ tí ngina oó'.

ESEKIELI 20:40

Asma aníng gawaá tloomar'eé' tidá' hhoohhooe, tidá' tleraantleer ar yaamaá Israeli, aníng Aakoó MUNGÚ a kah, Kuungá' sleémeero awa múk Israeli in didá' wa sagadiyusá'. Amoodaádae aníng kuungá' nu ilaaóh, nee nuri daám iwa ilahhooár i huba', nee ilahhooár hhohho' tidá' taa tsawdé'.

ESEKIELI 47:22

Yaamuuká' in qasmisá' as tawa yaamuuhúng. Hoomaadá' baraá tla/angwhúng hoot nee ar aa laqwal baraá yaamuuhúng wa ale, ki yaamuú i qasisá', qoomár bar yaamaá qasmisá'. Mukwí i harín kuwa adór múk Israeli ar qoomeesi, nee i hariná' yaamu ngiwa tsawdoórí tleehhiya' dinkwa nee múk Israeli.

Yoeli 3:17

«Gawaá adoorihe kuungá' múk Israeli kay tsahhá' adór aníng AAKOÓ MUNGÚ tar Munguúhúng, oo baraá Siyonír hoót, tloomar'eé' ar hhoohhoo'. Yerusalemu iri hhoohhouúr, tam dahaayér waaraahh i baloó baraawós i datká.»

SEKARIA 8:3

Aníng a wayaá' Siyoni, án niri hotaá áw tla/ángw gixsár Yerusalemu, nee gixsár Yerusalemu kay bay, ‹Gixsár inkihhím.› nee tloomár AAKOÓ MUNGÚ Aleesleemusmo kari bay, ‹Tloomár hhoohhoo'.›

MALAKI 1:11

Asma iimír amoodá' looa iwa tsiraarihh, tam ay amoodá' i darat, umuueé' ku úr baraá xoorduuwo. Umuúqo mooyángw tsuú' kun da/aa/án nee ilahhooár hhohho' kan hanmiis asma umuueé' ku úr baraá tla/ángw xoorduuwo!

Matayo 21:13

Iri oó', «Kaa gooín, ‹Dooeé' ku bay a doó saaliingw.› Ala hám daxta kuungá' ugwa mar'ír fisuuse tlehhé'.»

Marko 11:17

Giri intsaahhatimís iri oó', «Kaa gooinkáhe, ‹Dooeé' ku bay a doó saaliingw dír xoordu sleémeerowo.› Hám daxta kuungá' ugwa mar'ír fisuuse tlehhé'.»

Luka 19:46

guri báy, «Kaa gooín, ‹Dooeé' a doó saaliingw.› Hám daxta kuungá' ugwa mar'ír fisuuse tlehhé'.»

Rumi 12:1

Gawaá adoorihe hhaee'eé', aníng kuungá' nun harhheehhe'eés as gurtleemuú Mungú, kuungá' slaqoohúng na haniisaak iwa ilahhooár slaáf tleehhitiya', tidá' hhoohhoo' ar Mungú gu qwal/atimis. Gaarí an sluufmisuuhúng kudá' gídaabár koóm.

1 Timoteo 2:8

Gár án ni slaa' hhawaate masók an múk daba' hhohhó' nee oo buhhabuhhaaká nee múk tlaampa'aamisaaká. Ala umuúqo diiro hhawaataá adoorí masók dabaaín ngin gáwtí tleemisiyá' baraá firooro.

Ebrania 12:22

Ala kuungá' tloomár taa i hardaté' a tloomár Siyoni, nee Yerusalemúr gawaá doori gixsár Munguúdá' slaáf, nee amaqawár yaariir ar malayke.

Ebrania 13:15

Gawaá adoorihe atén masók Mungú un ilahhooarén ar muruú ta tsú/í hanmiisaán ar loohír kuwa xirfayeemisaan umuúqo daqto ar loohír Yesu. Gídaabárós a Mungú un xirfayeemisaán ar afeerén.

1 Petro 2:5

Kuungá' kilá' sleeme masók a adór tlaa/aá slafá', tundu tleehhi tawa doó qeeru tleehhita'. Kuungá' masók a kaahamuusér Mungú ar hhohho', nee ilahhooár qeeru ar muruú ta tsu/i kawa huba', tidá' ta ya/an nee Mungú ar loohír Yesu Kristo.