Geehhoeemaá 21:8 - Biblía Axweesantá Hhohho' ar Mungú 2004

⁸ Ala mukduú da'ayuuse, nee kudá' naa haratlinti'ii'iiká, nee kudá' buhhtimisá', nee mukdá' múk tsuú/, nee múk fuquuse, nee da/aluuse, nee múk munguaá hatlá' haratlintaatií', nee lamuuse sleémeero, dir'ín a baraá tlawtadá' asltá kiberiíti iwa ohahiin. Gaarí an gwa'arár tsár.»

Ya/abtór hho' 1977

⁸ Ala mukduú da'ayuuse, nee kudá' naa haratlinti'ii'iiká, nee kudá' buhhtimiisá', nee mukdá' múk tsuú/, nee múk fuquuse, nee da/aluuse, nee múk munguaá hatlá' haratlintaatií', nee lamuuse sleémeero, dir'ín a baraá tlawtadá' asla iwa ohahiin ar kiberiti. Gaarí an gwa'arár tsár.”

Geehhoeemaá 21:8 Iomraidhean Croise

AXWEESANOÓ SAGALOOA 19:5

Lamabu'usmoó lamusmo ku pa/asiiká muxtaaro, tam heé lamusmo gar /uyká.

AXWEESANOÓ SAGALOOA 19:9

Lamabu'usmoó lamusmo ku pa/asiiká muxtaaro. Nee heé lamtá axweemamiís i qwaar.

ISAYA 51:12

AAKOÓ MUNGÚ i kaahi, «Aníng a kudá' kuúng u gurkwa/ás. Ahaá waáy gár heé gwaá' kus da'ayuumit Heé qo ilaá wa qwaár adór gitso?

ISAYA 57:11

Xáy, heé kuungá' nu dae tlaáq a heemá? Tam lameemo kiri tlaqé', aníng iri insleeri'iiká, tam aníng iri meeré' baraá inslawayhunge. Aníng iimír aange aga dir'eéní xasliitiikáhe, nee an gár kuúng is ilaiwawa/ká doóqa.

ISAYA 9:15

Sage an bariisér ilaiwa/amér koom, hhayshe an aaruuseedá' lamtá intsaahhatimisá'.

MALAKI 3:5

AAKOÓ MUNGÚ Aleesleemusmo i kaahi, «Aníng kuungá' nun i tseewúw as nuwa sakwasleemuut, aníng tay lamabu'usmoó inslahhúw daanduú da/aluuseero, nee daanduú fuquuseero, nee daanduú kudá' lo'ór huwahuuwá' ar lama, nee daanduú kudá' sagadiyuuser'ín ngi baramaanuusá' baraá slaasláwar'ine, kudá' kwaalo'o nee panmo ngi baramaanuusá', kudá' hariímár /eetusmo ngi /ititimá', tam aníng i da'ayumitiaaká.»

Matayo 10:28

Kudá' slaqwaá tsu/á' mi da'ayumitaara', asma qeeru gaasaro ngu aleeslay'aaká. Ala Mungú na da'ayumitaak, kudá' aleesleemuú koóm oo slaqwa nee qeeru ngiwa qwaareesi baraá asltá baloó gwaa'aaká.

Matayo 25:25

Aníng ana da'ayuút, talaántarók ngiri yaamií foól. Xuuxueek, talaántarók tidá' ooheek.›

Matayo 8:26

Giri báy, «Mas da'ayuumitá', kuungaásingá' haratlintaao niina.» Siiwadár kilae iri tláy, fur'a nee tlawto giri iigahhaát, umuúqo gaaro iri xaslít.

Marko 9:44

Baraadaádae naanaga i qatlká, asla sleeme i gwa'aká baloó ale.]

Yohana 8:44

Kuungá' amór ta dahha' a amór baabuúhúng, Neetlaangw, nee ilatleerír baabuúhúng an tidá' ta sla'a' tlehhmuuwo. Inós a tsu/utusmo iimír iimu/uungo, tam aa sihhiitiiká baraá looeemá i alé, asma looeema baraawose i kahhiyá'. Bir lamtá axwees, a tós kilós gan axwees, asma inós a lamusmo nee a baabuú lama.

DABE 20:8

«Geeraharuuse i kumit yaahamisuuwo, ‹Xáy, heé daimiít laqaá heé aa daba' tsatiit i deéro? Bir deer i watli amór do'ós, aluuwo múk hatlá' munguwa daba' tsaát adór inós wa aleeró.›

2 Tesalonike 2:9

Heedá' Tlaákw nin hardah ar /uuruú Neetlaangw, nee inós umuúqo waa/oo/amooro ga tleehh, nee layaá al/aymaaro.

1 Timoteo 4:2

Intsaahhasarí amór i dahh a amór mukduú lamuuse. Afoodá' hho' ar baraá muner'ín aa hhitirút adór gár taa daá/ ar muqslír da/a/aam.

