ESEKIELI 17:23 - Biblía Axweesantá Hhohho' ar Mungú 2004

²³ Eeít, aníng a haátl gawaá ságw tloomár tleer ar múk Israeli, as /ayo nee mamu ngiwa laqwal. Inós tay xa'anoó hhoohhoó' oo sahhti, tsir/ór kal'aá yaariir iri mahheetús baraá gamnaangós wa alé, slám mari ngiri tleehhiyá' gawaá haleemaawós.

ESEKIELI 17:23 Iomraidhean Croise

IIMU/UUNGW 49:10

Yúda, hhartá waawuti'iima i baloó qutlaaká diroge, nee xwaylarók deelo sleémeero in waawuti'iín, ay dír heé waawuti'iima loó' nay hardihi, kudá' xoordu ni ilaiwawa/iya'.

WARA'AMI 80:8

Sabiíbuú Misrír daáhh nguna húp, xoordu kiri gús kway dahás.

DAA'AANGW 5:15

Ya'aawós a adór uheemaá alabásta, kudá' taa foól baraá iihhafiirír sahaábu, slaqsaywós a adór Lebanoni, ki gawden adór xaa'aá sahhta.

ISAYA 2:2

Adoorí an adór deelór alhhe'eesaywo tleehharuut. Tloomár Doó AAKOÓ MUNGÚ ka gawdees tlom'i sleémeero ba/a, nee kari gáwtí tlees tlom'aá hatlá' ba/a, nee xoordu sleémeero ngiri i daqayá'.

ISAYA 27:6

De'emaá hi'iita'a xwaylár Yakobo dee/ár gu síhh, múk Israeli iri /ayuus, nee iri harmaa/, mamuuín yaamu sleémeero ngiri niiqiyá'.

ISAYA 49:18

Axáy bihhe i qaytaak nee ka aandá' gár tleehharumiit. Inooín sleémeero taa burumburiyé' i baraawók i watliyá'. Anuú AAKOÓ MUNGÚ a kah, adoodá' aníng nir hotaatima, mukók sleémeero un adór kwasluú wa dahás, mukók u saqwalaalá/ adór dasír duuxór aw kwasluwós ngir saqwal/aa/at.

YEREMIA 31:12

Nin hardihiyá' ar afór daa'aangw gawaá tloomár Siyoni. Nee hhooeemaaeé' kin saqwalalaa/, anuú AAKOÓ MUNGÚ. Hhooeemaaeé' kudaá balaangw nee difaái nee di/i, tidá' ni hanmaamiis, nee bee/aangw nee hikwa. Inooín an adór asalmoó taa eemamiís ar ma'aay, inooín gár kiwa /aár i káhh.

ESEKIELI 20:40

Asma aníng gawaá tloomar'eé' tidá' hhoohhooe, tidá' tleraantleer ar yaamaá Israeli, aníng Aakoó MUNGÚ a kah, Kuungá' sleémeero awa múk Israeli in didá' wa sagadiyusá'. Amoodaádae aníng kuungá' nu ilaaóh, nee nuri daám iwa ilahhooár i huba', nee ilahhooár hhohho' tidá' taa tsawdé'.

ESEKIELI 31:6

Tsir/o sleémeero ar gawaá doori maray'ín giri gawaá haleemiiwós i tléhh. Makaay sleémeero niri laqwaaliyé' baraá guruuwós i alé, xoorduudá' sleémeero kudá' uren tari hungu/umiís bara mahhtirós.

ESEKIELI 36:8

Ala gawaá tlom'aá yaamaá Israeliwo xaai haleemi ngi duuxiyá', nee mamu ngi laqwaaliyá' as muk'eé' oo Israeli, asma inooín deeloorí tseewe ta kii/ ayaaín.

ESEKIELI 40:2

Naagáy qoomár niwa baraá iigu'utií dirii', AAKOÓ MUNGÚ ina ar tláy ay baraá yaamaá Israeli, iri tsa/aás gawaá tloomár ló'wa tleer, nee bihhaá basko gár adór maraá baraá gixsa nina lak geehhoouyé'.

