Ebrania 4:12 - Biblía Axweesantá Hhohho' ar Mungú 2004

¹² Asma axweesantá Mungú i sláf. Nee slám i /uuruú koón. Nee i xarásl ló'wa ale tam paángár afe tsár ga bá/. Axweesantá Mungú in dát baraá heé i alé, qeeru nee muuná giri parátl, tam fadu nee waeemoowós giri parátl sleeme. Nee slám axweesantá Mungú inslawoó hee gu sakwasleemút, nee umuúqo gár i slai baraá muunaáwose.

Ya/abtór hho' 1977

¹² Asma axweesantá Mungú i sláf. Nee slám i /uuruú koón. Nee i xarásl ló'wa ale tam paángár afe tsár ga bá/. Axweesantá Mungú i dát baraá heé i alé, qeeru nee muuná giri parátl, tam fadu nee waeemoowós giri parátl sleeme. Nee slám axweesantá Mungú inslawoó hee gu sakwasleemút, nee umuúqo gár i slai baraá muunaáwose.

Ebrania 4:12 Iomraidhean Croise

WARA'AMI 110:2

AAKOÓ MUNGÚ hhartók ar aleesleemuú waawuti'iima ngi haniis Siyonír wa ale, iri ooi, «Waawuti'iím baraá wakuuseeroge!»

WARA'AMI 119:130

Alki/ituú muruudá' kuúng ta sla', gwa/aateema ngin huwahuuw, múk gár xuaaká gu xu'utimis.

WARA'AMI 139:2

Bar iwiwiít nee bar sihhimiít, kuúng aníng i xú'. Iinslaway'eé' ugwa tsáhh amór saáw wa ale.

WARA'AMI 149:6

Xirfuú úr oo Mungú masók i baraá afer'ín waa ti'imiit. Nee paángár xaraasl ar afe tsár masók i baraá dabaaín.

WARA'AMI 45:3

Lawaalaarók qaaseek gawaá suuma, kuúnguusuú ilakaahaár, xirif a kók nee uraywo!

AXWEESANOÓ SAGALOOA 5:4

Ala alhhe'eesaywo in qarqarút saaxí ba/a, i tlaaqaán adór paángár afe tsár.

DAHARUSMO 12:11

Axweesantá sagaloo' a adór hhartá de'eemusmo, nee adór kik'ár taa yaamií slaáhh, an adór axweesanoó taa burumburaarín oo de'eemusmoó wák.

ISAYA 11:4

Ala ar gan'amuuwo narkuute gan sakwasleemuut, inós kudá' tsaén awa yaamu gi kasi tsaat ar adór qoom, nee inós muu gu slaahh ar /aymuú afkós, tlakuuse gan tsuu/ ar hinsluú afkós.

ISAYA 49:2

Afkueé' guna ngwatstís adór kuquú paánga iri baraá mahhtuú dakós i luú/. Iri mahángw taa duúq tleéhh, iri luú/ baraá tlaangasirós.

ISAYA 55:11

An adoodá' axweesantá aa baraá afkueé' wa ti'it, asma iwa tawo ki/ká amor'eé' ale. Ala aqo tidá' ni slaa' gan boo/és, aqo tidá' kasa ya/aáw gan tléhh.

YEREMIA 17:10

Anuú AAKOÓ MUNGÚ inslawoó muu un tsee/ariím, nee munér muu an iiaraa'ár, as kahhó' umuúqo heewo nguwa buu' ar adoodá' ir hotaatin, nee adoodá' tlehhmi'iiwós i dirii'iya'.»

YEREMIA 23:29

Anuú AAKOÓ MUNGÚ a kah, ‹Axweesante'eé' a adór asla, a adór yuúnduú tlaa/e tsu/uta.›

Luka 8:11

Yesu giri báy, «Gídaabár slaqsaay a tí: Dahaasiingw a axweesantá Mungú.

Yohana 12:48

Hee bar aníng iga sií', nee bar axweesanay'eé' gwa ya/aniká, heewí heé gu sakwasleemuút i deer. Axweesantí hám naa axweés, gun sakwasleemút bál deelór alhhe'eesaywo.

