HOSEA 9:8 - Biblía Axweesantá Hhohho' ar Mungú 2004

⁸ Anuú aarusmo a xuumusmoó múk Israeli, múk Munguúeé', ala umuúqo amór i kay'a kaa tsaaxweelírí qaás, tam baraá doó Munguine inooín ki slaiiká.

HOSEA 9:8 Iomraidhean Croise

1 WAAWITÁ 17:1

Aarusmooko ta bay Eliya oo Tishbe oo yaamaá Gileadi, waawutmo Ahabu guri báy, «Ar umuú AAKOÓ MUNGÚ, Munguú múk Israeli kudá' slaáf, kudá' aníng ni sagadiyuus, tluwaay i baloó taxaatiiká, laqaá hara' u aandaaká ay dír aníng kaangw gway oo'.»

1 WAAWITÁ 18:1

Alaá deelór yaariir iwa waaráhh ar har afiqoomár kureeraá tám awa giyeé, Eliya axweesantá AAKOÓ MUNGÚ gana axaás iwa kat, «Tláw ti geehhooes dír waawutmo Ahabu, daqaní aníng tluwaay ngu haniís baraá yaamu.»

1 WAAWITÁ 18:19

Gawaá adoorihe, ya/abiím múk Israeli sleémeero ni burumburiiti dir'eé' gawaá tloomár Karmeli, nee sleeme dinkwa nee aaruusedá' ar Ba'ali ar tsiire tsiyáhh nee mibeeri kooán nee aaruusér tsiire tsiyáhh ar Ashera, munguúduú /ameeni, aaruuseedá' ta /aymisi nee waawuto'o Yesebeli.»

1 WAAWITÁ 22:11

Baraá tla/angw'ine aarusmoó wák, Sedekia garmoó Kena'ana, xareemaá muqsla gina tleéhh, iri oó', «AAKOÓ MUNGÚ i kaahi, ‹Xareemikae kuúng múk Aramu un alií ki/ís nee kuri hhaamís.› »

1 WAAWITÁ 22:22

AAKOÓ MUNGÚ iri oó', ‹Adór kur al/ak a adoomá?› Inós iri oó', ‹Aníng an tláw aaruuseerós sleémeero ngay lamuuse tleéhh.› AAKOÓ MUNGÚ iri oó', ‹Kuúng al/aymaro u aleesleér, tláw, adoosíng tleehheek.›

1 WAAWITÁ 22:28

Mikaya iri oó', «Kuúng barnaxes naa kí/ ar wayda, daqaní AAKOÓ MUNGÚ aníng iga ya/aawiiká.» Iri malé kumiít axweesanto, «Iími, aníng tí ni kah iiaárí qaasaak.»

1 WAAWITÁ 22:6

Ahabu aaruuse gari burumbuúr, aaruusér tsiire tsiiyáhh, gari yaahaás, «Xaysé' aníng a haraatláwa Ramot-gileadi, laqaá daqawká?» Inooín tari oó', «Haraatláw, AAKOÓ MUNGÚ kuúng u baalírí haniis.»

2 WAAWITÁ 13:21

Qoomarka wake muu iwa heé foliiti, daqtá slaqwaruuse kana ár, tuuadá' ngiri kwahhiyé' baraá /aantár aáng Elisha kway foól, inooín niri gowiyé'. Tuuadá' fadaá Elisha ngiwa kwatít, ina waaslé/, iri sihhít ar ya'aawós.

2 WAAWITÁ 2:14

Tlawuuduú Eliya aa gawaawós huu' guri óh, ma'aay giri slaáhh iwa kaahi, «AAKOÓ MUNGÚ, Munguú Eliya i amá?» Qoomár ma'aay ngiwa slaáhh, ma'aay nay qasiitiyé' bihhe tsár, inós iri waaraáhh ay gayuú hatlá'.

2 WAAWITÁ 2:21

Elisha iri tláy, ay didá' tsiinqár ma'aay i diri', diwtidá' gari kwaáhh baraá ma'áy ale, iri oó', «AAKOÓ MUNGÚ i kaahi, ‹Ma'ayká' iga tsuu'uús, iimír hamí gwa'ara ngi baloó huwiaaká, laqaá /ameena gur'e ga kwakwahhaká.› »

2 WAAWITÁ 4:41

Elisha iri oó', «Puurú huwaare'.» Puurú kuri huúw, inós guri ku'uús baraá hutlaay, iri oó', «Daxta muruú /ayma slawaak ta /ayin.» Tari /ayín, heé tiqti aa ót i kaahh.

