Ebrania 9:4 - Biblía Axweesantá Hhohho' ar Mungú 2004

⁴ Baraadae kitángw ilahhooa i deer oo taa tleéhh ar sahaábu. Kitaangwí kun ilahhooár mooyángw tsuú í da/aa/an. Gár hatlá' baraadane a sandakmooduú alqado, oo taa ninkiriíts ar sahaábu umuúqo barto. Muruú baraá sandakmoowí a sirwír taa tleéhh ar sahaábu, tidá' muruudá' ta babay maána gu koom, nee hhartá Aroni, tidá' naa harma/, nee tlaa/eedá' tsár awa taa axweesantá alqadór i gooín.

Ya/abtór hho' 1977

⁴ Baraadane meésa i deer ar taa tleéhh ar miisli. Meésaarí gadiyeérós a kan ilahhooár i qamaamín ar muruú xarángw tsuú' koóm kuwa da/a/an. Gár hatlá' baraadane a sandakmooduú alqado, oo taa tuntuúk ar miisli umuúqo barto. Muruú baraá sandakmoowihe dáw, an sirwír miisli, tidá' muruudá' ta babay maána ga koom, nee hhartá Haruni, tidá' naa harma/, nee tlaa/eedá' tsár awa taa axweesantá alqadór i gooín.

Ebrania 9:4 Iomraidhean Croise

1 WAAWITÁ 7:50

Slooqi'i nee makasoó taámbay tlaqa nee búklayduú mooyango nee hhaansa'aá asla taatahhaango, sleémeero gár kira tleéhh a sahaábuú hhohhó', nee nahhtá taa tleéhh ar sahaábu ar afér maandár baraá guruú do', didá' ak hhoohhoo', nee afkú dahmuú baraá matla/ángw Doó AAKOÓ MUNGÚ, nahha sleémeero ar sahaábu.

1 WAAWITÁ 8:21

Nee aníng dii aga tsaát ar sandakmoó alqado kwi qaasi, kudá' alqadór AAKOÓ MUNGÚ koóm, kudá' aa oó' dír baabi'iirén qoomár ngiwa baraá yaamaá Misrír wa duúx.»

1 WAAWITÁ 8:9

Gár hatlá' ar baraá sandakmoodá' i káhh aqo tla/eedá' parereehhayen, kudá' Mose aa baraadí qaás amór Horebu wa alé, didá' AAKOÓ MUNGÚ múk Israeli nguwa alqadoorós i oó', qoomár inooín niwa baraá yaamaá Misrír wa ti'iitiyé'.

2 QOM'I 5:10

Gár baraá sandakmoó alqadórí dirii' ar hatlá' i káhh aqo har tlaa/eedá' tsár parereehhayen, kudá' Mose aa qaás, qoomár tawa dír tloomár Horebu i dirii'i, didá' AAKOÓ MUNGÚ alqado ngiwa oó' dír múk Israeli, qoomár tawa Misrír wa ti'iít.

TI'INAANGW 26:33

Kuúng inqwaaridá' do' gu tla/a qasiis ka tareeré' gawaá muqslaadá' afe mogól, daqaní sandakmooduú alqado ku alaá inqwaaridá' i báts. Inqwaaridá' kana qaás as didá' ak Hhoohhoo' ngiwa qasis nee didá' Hhoohhoo'.

TI'INAANGW 31:18

Qoomár Mungú axweesantá dír Mose ngiwa hhe'eés gawaá tloomár Sinairo, Mose guri tlaa/eedá' tsáp awa parereehhayénií haniís, kudá' Mungú aa hara'ayaarós i gooín ar dakós oo kilá'.

TI'INAANGW 32:15

Naagáy Mose iri harawarqáy iri gawaá tloomár wa aweér, tlaa/e parereehhayen tsaraawo, kudá' hara'ayár koomá', gi kón dabaawose kaa gooín bihhe tsaraawo.

TI'INAANGW 34:29

Nee qoomár Mose niwa gawaá tloomár Sinaír wa aweér, gawaá dakose i parhheemoodá' tsár awa tlaa/aá kón, kudá' hara'ayár Mungú koomá'. Qoomár Mose niwa awdiiti gaa xuiiká adór kaahartá gitsee/awós ir qwiirí/, asma adoodá' inós nee Mungú tawa axweemamiís.

