ISAYA 29:15 - Biblía Axweesantá Hhohho' ar Mungú 2004

¹⁵ «Tsaxwaaín mukdá' axweesanay'ín gu dír AAKOÓ MUNGÚ wa lu/u/uúm, nee mukdá' tlehhmi'ii'ín baraá giwtírí diriiá', mukdá' káh, ‹Heé atén ti ga/áw a heemá? Heé atén ti xuú' a heemá?›

ISAYA 29:15 Iomraidhean Croise

2 SAMUELI 11:27

Qoomár /aa/aá Bat-sheba niwa faakiyé', Daudi iri ya/abín, Bat-sheba kawa huwi amór do'ós. Bat-sheba tari harér Daudi. Inós dír Daudiwo na/oó garma guri xwayluúr. Ala kaangwí Daudi aa tleéhh, AAKOÓ MUNGÚ guri buhhtís.

2 WAAWITÁ 17:9

Múk Israeli muruú qoomaaká nguna naaqo tlehhiitiyé' dír geeraá AAKOÓ MUNGÚ, Munguúine. Wa/aameedár gongoama' ar munguaá hatlá' kiwa sluufmisi ngiri tleehhiyé' baraá umuú gixsaro, iimír dír /aampár xuumuusér wa tleemu ay baraá gixsaduudá' taa tleéhh ar koo/ír gawit.

YOBU 34:22

Dír giiw nee ar boo/ i káhh dirose, ar múk tlákw i nahhaati ar kiwa ariiká.

WARA'AMI 59:7

Ga/aaweek, ar afer'in tan tawo tlororoo', afer'ín i qarqát, a adór hhamaandí, inooín kawa xui heé gi axamiís i kaahh.

WARA'AMI 73:11

Inooín ta kaahi, «Mungú mingir tsaahh, sagalooa i deéro dír ínsuuquú gawto?»

WARA'AMI 83:3

Mukók ku baramaanír wa slaa' ar naaqo. Mukók kudá' ta xuun ku gigdín.

ISAYA 28:15

Asma kuungá' a kata', «Atén nee gwa'ara alqado aga tleehhaán, nee gi'i taa axweesani slawaán, qoomár amotlakwe bir taa i hardát, amoorén ngi keeraaká, asma lama ana dír guwayrén tleehhaán, nee al/ayma an dír tay nahhataan.»

ISAYA 28:17

Aníng sakwasleemár ganaa' anar gadiyuús tawa xooslmooeé' oo qoomeemes, nee hotaá ganaa'á' tawa hhutlmoó qoomeemes, lamemoohúng kudá' ta i gogoba' kin xoontsoroo' nee tluwoó tlaa/e, nee al/aymarhúng tidá' tay nahhmita' kan ar tlay nee alwuór ma'aay.

ISAYA 30:1

AAKOÓ MUNGÚ i kaahi, «Tsaxwaaín na/iidá' aníng iga aahhiye', kudá' gurbu'úngw sla'á', ala kwe'eé' ngu slaiiaaká, kudá' dinku'uumár nee muu ngi sla'á', ala ar qeeruueé' ngi slaiiaaká, as kahhó' pa/ángw tlakweema ngir iinkikii/iyá' nguwa slaya'.

ISAYA 47:10

Kiíng aga yaandahhe'és baraá tlakweemaawók ale, a kat, ‹Heé aníng i ga/áw i kaahh.› Sagalooarók nee xu'utiroge iga qwaareesiyé', tari baraá muunaáwók i ó', ‹Aníng a kilooeé', heé hatlá' oo adór aníng i kaahh.›

ISAYA 57:12

Aníng gana'amuuhúng un alki/iít nee gadiyérhunge, ala inooín gár nuwa buiya' i káhh.

YEREMIA 23:24

Xáy, hee nahhaata gaqo aleesláya ngway qo tsuwa araaká? Ahaá, anuú AAKOÓ MUNGÚ a kudá' dawaakáhe umuú diiro, gawaá doori nee baraá yaamuwo? Anuú AAKOÓ MUNGÚ tí ngina oó'.

ESEKIELI 8:12

Aluuwo Mungú iri báy, «Heewí, aga aándi kángw bariisér múk Israeli taa tlehhiít baraá giwtír wa alé, umuú heewo i baraá kutuwirós tidá' slaqsa'aá munguaá hatlá' koom. Inooín i kaahiya', ‹AAKOÓ MUNGÚ atén ti ga/ayká. AAKOÓ MUNGÚ yaamu gwaa máy.› »

ESEKIELI 8:8

Inós iri báy, «Heewí, koo/irí fooxiseek.» Aníng ngiri fooxiís, afkú do' nguri ár.

ESEKIELI 9:9

Inós iri báy, «Tlakweemaá múk Israeli, nee awa múk Yuda, ki ur ló'wa aleeró. Daanduú yaamu aa haáts tseerdaá muko, nee baraá gixsaro heé gan'amuú tlehhiít i kaahh. Asma ta kaahi, ‹AAKOÓ MUNGÚ yaamu gaa máy, AAKOÓ MUNGÚ i xumisiiká.›

HOSEA 5:2

Kuungá' baa'ár saaw aga folé' baraá Shitimu, ala aníng kuungá' sleémeero nu muúx.

SEFANIA 1:12

Qoomaadae gixsár Yerusalemu an tsaa'astár tsee/aariím, nee mukdá' aa baraá horondoó buurárí wahhadiit un sakwasleemuút, Mukdá' baraaíní káh, ‹AAKOÓ MUNGÚ gár i tleehhi i káhh ta ka hhoó' laqaá ta ka tlaákw.›

MALAKI 2:17

AAKOÓ MUNGÚ ugwa slaaqatisé' ar /aymi'iihúng. Ala kuungá' a kata', «/Ayma'aá kura slaaqatiisaán a gaalá?» Asma tawa kata', «Umuúqo heé tlakweemaá tlehhiít ku hhoó' dír ilaá AAKOÓ MUNGUHE. Inós múk adór kwí gun sa qwalalaa/,» laqaá tawa kata', «Munguúdá' sakwasleemár ganaa' ga tleéhh i amá?»

Yohana 3:19

Sakwasleema an tí, gwa/aateema nina baraá yaamií hardihiyé', ala muu giwti gana slaá' ta gwa/aateemaawo, asma muruú ta tlehhahhiti ku tlákw.

1 Korinto 4:5

Gawaá adoorihe hee mu gaanslár sakwasleemuutara', ay dír Aako nay hardihi. Inós muruudá' taa luú/ baraá giwti, ngun geehhooatis dír gwa/aátií alé, nee inslawoó munér muu nguri geehhoatis. Daqaní umuúqo heewo xirfuudá' inós wa hariím gu sláy dír Munguhe.

2 korinto 4:2

Atén tlehhemi'iidá' sleémeero awa getlakw nee awa murér koomá' iga mawaán. Al/ayma a tlehhiitanaaká, nee slám axweesantá Mungú a warqeemisanaaká. Ala atén tin kiloorén xu'utisaán dír umuúqo heewo, ar looeema kiwa alki/iitaan ar geehhooeema dír geeraá Munguhe.

Geehhoeemaá 2:23

Nee aníng na/iiwós i faák tsu/utaaro. Nee múk kríshaanáy sleémeero gari xuu' adór aníng tar kudá' munér muu ga tsee/ariím nee inslawaywo. Nee aníng umuúqo heewo baraahunge un buú' ar adoodá' inós wa hariím as tlehhemi'iiwós kudá' aa tlehhiít.