2 WAAWITÁ 4:43

Ala sagadiyusmoowós iri oó', «Adór muruú /aymaarí kur haniisi dír múk tsiiruú wák?» Elisha iri oó', «Muruú /ayma haniseek, asma AAKOÓ MUNGÚ ina oó', ‹Muu in /ayín, tari aax, kuri meetiis.› »

2 WAAWITÁ 5:14

Naagáy Na'amani iri tláy ay baraá yaaér Yordani, iri /eét sagaá wa faanqw ar adoodá' Elisha heé Mungú ngira oó'. Inós iri ló'wa huunguú/. Kaahartá slaqwtós iri hhoohhouúr adór tiqár na/oó niiná.

2 WAAWITÁ 5:27

Gawaá adoorihe tiqtidár tsatmit ar Na'amani kuúng u ot, nee xwaylarók sleémeero, tam ay alhhe'eesay wasle.» Naagáy Gehasi iri tláy didae nee slaqwtós tiqtír tsatmit gaa qaroó ót, kaahartós aa /awaakuúr adór tlaa/aá tluwaay.

2 WAAWITÁ 7:19

Alee/isusmooduú waawutmo Elisha guna mu/aywaáts, iwa kaahi, «Tam AAKOÓ MUNGÚ inósuú kilá' afkú doori burngwa gweér, adoosíng iqo baloó ya/aánda?» Qoomadaádae Elisha guna mu/aywaáts, guna bay, «Kuúng aqo tawo aán ala muruú /aymaadá' u /akká.»

2 WAAWITÁ 7:2

Aluuwo alee/isusmoó waawutmo Elisha guri báy, «Tam AAKOÓ MUNGÚ inósuú kilá' afkú doori burngwa gweér, adoosíng iqo baloó ya/aánda?» Elisha iri oó', «Kuúng ilaawoge adoorí a tawo aán, ala gár ta tsaq i káhh.»

WARA'AMI 124:7

Atén ana /akumitaán adór tsir/ír aa baraá tsaaxweelír wa kotsqot. Tsaaxweeli aa hhitirút, atén aga kotsqotaán.

DAHARUSMO 9:12

Heé baalaarós ga xuú' i kaahh, aqo adór siyó kur ohaahin gitsa/aá tlaakwe nee baraatsufaay, nee adór tsir/i kar ohaahin nee naqfí, an adór muu kur haraxopiiti ila nee tí, nee qoomár tlaakw.

DAA'AANGW 3:3

Xuumuusér gixsa ina aán, qoomár inooín tawa harweeriirin baraá gixsaro. Naagáy ngiri yaahaás, «Xáy heedaádá' muunaáeé' i slai ngwa aandí'i?»

ISAYA 62:6

«Aá Yerusalemu, aníng xuumuuse aga qaás gawaá koo/irók, tlaatla/aangw nee xweeraawo i baloó xasliitiaaká.» Kuungaásingá' AAKOÓ MUNGÚ inslawtimisá' ma baloó lakiitara'.

YEREMIA 11:19

Ala aníng an adór deelmoó bee/i kudá' tsatsa'aár oo ta gaasár ay. Aga xuiiká adór aníng tir gaasár wa slaá', tawa kaahi, «Xa'anoowí u hhitiimaán dinkwa nee mamuuwose. Un amór saáwií kwahhaán baraakaá yaamaá múk slafa. Umuuwós mukuwa baloó insláy malé alé.»

YEREMIA 14:13

Naagáy, aníng niri oó', «Aá Aakoó MUNGÚ, ga/aaweek, aaruuse i múk babeer, kuungá' slaqwara nu sleeraaká, laqaá qwari, asma kuúng al'axweesani aga ó' tawa kat, ‹Wayda i kumamiit baraá yaamuukae.› »

YEREMIA 23:13

Baraá tla/ángw aaruusér Samariaro gár ló'wa buhhtamis aga ár. Inooín nina aariiriné' ar umuú Ba'ali, muk'eé' oo Israeli nguri qwaareesiyé'.

YEREMIA 31:6

Asma qooma i hi'ít ar xuumusmo iwa ateeti gawaá geetuú tlom'aá Efraimu, iri ooi, Gusé', a tsa/amán ay Siyoni amoodá' AAKOÓ MUNGÚ, Munguúrén, i dirii'i.»