DANIELI 4:8

Alhhe'eesaywo Danieli niri hardáh, kudá' sleeme ta umuú Belteshasár ateetin, umuú Munguueé'. Inós qeeruú munguaá hhohho' gu koóm baraawose, aníng tlataaeé' ngiri alki/iít, una báw,

DANIELI 4:9

Aá Belteshasa, kuúnguduú qwaslaarmoó úr dír qwasleeriwo. Aníng a xuú' adór qeeruú munguiidá' hhohho' ir baraawók, nee a xuú' adór naaqór ta waagwetká ir káhh. Gaarí an tlataaeé', kuúng dir'eénií waagweerang.

HOSEA 14:7

Inooín ni ki/iyá' niri iwitiyá' baraá mahhtír'eé', niri slu/ubibiná' adór angaánoó baraá qaymo, niri /ayuusiyá' adór sabiíbuú wa ale, mooyangw'ín tari adór kuduú difaáír Lebanoni.

HOSEA 14:8

Aá múk Israeli, gár slaqsi'iisíng kis sla'a? Aníng firorhúng ngin mu/aywatsatsiím nee nun amohhe'emaamiís. Aníng a adór xa'anoó mahhtírhúng oo ta bay beroshi, kudá' qaantsaár daqisleém. Kuungá' mamuuhúng in dir'eé' wa sleerá'.

MIKA 4:1

Ala qoomár alhhe'eesáy birna xeér, tloomadá' taa Doó AAKOÓ MUNGÚ i tleéhh, ka gawdees, nee kari gáwtí tleerees ta tlom'aá hatlá' sleémeero. Xoordaá amoodá' kakaawá' hhay i tsatitiiká.

Matayo 13:32

Nee ilmoodá' ku ló'wa niiná ta dahaasíngw hatlá' sleémeerowo. Ala binda ti'iít, ku ló'wa úr xaa'aá mamu sleémeero ba/a, iri xa'aanoó úr tleehhiit. Tam tsir/o iri hardát, maray'ín giri gawaá haleemiidí tlehhít.»

Marko 4:32

Ala burkwa dahaás in uráy, iri kiintuú úr tleehhiit oo xaa'aá gauuwós sleémeero gi baá/. Haleemaá uren gay tleehh, tam tsir/o maray'ín giri baraá mahhatírósí tlehhít.»

Luka 13:19

Gár kara slaqamís a ilmoó xa'anooko ta bay haradaáli. Hee guna dahaás baraá qaymoorós. Niri ti'iít, iri xa'anoó úr tleehhiít, tsir/o maray'ín giri gawaá haleemiiwós i tlehhít.»

Yohana 12:24

Án a kah, ilmoó angaáno bira huuiiká baraá hhapér i alé, iri gwaa', aqo in hootatín adoodá' i dirii'i kilós alé. Ala bira gwaá', mamaá yaariir gin laqwaal.

Galatia 3:28

Ala daxta gár dimbé i káhh dír heé Yahudi nee heé Yunaniro. Laqaá tam dír heé lawaalmo nee heé lawaalmowooká. Nee slám gár dimbé i káhh sleeme dír hhawaata nee /ameeniro, asma kuungá' sleémeero a adór heé wák baraá Kristo Yesuwo.

Kolosai 3:11

Ala baraá slafingwí /abene, barqaanti i káhh dír heé Yahudiro nee heé Yunaniro, laqaá dír heé taa al/uútl nee heé taa al/uutliiká, laqaá hoomo, laqaá heé iimiboó/, laqaá lawaalmo nee kuduú lawaalmoowooká. Ala Kristo inós a mura' sleémeero nee i baraá muu sleémeero.

Geehhoeemaá 11:15

Malaykamoó faanqw tarumbeéta gari ufaáhh. Afór yaariir iri gawaá doorí wa ilawáts, iri ó', «Waawuti'iimár baraá yaamu daxta ar Aakoorén nee Kristowós. Nee inós a waawutmo ay alhhe'eesay wasle.»