ISAYA 52:1 - Biblía Axweesantá Hhohho' ar Mungú 2004

¹ Tlawáng, tlawáng, kiíng gixsár Siyoni /uuru slaweek, Kiíng Yerusalemu, gixsár hhoohhoo', tlabaawók awa hhohho' dahaaseek. Heé ta hhehhe'eesiiká laqaá oo slasla/aár amoorók ngi kayká.

ISAYA 52:1 Iomraidhean Croise

1 QOM'I 16:29

Umuudá' xiríf oo AAKOÓ MUNGÚ xirfayeemisaak, ilahhooa huwaak, dahé' baraá do'ós, AAKOÓ MUNGÚ sluufmisaak dirós tidá' hhoohhoó' wa ale.

NEHEMIA 11:1

Naagáy geeraharuuse baraá gixsár Yerusalemu ngina hootiyé'. Muu sleémeero oo hatlá' tsawdo kana tleéhh baraá umuúqo múk mibaango heé wák kuwa slay oo baraá gixsadá' hhoohhoo' ar Yerusalemu ga hoót. Mukduú hatlá' gwaleél ina meét baraá gixsaduuín.

WARA'AMI 110:3

Mukók ni fi'iit bál bar nee wakuuseerók taa eeré', masoombarók ni hardát gawaá tloomadá' hhoohhoo', adór har'uú matlaatle.

TI'INAANGW 28:2

Kuúng daqaní hhiyaawók Aroni ku tlabaá hhohhó' i tléhh, kahhó' bar ku ga/áy tawa heé xiríf nee oo hhoohhoó'.

TI'INAANGW 28:40

«Daaqoó Aroni ku hiya'aá ququmadií tléhh nee him'ér afeetle nee kofiyadu, masók birki ga/áy ki xirfayen nee ki hhohho'.

ISAYA 1:21

Gixsarí inkihhimuú koom, adór ira tsaatuso'o tleehhít! Inósadá' sakwasleemár ganaa'a haats, inósadá' hotaá ganaa'á' gira hot, ala hamí aa tsu/utuso'o tleehhít.

ISAYA 1:26

Aníng har'ohuuseerók a /abeemáy ki/ís, adoodár bál qaro, nee hara'ayuuseerók a /abeemáy ki/ís, adoodár bál geera. Aluuwo kiíng tiri bay, ‹Gixsár hota ganaa', gixsár inkihhím.› »

ISAYA 26:2

Afér gixsa gweeraak, as xoorór hota ganaa' iwa dat tidá' inkihhmúr hotatiim.

ISAYA 35:8

Loohír ur baraadae i deer, inós ka bay «Loohír hhoohhoo'.» Múk daba' tlákw loohidá' ga kala/iiká, ala aqo har múk Mungú kilooín. Inooín tam ki iimi bo/e ala i qwaariiaaká baraá loohidae.

ISAYA 4:3

Slám panaydá' aa Siyónírí meet nee kudá' taa geexáy baraá Yerusalemu, kin bay, «Múk hhohhó' oo Mungú.» Kuká' an kudá' taa gooín baraá kitaábuuwós tawa múk baraá Yerusalemúr wa hoót.

ISAYA 48:2

Kuungaádá' ti ateetimá' ar umuú gixsár hhoohhoo', handá' a kata', Munguú Israeli un harahhifaán, umuuwós an AAKOÓ MUNGÚ Aleesleemusmo.

ISAYA 49:18

Axáy bihhe i qaytaak nee ka aandá' gár tleehharumiit. Inooín sleémeero taa burumburiyé' i baraawók i watliyá'. Anuú AAKOÓ MUNGÚ a kah, adoodá' aníng nir hotaatima, mukók sleémeero un adór kwasluú wa dahás, mukók u saqwalaalá/ adór dasír duuxór aw kwasluwós ngir saqwal/aa/at.

ISAYA 51:17

Tlawáng aá Yerusalemu, sihhtanooro gaalalaa'aát, AAKOÓ MUNGÚ iga wahaás ar slooqomoó buhhtaawós, kiíng un tsaanqás wahto tari ta/amít.