Yohana 6:51

Aníng an mikaáteedá' slafíngw koom, tidá' naa awet gawaá doorí wa ale. Hee bar mikaáteerí ngaa /aáy, i slafaafín ay alhhe'eesay wasle. Nee mikaáteerí án ni haniis a slaqwte'eé' ar kilá', as muu slafiingw nguwa slay.»

Tlehhema'aá ya/Abuuse 2:37

/Aymi'iiká' kiwa axaamiís, muner'ín kari kwatiít ló'wa ale, Petro nee ya/abuusér hatlá' kay yaahamiís tari oó', «Hhaeerén atén adór ta laqaan?»

Tlehhema'aá ya/Abuuse 4:31

Mungú firooro kuwa hhe'eés, didaádá' tay burumburiít iri daaraxát, sleémeero tari haáts Qeeruú hhoohhoó' oo Munguhe. Axweesantá Mungú kari alki/iít ar pihh'uuma.

Tlehhema'aá ya/Abuuse 5:33

Inooín adoorí kawa axaás, mune giri farkiín, kiri tsu/utár wa slaá'.

Tlehhema'aá ya/Abuuse 7:38

Qoomár muu iwa burumburiít baraá xaanxaywo, Mose ina sihhiít tla/ángw bariiseerén nee malaykamo, kudá' aa axwees nee inós gawaá tloomár Sinaír wa ale. Inós axweesanoó slafiingw nguna ilaaóh, as nguwa atén i haniisi.

Rumi 1:16

Aníng Ya/abtór hho' a murér wa ara'araaká. Asma Ya/abtór hho' an /uuruú Mungú kudá' ba/amár huwahuúw dír umuúqo heé aa haratlintii'i, har geeraawo a dír heé Yahudi, nee tam dír heé Yunani sleeme.

1 Korinto 1:24

Ala dír mukdá' taa ateeti bar múk Yahudi laqaá múk Yunani, Kristo an /uuruú Mungú nee an sagalooár Mungú.

2 korinto 2:17

Asma atén axweesantá Mungú a halaanu'uumár ar tlehhiitanaaká as slaasláw kawa slawaan, adoodá' múk yaariír i tlehhaahhiiti. Ala atén axweesantá Mungú an alki/iitaán ar muunuú /awaák ar baraá Kristo, adór múk Mungú aa ya/aáw nee oo geeraawósí sihhiít.

2 korinto 4:2

Atén tlehhemi'iidá' sleémeero awa getlakw nee awa murér koomá' iga mawaán. Al/ayma a tlehhiitanaaká, nee slám axweesantá Mungú a warqeemisanaaká. Ala atén tin kiloorén xu'utisaán dír umuúqo heewo, ar looeema kiwa alki/iitaan ar geehhooeema dír geeraá Munguhe.

Efeso 5:13

Umuúqo gaaro ar tinda huúw dír gwa/aateemaá i alé, adór i diri' ka geehhooees. Nee umuúqo gaaro ar ta i gwa/aát nee gwa/aateema, i warqeér tari gwa/aateema.

Efeso 5:26

Adoorí gana tleéhh as mukós nguwa hhoohhooeesi nee nguwa hamaatli ar ma'aay ar /uuruú axweesantós.

Efeso 6:17

Ba/ama oohaak sleeme, tawa kofiyár gawit ar ta ságw i qasa'. Nee paángár Qeeru oohaak, an axweesantá Mungú.

1 Tesalonike 2:13

Gár hatlá' ar Mungú kuwa sluufmiisaan daqisleém a tí. Qoomár atén Ya/abtór Mungú ngiwa dirhúng i alki/iitaán, kuungá' Ya/abtoodá' kari iiárií qasé', nee kari ilaoté'. Kawa ilaoté' a adór Ya/abtór heewooká ala ar Mungú. Ala ar ló' a ar Mungú. Nee inós an kudá' gadiyér tleéhh baraahúng wa aleeró, kuungaásingá' aga haratlintie'.

