DANIELI 7:20 - Biblía Axweesantá Hhohho' ar Mungú 2004

²⁰ Aníng sleeme ana slaá' kángw niiná kunguwa alki/iiti daanduú xareemidaá mibaango, daanduú xarmoó naa aluúwaá ti'iit, slám dír nira ti'iitiká xareemaá tám nina tu/umitiyé'. Xarmoodá' ilaá koóm nee afko, kuduú axweesanoó daara/aangw gwa axwees, nee handá' ku ak úr dír xareemaá hatlae.

DANIELI 7:20 Iomraidhean Croise

DANIELI 7:11

«Qoomaadár kilá' niwa xumiis as /aymi'iidaá daara/aangw awa xarmoodá' niina i kaahi, hamtidár kilá' makiito'oodár tsiyáhh kari gaás, kari hhitín, nee kari daá/ baraá asla.

DANIELI 7:19

«Aluuwo aníng ana ló'wa slaá' daanduú makiito'oodár tsiyáhh nguwa axaás, tidár hatlá' dír makaá hatlae, tidár waa/oo/amo nee dae tlaaq, tidá' sihhnaawós handá' a muqsla nee fuqeeniwós a muqslír sirdaa/aat. Sihhnaaká' ginar /ayiín nee ginar feehhamís, muruudá' aa meetís gun yaamií kal/aán ar tsa/aá ya'aawós.

DANIELI 7:21

«Qoomár ngiwa adoorí wa ga/aw, xarmoodá' nee mukdá' hhohhó' oo Mungú tina muxiyé', inós mukdá' guri baál.

DANIELI 7:23

«Inós aníng iri báy, ‹Makiito'oodár tsiyáhh a waawuti'iimár tsiyáhh, ar ti'iit gawaá daanduú yaamuwo. Waawiti'iimarí a dimbé nee waawuti'iimár hatlá', inós yaamu sleémeero gi qwaarés. Inós yaamu gi kal/aán giri feehhamís.

DANIELI 7:7

«Alaá tihe baraá iigu'utueene naxés makiito'ór tsiyáhh ngiri ár, a makiito'ór waa/oo/amo nee ar dae tlaaq, ar ló'wa /uuruú koom. Makiito'oorí sihhnaá diren awa muqsla gi koón, awa ir /ayiin. Nee fu'unaydá' naa meetiyé' giri feehhamís, giri yaamú i kal/aán ar tsa/aá ya'aawós. Inós a slaqmiseeká nee makaydaá hatlá' tám naa geerií ár, inós xareemi ngi koon a mibaangw.

DANIELI 7:8

Qoomár niwa xareemiwós aldakuut, naxés xarmoó wák oo niiná i ti'imiit baraá tla/ángw xareemidá' mibángw wa alé. As xarmoodá' pa/aangw nguwa slay xareemidá' awa tám kina dee/aruuín altu/ún. Ilaá makiito'oodá' a adór kuqaá hee, nee afkose /ayma'aá taqanaa/i ginar axwés.»

Geehhoeemaá 12:3

Layár hatlá' iri geehhouúr gawaá doorí wa ale. Layaarí a dayshamoó yangaariír oo daa/aát. Dayshamoowí sage ngi kon a faanqw nee xareemi a mibaangw. Nee gawaá sageerose gár i kon a slam'aá faanqw.