ISAYA 51:9

Tlawáng, tlawáng aá AAKOÓ MUNGÚ, ar /uuruuwoge ti ba/amis. Daarikiitáng adoodá' aáng taa tléhh qoomár qartadá' aa waarahhi. Ahaá a kuungeekáhe oo Rahabu gaa tlaqaqaat nee kudá' dayshamoodá' úr oo baraá ma'aay gwaa tla/a feehhamiis?

ISAYA 60:1

Tlawáng, gwa/aát, asma gwa/aateemaawók naa hardihiyé', nee xirfuú AAKOÓ MUNGÚ ugwa i gwa/aát.

ISAYA 60:21

Muu sleémeero tari múk hota ganaá'. Inooín yaamu kin aal ay alhhe'eesay wasle. Inooín an harma/itaeé' ar dabaaene naa dahaás. As kahhó' aníng ti xirfayees.

ISAYA 61:10

Aníng an ló'wa qwalalaá/ baraá AAKOÓ MUNGÚ wá ale. Muunaáeé' i baraa/ as Munguúeé', asma inós aníng iga uuntsuús ar tlabaá ba/ama, iga hotaá ganaa'ár tsiitiís adór hiyaay. Adoodá' garmoó duxuxuúm tir parootumamisi ar slamángw /ayo, nee adór dasír ta duxuuti tir parootumaamis, ar kwaslaá tlaxo gawden.

ISAYA 61:3

Kudá' tsuunqumiisá' baraá Siyoniro. Slamángw /ayo nguwa slaya' kitángw da/araro. Di/tá qwala/ ngiwa haniis kitángw tawa tsuunqumiisi. Tlabaá xirif ngiwa haniis kitángw muneesi'imaawo. Daqaní inooín kin bay «Ti'itaawér hota ganaa'. Dahaasíngw AAKOÓ MUNGÚ, as kahhó' inós kuwa xirfayeesi.»

ISAYA 64:10

Gixsaduuwók kudá' hhohho' naa darma tleehhitiyé' Siyoni aa darma tleehhít, Yerusalemu aa deewá'.

YEREMIA 31:23

AAKOÓ MUNGÚ Aleesleemusmo, Munguú Israeli i kaahi, «Qoomár múk Yuda bura diihhooárí ki/ís, inooín baraá yaamaá Yudawo nee gixsadaá Yudawo tari malé ooi, ‹AAKOÓ MUNGÚ nu tsuuqi, aá yaamuloouusér hota ganaa', i tsuuqi kiíng tloomár hhoohhoo'.›

ESEKIELI 44:9

«Gawaá adoorihe, anuú Aakoó MUNGÚ a kah, hee tumu wák oo ta pa/ángw dahmá i haniisi i kaahh tam oo xooro gaalá, oo taa hheehhe'eesiiká slaqwto laqaá muunahe, laqaá oo aníng i ilaiwawa/aaká, oo taa ya/aámár dahmií haniisi i kaahh ar didá' hhoohhoo', tam hoomaadá' ayaahúng hoot sleeme.»

DANIELI 10:9

Afoorós ngiwa axaás niri gurúr yaamií qaát nay slar/aát gu'uteero.

Yoeli 3:17

«Gawaá adoorihe kuungá' múk Israeli kay tsahhá' adór aníng AAKOÓ MUNGÚ tar Munguúhúng, oo baraá Siyonír hoót, tloomar'eé' ar hhoohhoo'. Yerusalemu iri hhoohhouúr, tam dahaayér waaraahh i baloó baraawós i datká.»

NAHUMU 1:15

Gawaá tlooma i qaatsitaak, ga/aawaak heé ya/abtór hho' ngi huúw, heé wayduú dahareemiís. Aá Yúda, deelorhúng ar ur tleehhaak, al'axweesantahúng boo/eesaak, asma heedá' tlaákw nu baloó tlaampa'aasiiká, asma kwaa qaroó suwa tsaát.

