HOSEA 4:13 - Biblía Axweesantá Hhohho' ar Mungú 2004

¹³ Inooín ilahhooár muruú ta tsu/i kan gawaá tlom'ií wá hanmaamiis. Nee ilahhooár da/a/aangw kan gawaá sagér tlom'ií wa hanmiis, baraá guruú xaa'aá ti'ita nee oo ta bay libúa nee ta/eewiro, asma mahhtirós ka hhoohhoo'. An gár dasuuhúng is fuquusi, nee /ameenár taa duxuút is duuxór gaamis as iwa tsee/aá wá hi'iimit.

HOSEA 4:13 Iomraidhean Croise

2 WAAWITÁ 17:7

Adoorí ina tleehharút asma múk Israeli ina dee/anuút dír geeraá AAKOÓ MUNGÚ, Munguúine, kudá' gaa tuu/ baraá dabaá Faraowo, waawutmoó Misri, nee sleeme munguaá hatlá' ngina sagadiyusiyé' kitángw Munguú ló' wa ale,

2 WAAWITÁ 23:7

Inós maraá mukduú tsaatu'uumár tlehhiít baraá Doó AAKOÓ MUNGÚ wa ale gina feé/, nee didá' /ameena hiya'aá sluufmisuú Ashera ngiwa tlehhit.

ISAYA 1:29

Asma kuungá' tundu mureekees kuwa sluumisá', as ti'ituudá' taa ilaatleerusé' kuwa sluufmisa', tunduri amoqwaarees as asalmoodá' taa tsawdé' kuwa sluufmisa'.

ISAYA 57:5

Kuungaásingá' ilatleeri na al'ot baraá xaa'aá ti'itú wa ale, dír qo umuú qamuú xa'anoó loo/o naa/e. Kuungaásá na/iihúng tsu/á' baraá xatsoó wa ale, ngiri ilahhooár wa hanmisá' baraá mar'ór tla/ú wa ale.

ISAYA 57:7

Kuungá' qateenoohúng iga hhafé' gawaá sagér tlom'aá tlet. Ilahhooár muruú ta tsu/i kari amoodá' i haniisár eeré'.

YEREMIA 2:20

Iimír aáng kuúng taqwantók aga geeqeér nee piíngu kuri kwáhh amór saaw, tari ó', «Aníng kuúng u sagadiyuusaaká.» Gawaá tlom'aá tlede nee umuú gamuú xa'anoó loo/o naa/e munguaá hatlá' ina ii xupaapú' adór tsaatuso'o.

YEREMIA 3:13

Kuungá' tlakweésarhúng kilós na hhu'uu'umaak, tidá' anuú AAKOÓ MUNGÚ, Munguúhúng, iwa ahhé', nee munguaá hatlá' kiwa slaé' sluufmisuuwo dír umuúqo gamuú xa'anoó loo/o naa/e, nee afor'eé' kari iialooesi'iiká. Anuú AAKOÓ MUNGÚ tí ngina oó'.

YEREMIA 3:6

Qoomár waawuti'iimár waawutmo Yosia AAKOÓ MUNGÚ aníng ina báy, «Xáy aga aándi adoodá' múk Israeli kudá' inkihhimu wásl aa tleéhh? Ina geexayé' niri tsa/ané' gawaá umuúqo ságw tloomaro nee umuúqo dír gamuú xa'anoó loo/o naa/e as tsaatu'uuma ngiwa tleehhiya'.

YEREMIA 44:8

Ahaá waáy, gár muner'eé' kas duxuunda' as munguaá hatlá' kiwa fiririindá', kudá' taa dabaahúng ar tlehhité', nee kiwa mooyángw tsuú' i da/a/aanda', munguaá yaamuuká' ta hota' awa múk Misri? Xáy, kuungá' tunduwa hhaamisi an sla'á'a nee tawa múk ta lu'umisi nee tari múk ta waaqaaqai nee xoordu sleémeero awa daanduú yaamu?

ESEKIELI 16:16

Tlabaawók bahh'alé ina parootús ar kiteeridaá ilahhooa, tari didá' wa fuqús. Kángw adór kwí ugwa baloó axaasaniiká, nee sleeme inqo sangw baloó ti'iitiiká.

ESEKIELI 16:25

Dír umuúqo iimu/úngw loohír ure wa/aamér munguaá hatlá' kiwa ilahhooár wa hanmiisi ana tléhh, hhohhoaarirók kari ar fuqús dír umuú heé waaraahha, tari búhh fuqto.

ESEKIELI 6:13

Qoomár tu'uuín birka hhaáf didá' mungui ngi firór aa'aya' gawaá tlom'iiwo, gawaá umuúqo gongoamoowo, nee dír gamuú xa'anoó loo/o naa/e oo ti'ita, didá' ilahhooár mooyángw tsuú' ngiwa hanmamisiya', daqaní inooín aníng iri tsaahhiyá' adór tar AAKOÓ MUNGÚ.

HOSEA 10:8

Wa/aamér munguúaá hatlá' kiwa sluufmiisi ar gawaá gongooamoó Afeni, tidár tlakweemaá Israeli, ka hhitín, fuquráy nee sla/a nin ti'iitiyá' gawaá kitángw sluufáy wa ale. Inooín tlom'i kiri bay, ‹Atén ti tuuntuke,› nee gongo'oma' kiri bay, ‹Atén ti harahue'.›

HOSEA 11:2

Adoodá' ngira alkoóm ateetiingo, án inooín tina ak geexáy. Ilahhooadár muruú ta tsu/i ta Ba'ali hanmiisi ngina ooha hhe'eesiyé', nee ilahhooár mooyángw tsuú' ngina hanmisiyé' dír munguaá slaqsi'i.

HOSEA 2:13

Aníng a muúx as deeloodá' ur ar munguaá ta bay Ba'ali i aaeer, nee ilahhooadár mooyángw koom deeloodae i da/a/ángw aaeer dír munguiidá'. Tina parootumaamís ar peéterós nee ar muruudá' tlaxo gawdén, iri tleér amór mulqeerós, aníng iri gunqaarés. Anuú AAKOÓ MUNGÚ tí ngina oó'.

AMOS 7:17

Gawaá adoorihe, AAKOÓ MUNGÚ i kaahi, ‹Hareerók i tsaatuso'o tleehhít baraá gixsaro, na/iiwók awa daaqaay nee awa dasu ki tsuu/ ar paánga, nee qaymoorók kan qasiis dír múk hatlá' ar hima, kuúnguú kilá' a gwá' baraá yaamaá naa meeta gwaaiye', nee múk Israeli kun loohatis amór saáw i ale dír yaamuuine.› »