TI'INAANGW 37:25

Kitángw ilahhooár mooyángw tsuú' kuwa da/aa/an guri tleéhh ar xa'anoó masqaryaandi. Tlenaangós badu sleémeero i alqoná', tlenaangós a sentimiíta mibeeri tsiyáhh nee kooán, tlenángw bihhe a sentimiíta mibeeri tsiyáhh nee kooán, nee tlenaangós oo gawa a sentimiíta mibeeri gwaleél. Xareemi a gár wák nee kitangwduú ilahhooa kay hanmiisi.

TI'INAANGW 39:35

nee sandakmoó alqado, nee xaa'aá kur loohisi, nee kitangwduú gurtleemuwo,

TI'INAANGW 40:3

Kuúng daqaní sandakmooduú alqado ku baraadií dahás, nee inqwaarír kur geehhaantes ka tareeré'.

TLAHHOÓ LAÁWI 16:12

Xooslmoó taa tleéhh ar tleei guri taataahh, guri gil'oodár gawaá kitángw ilahhooárí qaas, kuduú dír geeraá AAKOÓ MUNGÚ, nee tsa/a'aá tsár awa mooyángw taa xoosla hhe'eés. Inós ngiri huuw baraá guruú inqwaaridá' do' gwa tla/a qasis.

FAARO 17:10

AAKOÓ MUNGÚ Mose guri báy, «Hhartá Aroni ki/isek dír geeraá sandakmoó alqado. Hhartí ka didií batsi, as kahhó' tawa gurbua dír mukdá' dee/aanumiita nee as qununu/ay'ín iwa faaki daandueene. Bar adooriheeká inooín i qatliyá'.»

FAARO 17:5

Hhartá heé naa tsawaár in harmá/. Ar gawaá loohirihe qununu/oó múk Israeli daanduuhunge un faák.»

FAARO 17:8

Matlaatlér taa kayi, Mose iri dáh baraá heémár lamabu'uungw. Baraadae hhartá Aroni oo tlahhoó Laáwi, ina harmá/, nee iri /ayús nee mamu naa hamaariyé' awa xa'anoó taa bay loósi.

DABE 9:11

Alaá deeloodá' mibeeri tsiyáhh iwa waaráhh xweera nee tlatla/aangw AAKOÓ MUNGÚ parhheemaá tsár awa tlaa/e, kudaá taa alqadoórí gooín, ngiri haniís.

DABE 9:9

Qoomár aníng niwa tsa/ám gawaá tlooma, niwa tlaa/eedá' parereehhayen kudá' hara'ayár koomá' ngiwa leéhh dír Mungú, kudá' taa alqadoórí gooín, alqadoodá' AAKOÓ MUNGÚ aa tleéhh nee kuungá', aníng ana gawaá tloomár iwiwiít deelo deeloo mibeeri tsiyáhh xweera nee tlaatla/ango, aga /ayiimiiká tam gár naa wáh i káhh sleeme.

Geehhoeemaá 11:19

Aluuwo Doó Mungú, kudá' gawaá doorí dirií' kuri gweér, nee sandakmooduú alqadór Mungú iri geehhoúy baraá do'ós wa ale. Mankari iri werere'eliín, afo kari axaás, kwarara/a iri kwarará/, kunseeli niri ti'ít nee tluwoó yaariír oo tlaa/e iri tluúw.

Geehhoeemaá 8:3

Malaykamoó hatlá' niri hardáh iri sihhiít dír geeraá kitángw ilahhooa. Inós xooslmoó sahaábu gu kón oo muruudá' mooyángw tsuú' koóm ku i da/a/an ilahhooár wa ale. Muruudá' mooyángw tsuú' koóm oo yaariír kuri inós i haniís, as nguwa haragaasi dinkwa nee firór múk hhohhó' oo Mungú, gawaá kitángw ilahhooa, kuduú sahaábu. Kitaangwí i dír geeraá kitángw aleesleemu.