HAGAI 2:4

Anuú AAKOÓ MUNGÚ a kah, ‹Tam adoorihe kuúng Serubabeli muuna hhe'eés, nee kuúng Yoshua, garmoó Yehosadaki, kaahamusmoó úr oo Mungú, muuna hhe'eés sleeme. Tam múk yaamuuká' sleémeero, anuú AAKOÓ MUNGÚ a kah, kuungá' sleeme muuna hhe'eesé', gadiyeé tleehhaak, asma aníng nee kuungá' a dinkwa. Anuú AAKOÓ MUNGÚ Aleesleemusmo tí ngina oó'.

SEKARIA 3:4

Malaykamo mukdá' geeraawós wa sihhimiít guri báy, «Tlabaawós kwisingá' slasla/aren duuxaak.» Aluuwo Yoshua guri báy, «Ga/aaweek, án tlakweemaawók iga hingeés, án kuúng u tsiitiís ar tlabaá ló'wa hhohho'.»

Matayo 4:5

Yesu kuri huúw nee Neetlaangw ay baraá Gixsár Hhoohhoo' ar Yerusalemu, guri qaás gawaá tsintá Doó Mungú.

Luka 15:22

Ala baabá lawaaleerós gari báy, ‹Inqwaarír hhoo' huwaare' ar gaanslaay, tsiitisaak, dakós mungáy qaasaak, ya'a' ya/atáy dahaasaak.

Rumi 13:14

Ala kuungá' Aako Yesu Kristo na oohaak tawa baqamorhúng, nee slám ma kumiitara' ilatleerír slaqoohúng kawa tleemisa'.

Rumi 3:22

Mungú gan'amuuwí gun hanmiis dír umuúqo heewo oo Yesu Kristo gwa haratlintii'. Ku hanmiis dír umuúqo heewo as haratlintaao. Asma barqaanti i káhh.

Efeso 4:24

Munér /aben slawaak, ar taa tleéhh ar tlehhemuú Mungú, tidá' ti laqaqaam ar slafíngw ganaá' nee oo hhoohhoó', slafingwdá' looeemaá wa hariím.

Efeso 5:14

Gaarí an gár tasa oó', «Tláw, kuúnguudá' guaiím, waasleé/ baraá múk aa qaátl wa ale, daqaní Kristo kuúng u i gwa/aat.»

Efeso 6:10

Gimsé', ilakaaharu tleehhaak baraá Aakoowo, nee baraá aleesleemuú /uuruuwose.

Geehhoeemaá 11:2

Ala afeenidá' tsee/aá Doó Mungú i dirii' maweek, ma qoomeesaar. Asma afeenidá' kaa múk xoorduú i haniís. Nee inooín gixsár Mungú ka adarah ar ya'aaín slahheeri mibeeri tsiyáhh nee tsár.

Geehhoeemaá 19:14

Nee boo/oó gawaá doorí dirií' guri eehár, taa tsa/án gawaá farsuú /awák. Inooín inqwaruú kaa i tsiitimiís a inqwaruudá' /awák taa tleéhh ar kitaánír hhohho'.

Geehhoeemaá 19:8

Nee slám Mungú dasidá' gaa aleesleemií haniís kawa tsiitisi ar inqwaruú /awák oo taa tleéhh ar kitaánír hhohho'.» Inqwaruudá' /awák oo hhohhó' a tlehhemi'iidá' ganaa'á' awa múk hhohhó' oo Mungú.

Geehhoeemaá 21:2

Gixsadá' hhoohhoo' ngiri ár, Yerusalémúr /aben, i gawaá doorí wa awdít, amór Mungú wa ale. Gixsadá' kaa tsiitiís adór dasír ta duxuuti, ar taa parootuús as garmaadá' ga duxuút.

Geehhoeemaá 21:27

Ala gár slasla/aar ar baraadá' i dah i káhh. Nee slám heé muruú slasla/arén tlehhahhiít, nee heé lamusmoowo i dahiaaká baraadae. Ala múk baraadá' i dáh, a kudá' kilós umer'ín taa gooín baraá kitaábuuduú slafiingw oo Deelmoó bee/i.