ISAYA 45:9 - Biblía Axweesantá Hhohho' ar Mungú 2004

⁹ A tsaxwaawós heedaádá' ti tlaampa'aamiisá' nee tleehharusmoowós, Tleei tleeusmo gunqo tlaampa'ása. Hutloó adór hutla'aá hatlá'. Xáy, tleei tleeusmo gunqo beéra, «Gár ta tlehhit?» Laqaá «Gadiyér dabaawók i qoondaaká.»

ISAYA 45:9 Iomraidhean Croise

YOBU 10:9

Inslawiím, kuúng aníng ina tléhh ar hhape, hám daxta in male ki/ísa baraá hhape?

YOBU 33:13

Ahaá waáy, misti tlaampa'amisá' nee inós tawa kát, tam /aymuueé' oo wák ngwa mu/aywatsiiká.

YOBU 40:2

«Kuúdá' múk gur/aáy as tlakweemaaín kiwa tsahh nee Munguú Aleesleemusmo ti tlaampa'asá'a. Kuúngudá' axweesante'eé' tlaxuúm, anuú Mungú mu/aywatsáng.»

YOBU 9:12

Gaarós ar i slai gan taataahh gari ar tláy, heé inós ilaa/aro gu aleesláw a heemá? Heé inós gu báw, «Ma tlehh,» a heemá?

YOBU 9:4

Inós sagalooár yaariir ga kón, nee /uuruú yaariír gu kón, heé gu qiítl tlampa'aasaro nee iri baalín a heemá?

AXWEESANOÓ SAGALOOA 21:30

Sagalooa i káhh tam tsaahha i káhh sleeme, laqaá tam gurbua i káhh sleeme ar ta tleehhi a dimbé nee tidá' AAKOÓ MUNGÚ i slai.

DAHARUSMO 6:10

Umuúqo gár tleehharuuta kana iimír aáng wa qoomeés, nee adór hee i dirii'i i xu'utít, nee adór inós tir tlaampa'aasiaaká nee kudá' úr dirose.

ISAYA 10:15

Xaysé', tsawo ti kilós xirfayésa dír heedaádá' ga ar gadiyuusa? Xáy, masmeno ti kilós xirfayésa dír kudaádá' ga ar tlaaqa? Geera bar adoorí, hhara mukdá' gar qadimiís gwaa lilikís, laqaá hhara hee gu gáwtí tleská, kuduú xa'anoowooká.

ISAYA 29:16

Kuungásingá' muruú /aankwartsimá', xáy, iqo ya/aánda tleeusmo kuwa harafari bartá tleei? Tam xooslár tleei heedá' gaa tleehh nguwa beer, ‹Aníng kuúng iga tlehhká.› Laqaá xosluudá' taa tleéhh tleehharusmooín nguwa beer, ‹Kuúng gár ta xu' i káhh.› »

ISAYA 45:10

Tsaxwaawós na/oó baabuúwós babáw, «Gár tasa laqwál?» Laqaá na/oó aayoorós babáw, «Gár asltá xwayla isa /ák?»

ISAYA 64:7

Heé kuúng u fiririím i kaahh tumu wák, nee heé naagamiís kuúng leelehhtuuwo i kaahh, asma kuúng aga atén wa nahhát hám daxta taa baraá tlakweemaarén i meér.

ISAYA 64:8

Hám daxta AAKOÓ MUNGÚ, kuúng an baabuúrén, atén an tleei, kuúng an tleeusmoorén, atén sleémeero a gadiyér dabaawók.

YEREMIA 18:6

«Kuungá' múk Israeli, xáy, anuú AAKOÓ MUNGÚ adoodá' tleeusmoowí aa tleéhh, dirhúng i tleehhamooro a aleeslawaakáhe? Gimsé' xuaak, adoodá' hhape i diri' gawaá dabaá tleeusmowo an adór kuungaá múk Israeli tay dir'a' gawaá dabaaeene.

YEREMIA 36:29

Nee daanduú waawutmo Yehoyakimu waawutmoó Yudawo ta o', anuú AAKOÓ MUNGÚ a kah, kuúng kitaábuudá' una dá/, a didií kat, ahaá waáy gár kángw waawutmoó Babuloni ngusa gooín, iwa kaahi, ‹Yaamuuká' gi hhitín, muu nee makaywo giri hhaamiis.›

YEREMIA 50:24

Kiíng Babuloni ina tsaaxweelír i qaás iri óh, ala gár taa tsáhh i káhh. Tina sláy tari óh asma tina tlampa'asaán nee anuú AAKOÓ MUNGÚ.

DANIELI 4:35

Yaamuloouusér daanduú yaamu a gaarooká dirose. Dír malaykedá' gawaá doorí diriia adór i slai gan tlehhiit tam dír múk baraakaá yaamuwo. Heé dakós gu ilaá/ i kaahh tumu wák, laqaá heé gu báw, ‹Gár adoosíng kas tlehhit a milá?›

1 Korinto 10:22

Ahaá, atén aqo qitlána Aako kuwa buhhtisaan? Atén a ak /uuruú koomaána ta inose?