1 Tesalonike 5:23

Mungú inósuú kilá', kudá' atén ti waydií hanimiís, inós kuungá' nu hhoohhooeesi kángw kilá' wa ale. Nee slám inós munerhúng nee qeeremoohúng nee slaqoohúng ngi xun as gár tlaakw munduwa sleér, ala kuungá' masók a múk xaslxaansli wásl ay bál Aakoorén Yesu Kristo nay hardihi.

Ebrania 13:7

Kuungá' geeraharuuserhúng inslawaak, tidá' axweesantá Mungú ngaa dirhúng i alki/it. Slafingw'ín kuungá' inslawaak adór inooín tara hoót, nee adór tara qaátl, haratlintaaor'ín na eeharaak.

Ebrania 6:5

axweesantá Mungú kari tsaáq adór kar hhoó', nee /uuruú yaamuudá' xaawá' kuri tsaáq.

Yakobo 1:18

Gawaá sla'aarirose inós atén tina laqwaál ar axweesantá looeema. Adoorí gana tleéhh as atén tawa adór bu'uungós tleehhitaan, kudá' aa giirin, baraá muruuwós kudá' sleémeero aa tleehhi.

1 Petro 1:23

Asma kuungá' tunda laqwaál sagaáwa tsare, ar xwaylár slaqwtooká, ala ar xwaylár qeeru. Xwaylarí ina tleehharút ar /uuruú axweesantá Mungú, tidá' slafíngw koom, nee slám i hotaatiín ay alhhe'eesay wasle.

Geehhoeemaá 1:16

Nee baraá dakós oo doó /iyayhe i tsatse/uú faánqw kón, nee paángár afa xaraasl badu tsaraawo i baraá afkós wa ti'iimít. Slám gitsee/aawós i gwa/aatiyá' adór tsee/amuú qoomár siiree/i.

Geehhoeemaá 19:15

Nee paángár xaraasl i baraá afkós wa ti'imít, as inós múk xoordu nguwa darahhi ar paángadá'. Inós inooín gi sawaawuti'ín ar hhartá muqsli. Nee inós bohongwduú mamaá sabiíbu kiwa tsoo/iti gu kala/án, kuduú buhhtaá Munguú Aleesleemusmo.

Geehhoeemaá 19:21

Nee mukdá' aa meet kuri tsuú/ ar paángár kudá' aa iwiit gawaá daanduú faraási. Paángarí dír i dahh a baraá afkós. Nee tsir/o sleémeero iri áx fu'unay'ine.

Geehhoeemaá 2:16

Gawaá adoorihe, hhu'u'uúm. Nee bar hhu'u'uundaaká, aníng ni gaanslár hardáh amoorók, nee aníng niri slaáqw nee inooín ar paángár gawaá afkueé' daahh.

Geehhoeemaá 2:23

Nee aníng na/iiwós i faák tsu/utaaro. Nee múk kríshaanáy sleémeero gari xuu' adór aníng tar kudá' munér muu ga tsee/ariím nee inslawaywo. Nee aníng umuúqo heewo baraahunge un buú' ar adoodá' inós wa hariím as tlehhemi'iiwós kudá' aa tlehhiít.

Geehhoeemaá 20:4

Aluudae kiteeraá aleesleemu ngiri ár, nee muu gaa i iwiít. Mukwí kwaa aleesleemuú i haniís oo sakwasleema kawa tleehhi. Nee slám qeereemo ngiri ár awa mukdá' taa sagetlaáq as Yesu kuwa lamabu'ún nee as axweesantá Mungú. Mukwí an kudá' makiito'oodá' gaa i tumbarara'atiiká, nee murslaaqatuuwós kudae, nee slám layaadá' kaa ya/anká gawaá gitsee/er'ine, laqaá tam baraá daber'ine. Mukwí iri slafíngwií kií/, tari waawuti'ii'ín dinkwa nee Kristo kureeri kumuú wák.

HAR'OHUUSE 3:16

Ehudi paángár afe tsár gana tleéhh, tlenaango a sentimiíta mibeeri kooán, gari tseék baraá afetloowós, bihhaá doó /iyáy, baraá guruú tlabaawós.