Tito 1:16

Inooín ta kaahi atén Mungú u xuaán, ala inooín Mungú ku siaasii' ar tlehhemi'ii'ín. Inooín a múk aa dee/aanuut ló'wa ale, múk iawaslén, Múk hariimaaká gadiyér hho' tam ar wák kawa tleehhi.

Ebrania 12:24

Kuungá' ana hardaté' dír Yesu. Inós an harki/isusmoó alqadoodá' /aben. Tam tseereerós tidá' hhoohhooeemiis i ak axwés ta tseereedár Abeliwo.

Ebrania 13:4

Muu sleémeero duuxo ngi ilaiwawa/i. Hhawaata nee hareerós masók a múk inkihhimuú koóm baraá duuxor'ine. Asma Mungú fuquuse nee tsaatuuseero gi sakwasleemuut.

1 Yohana 2:22

Heé lamusmoó kilá' an kwí káh, Yesu a Kristowooká. Kwí an Wakusmoó Kristo, kudá' Baabá nee Garmaawo gi satlaánk.

1 Yohana 3:15

Umuúqo heé hhiyaawós gwa aahh, an kudá' múk tsu/a/iím. Nee kuungá' a xuá' adór heé múk tsu/a/iím slafíngw alhhe'eesay wásl ngur konká baraawose.

1 Yohana 5:10

Heé Garmoó Mungú gwa haratlintii', lamabu'uungwí gu kón baraawose. Heé Mungú gwa haratlintii'iiká, a Mungú guna lamusmo tleéhh, asma lamabu'uungwí Mungú Garmaawós nguwa lamabu'ún, gwa haratlintii'iiká.

Geehhoeemaá 14:10

heé adoorí difaáidár buhhtaá Mungú ga wah, tidá' taa baraá xooslmoó buhhtaawós i tleéhh, slám kaa aleedoogiiká nee ma'aay. Nee slám heé adoorí ku slahh'eemiis ar asla nee ar asltadá' xaraasl ar kiberiíti dír geeraá malaykeedá' hhohhó' wa ale, nee dír geeraá Deelmoó bee/i.

Geehhoeemaá 19:20

Makiito'oodá' kari óh dinkwa nee aarusmooduú lama. Aarusmoowí a kudá' tlehhema'aá waa/oo/amo gaa tlehhiit geeraá makiito'oodá' wa ale. Nee slám inós muu guna al/agín ar tlehhemi'iiwós kudá'. Múk taa al/aáy a kudá' layár makiito'o gaa ilaoh nee oo murslaaqatuú makiito'oodá' gwa i tumbarara'aat. Kuká' tsaraawo kiri slafi kwaáhh baraá tlawtadá' asla iwa ohahiin ar kiberiíti.

Geehhoeemaá 2:11

«Heé iaá koóm, axweesantí ngi axaasi, tí Qeeru i kaahi dír múk kríshaanáy, «Heé arba/ati ga sláw, inós ku slahh'eesiiká nee gwa'araadár tsár.»

Geehhoeemaá 2:2

Aníng kángw tlehhemi'iiwók u xuú', nee daawitimeerók nee qiqtliingók. Nee slám a xuú' adór múk tlákw sa qiqtliingo kur aleesleeraaká. Slám mukdá' ugwa iiát, kudá' káh, inooín a ya/abuuse, ala laatí a ya/abuuseerooká, kiri tsáhh adór tar lamuuse.

Geehhoeemaá 21:27

Ala gár slasla/aar ar baraadá' i dah i káhh. Nee slám heé muruú slasla/arén tlehhahhiít, nee heé lamusmoowo i dahiaaká baraadae. Ala múk baraadá' i dáh, a kudá' kilós umer'ín taa gooín baraá kitaábuuduú slafiingw oo Deelmoó bee/i.

Geehhoeemaá 22:15

Amór tsee/aá gixsaro seeaawe i deer, nee da/aluuse, nee fuquuse, nee tsu/utuuse nee kuduú munguaá hatlá' haratlintaatií', nee mukdá' sleémeero axweesanoó lama gwa intsaahh axweesanto.

Geehhoeemaá 9:17

Baraá iigu'utueene faras nee mukdá' gwaa i tsa/ani una ár. Mukdá' gawaá farás i dirií' gaambuín awa da/eewe ki da/aten adór asltá wa ale, slám ki sirbo/, nee slám ki tsee/atayen. Sagér farásuudá' a adór sagér direeri, nee baraá afer'ine gár ti'imiit a asla nee quui nee asltá xaraasl ar kiberiíti.

Geehhoeemaá 9:21

Mukwí tsu/utar'ín sleeme gaa hhu'u'uniká, nee da/ari'ín kudá', nee tsaatu'uumar'ín nee fiisor'ín sleeme.

HAR'OHUUSE 7:3

Tláw muu ádbaweek, ‹Bar heé daimiít i deer, miwa daqáy, i watli amór do'ós.› » Gideoni muu guri iiár, múk kume mibeeri tsár nee tsár tari waátl, múk kume mibaangw iri didií meét.