ISAYA 30:16 - Biblía Axweesantá Hhohho' ar Mungú 2004

¹⁶ Kitangose kuungá' tari oé', «Aasla'áy! Atén an /akumitaán ar farasuú ti'ii'íngw baál.» Kuungá' aqo ta'aaiindá', tari malé oé', «Atén makaá ti'íingw baalá' tinar tiaainá'.» Gawaá adoorihe mukdá' kuungá' nu gusisiím, ti'iingo kuungá' nu baa/.

ISAYA 30:16 Iomraidhean Croise

2 WAAWITÁ 25:5

Ala slaqwaruusér Kaldayo waawutmo guri eehát guri aleesleér dír xatstá Yeriko, slaqwaruuseerós sleémeero guna geexeér tari diya/aát.

YOBU 39:11

/Uuruuwós kudá' yaariír u haraaeéra baraá gadiyeéroge? Laqaá gadiyér gawit ar uwa tu/ i deéro?

WARA'AMI 147:10

Ku qwal/amiisiiká nee /uuruú faras, laqaá /uuruú miguuse gu sa qwalaala/iiká.

WARA'AMI 33:17

Faraási u arba/atír i sleeraaká baraá slaqwaraaro, hee sleeme gu tu/ká ar yaareemaá /uuruuwós.

ISAYA 2:7

Slám yaamuuín peésa nee sahaábuwo naa hatsiyé', nee alhhe'eesoó slasláwar'ín i kaahh. Yaamuuín naa hatsiyé' farsuuwo, nee gaardaá farsuuín i alhhe'eesoó kon'aaká.

ISAYA 31:1

Tsaxwaaín mukdá' Misrirí alee/isoó firór aa'áw nee kudá' farasuú harahhifafiít. Mukdá' gaardaá slaqwara ngi harahhifá' as kiwa yaariír, kudá' múk farsuú i tsa/a/ám gu harahhiíf as tawa múk /uureemaá koóm. Ala Kudá' Hhoohhoó' oo Israeli ngu i qaytsimiitiaaká, tam sleeme AAKOÓ MUNGÚ ngu yaahamiisiaaká.

ISAYA 31:3

Múk Misri a muu, inooín a Munguheeká, nee farsuuín a makaay, slám a qeeruwoká. Qoomár AAKOÓ MUNGÚ dakós burngwa tleés xooroodá' ale/isoó hanmamiis kan gee/aasl nee tidá' ta alee/iimisi in hú', xoorduuká tsaraawo niri hhaná'.

YEREMIA 39:4

Qoomár Sedekia waawutmoó Yuda nee slaqwaruuseerós sleémeero mukwí kuwa ár, tari xweeraá /akumiít tsee/aá gixsa ar loohír asalmoó waawutmo, tidá' waaraahh ar dír koo/i ti dók, tari tláy ay Araba.

YEREMIA 4:13

Ga/aawaak, wakusmo ni hi'iit adór huunki. Gaarduuwós awa slaqwara a adór bambaao, nee farasuuwós i gaanslár ti'ii'ín gwares ba/a. Tsaxwaarén asma aga hhaamaán.

YEREMIA 46:6

Kudaádá' islahh ti'iingo dír ta ay i káhh, tam miguuse i kotsqotká, bihhaá /iiko dír yaaér Eufratero inooín taa dukuúts tari huhu'ún.

YEREMIA 52:7

Naagáy, dirka baraá koo/iro kari fooxiís, slaqwaruuse iri /akumít tsee/aá gixsa qoomár xweeraawo, loohidár koo/i nee tiqá' ti dók bihhaá asalmoó waawutmo, tay kumiít ay Araba, qoomaarihe múk Kaldayo gixsadá' kaa harweér bihhe sleémeero.

WA/AA/I 4:19

Múk taa eehar ku ló'wa insláhh ta gwersuuwo, atén tina guús ay gawaá tlom'i, tay gigidiné' baraá darmuú wa alé.

AMOS 9:1

AAKOÓ MUNGÚ una ár aa sihhiít bihhaá kitángw ilahhooa kawa hanmaamisi, iri báy, «Uheemaá doó Mungú kudá' taa qaalín slahheek ay dír ihhafiirír do' i diingit. Uheemiiká' giqaweek ay dír ni huuhu'una' gawaá sagér muu sleémeero. Kudá' naa meetiye' diisíng wa alé, aníng in alhhe'eés ar paánga. Tam oo goów i kaahh, tam oo kotsqoót i kaahh.

MIKA 1:13

Kuungaásingá' yaamuloouusér Lakishír hoot, gaardaá slaqwara farsuú isláhh ti tsege'. Asma kuungá' tlakweemaá múk Israeli ina alealusé', nee múk Siyoni kuri tlakweemár eeré' sleeme.

HABAKUKI 1:8

«Farsuín ku isláhh ta dueemiwo, i xaraasliyá' ta tawerú qwariita, nee slaqwaruusér faras gwa i tsa/aan amór i dahhiya' ka saaw, ki islahh adór gwareesír aa gaanslár tleer amór gár /ayma.

DABE 28:25

«AAKOÓ MUNGÚ wakuuserók ga /uurií haniis, kuúng uri bál slaqwaraaro. Kuúng nee inooín tin dogá' ar loohír wák, ala kuúng tari gop ar lohdu faanqw. Kuúng turi aahh baraá waawuti'iima sleémeerowo.

DABE 28:49

AAKOÓ MUNGÚ xoorór amór saáw daahh ngin huuw, kuúng uri i haratleér ar gaanslaay adór gwareesi ir gáwtí tlaatleer, xoorór kuúng tsifirirós ta xu'uká.