YEREMIA 6:14

Muk'eé' i baraá qwanáy dirii', ala inooín qwanoó muu kun duquuqún tawa kaahi, ‹Wayda i deer wayda i deer.› laatí wayduú daadáw i kaahh.

YEREMIA 6:17

Aluuwo nuri xuumuuseérí qaás, nuri báw, ‹Afór tarumbeéta iiárií qaasaak.› Ala inooín tari oó', ‹A iiárií qaasanaaká.›

WA/AA/I 2:14

Aaruuserhúng gár daanduhunge aa aán, a iigu'utuú lama nee oo al/ayma. Tlakweemaahúng ngaa geehhoeesi'iiká, as kahhó' kiwa meera'. Ala aarír lama ngina kuungá' babayé', tidá' kuungá' nu qwaareemiis.

WA/AA/I 4:13

Tí sleémeero ina tleehharút as tlakweemaá aaruuseerós nee dakuúsár kaahamuuseerós. Inooínaadá' múk hhó' ngwa tawo tsu/iye' baraá tla/ángw gixsa.

ESEKIELI 3:17

«Heewí, aníng kuúng ugwa xuumusmoó múk Israelír wa qaás. Aníng gaa birnga oó' dirók, kuúng mukwí ku naanáq kitangw'eé' wa aleeró.

ESEKIELI 33:7

«Heewí, hamí daxta, aníng kuúng ugwa qaás tawa xuumusmoó múk Israeli. Kuúng axweesani bara dir'eé' wa axás, muk'eé' ku gurbú'.

HOSEA 5:1

Tí iiárií qaasaak, kuungá' kaahamuusér Mungú! Iia qaasaak, kuungá' múk Israeli! Iia qaasaak, múk doó waawutmo, asma kwasleemarí i kuungá' wa hariín. Asma kuungá' aga tsaaxweeli tleehhité' baraá Misparo, nee xotloompír taa qaás daanduú tloomár Tabori.

HOSEA 9:7

Deelór nuwa muux naa xeér. Deelór li/aay nguwa buu' naa hardát. Múk Israeli gari xuxuu' qoomaadae, kuungásingá' kaahá', ‹Aarusmo a daktani! Heé ta geeraharahari nee qeeruú Mungú a slarhhamá!› Adoorí an katá' asma tlakweemaahúng naa tlahhiyé' nee aahhirhúng ar tlakw aa tláhh sleeme daanduueene.

HOSEA 9:9

Kuungá' aga faakamisé' tlakweema tlehhtuuwo, adoodá' aáng aa tleehharut baraá Gibearo. Mungú dakuúsar'ín gan inslasláy nee giri muux as tlakweemaaín.

MIKA 7:4

Tam kudá' hhoó' baraá tla/angw'ine a adór fuquráy, nee heé ganaá' baraá tla/angw'ine a adór yawtá laqeelo. Qooma naa hardát ar Mungú mukwí nguwa muxi, adoodá' xuumuuser'ín ngira geerií gurbuú', asma xuumuuser'ín a aaruuse. Mukwí qoomaarihe dae gway eér, nay amoqwaariyá'.

Yohana 15:24

Aníng tlehhemi'i ina tla/angw'ín wa tleéhh, tam heé hatlá' i kaahh oo tlehhema'aá adór kudá' gaa tleehh. Adoorí geeraawo bar aga tleehhiiká, inooín alók geera ta tlakweemaá konká. Ala daxta inooín tlehhemi'iieé' kaa ár, tam adoorihe aníng nee Baabuúeene taa aáhh.

Rumi 3:7

Ala barnaxes lamte'eé' gár i laqaqaan a looeemaá Mungú, inós kuri xirfayeés as lamte'eé', aníng daqaní gár tis sakwasleemuuti adór tlakusmoó wa ale?

Ebrania 13:17

Kuungá' geeraharuuserhúng ilaiwawa/aak, nee adoodá' inooín ta kaahi tlehhiitaak. Asma inooín munerhúng ngin ga/aayá' xweera nee tlaatla/aango. Asma faarór gadiyér'ín ngi ooiyá' dír Mungú i alé. Kuungá' bar iga ilaiwawa/é', inooín daqaní gadiyér'ín ngi tleehhiyá' ar qwala/, ala ar gurhaamirooká. Ala barnaxes kan tleehh ar gurhaami gadiyér'ín daqaní gár dirhunge i bu' i káhh.