DANIELI 3:1 - Biblía Axweesantá Hhohho' ar Mungú 2004

¹ Waawutmo Nebukadnesa murslaaqatuú yangaariír guna tleéhh oo sahaábu, tlenaangós a miíta mibeeri tsár nee dakaát. Uroó bihheero a miíta tám, guri sihhtís baraá tlapár Dura ar baraá yaamaá Babuloni.

DANIELI 3:1 Iomraidhean Croise

1 WAAWITÁ 12:28

Alaá waawutmo kaangwí nguwa gurií axweemaamiís, slaqsa'aá tsár giri tleéhh ar sahaábu. Muu guri báy, «Kuungá' awa múk Israeli, qaytsité', munguihúng kudaá na baraá yaamaá Misrír wa duuxiye' a kuká'. Gimsé' gár tas Yerusalemúr kakeera' i káhh.»

ESTA 1:1

Waawutmo Ahasuero ayeemo ngaa sawaawuti'ín a tsiiru nee mibeeri tsár nee faanqw iimír Indiár wa tleemu ay yaamaá Kushi.

WARA'AMI 135:15

Munguaá xoordu kina tleéhh ar peésa nee sahaábu, inooín a gadiyér dabaá muu.

TI'INAANGW 20:23

Slaqsi'iidaá munguaá hatlá' awa taa tleéhh ar peésa nee sahaábuwo mi koomara' dinkwa nee aníng.

TI'INAANGW 32:31

Naagáy Mose iri kií/ amór AAKOÓ MUNGÚ, iri oó', «Aga gurhaamuút! Mukwí tlakweemaá ur gaa tleéhh, taa kilooín munguú sahaábu i tleehhiyé'.

ISAYA 2:20

Baalaadae umuúqo heewo munguiiwós kudaá murslaaqat gi kwaahh, amór kuti nee hhampararama', kuduú peésa nee oo sahaábuwo. Kudaádá' naa tleehhiyé', as nguwa sluufmisiya'.

ISAYA 30:22

Kuungá' munguiihúng kudaá murslaaqat kudá' taa qaaliindé' ar peésa, nee kudá' taa qaaliindé' ar sahaábu kuri siá', kuri amór saáwí kwahhá' adór gár ta waki, kuri beera', «Tsumumu'uút.»

ISAYA 46:6

Mukdaádá' sahaábuú duxuúm baraá tlakw'ii'ín wa alé peésa ngiri qoomeemeesiyá' ar kílo. Heedaáduú sahaábuú kwahhuút nguri buiyé' ar peésa, as slaqsa'aá mungui ngiwa tleehh. Naagáy kiri i tumbarara'aamiit kiri sluufmiis.

YEREMIA 10:9

Slaqsi'ii'ín kuká' kina parootuús ar peésár Tarshishír daahh, kina parootuús ar sahaábuú Ufasír daáhh. Gaarí an gadiyér kareeruú kwahho ga xuú', nee múk sahaábuú kwahhuút. Kaa tlabaá sirbó/ií dahaás nee awa sirda/aten, kudá' taa tleéhh ar daba'.

YEREMIA 16:20

Xáy, hee tiwa munguúwós i tleehh gaqo aleesláya? Aasla'áy, ala barnaxes gwa tleéhh, a munguú loeeká.»

DANIELI 2:48

Aluuwo waawutmo Danieli guri xirfayeés, guri muruú yaariír i haniís, guri waawuti'iimár yaamaá Babulonírí haniís. Guri geeraharusmoó hara'ayuuse sleémeero ar waawutmoó wa qaás.

DANIELI 2:49

Slám Danieli waawutmo guri firín as Shadraki, nee Meshaki, nee Abednego kiwa uráy haniisi baraá yaamaá Babuloniro. Ala Danieli ina meét dír bihhaá waawutmo.

DANIELI 3:14

Nebukadnesa iri oó', «Aá Shadraki nee Meshaki nee Abednego, xaysé', axweesantí tawa kaahi murslaaqatuueé' kuduú sahaábu naa sihhtís ugwa ilaiwaa/i'iiká nee ugwa sluufisi'iiká ar lóe?

DANIELI 3:30

Aluuwo waawutmo ín Shadraki nee Meshaki nee Abednego giri uráy haniís baraá yaamaá Babuloniro.

DANIELI 5:23

Tam muruuwí sleémeero ugwa xui. Ala kuúng kitángw Aakoó doori kuwa xirfayes, kuúng tina kilók urés, xooslaá Doó Mungú kiri léhh kiri difaáirár xúf, kuúng nee bariiseroge nee tlaawaywoge nee /ameenarók tidá' quturmo wasle. Kuúng munguaá taa tléhh ar peésa nee sahaábu nee muqslír sirdaa/aat, nee muqsli, nee xaai nee tlaa/e kiri xirfayemiís, munguaá xumisa'aaká, nee i axamisi'aaká laqaá gár i xuiya' i káhh. Ala Munguúdá' slafiingók gu taami koóm nee kudá' lohduuwók gi xuú', ugwa ilaiwa/amér i tlehhká.

DANIELI 5:4

Difaái ngina xufiyé' amooqae i munguaá hatlá' xirfayemisiyá', kudá' taa tleéhh ar sahaábu nee peésa nee ar muqslár sirda/aten, nee muqsla nee xaai nee tlaa/e.

HOSEA 2:8

Asma inós gaa xuiká adór aníng ngira balaángwí i hanmiís nee difaáiro nee di/to, nee aníng inós ana tsuúq ngay peésa nee sahaábu yaariírí haniís, kudá' aa húp dír Ba'ali.

HOSEA 8:4

Waawitaáín nguwa tsawaariyé' ala aníng iga yaahasi'iiká, múk urén ngwaa qaminé', ala aníng u xuaaká. Munguúín nguna tleehhiyé' ar peésa nee sahaábu as kahhó' niwa hhana'.

HABAKUKI 2:19

Tsaxwaawós heedaadá' xa'anoó babáw, ‹Tlawáng›, laqaá kudá' tlaa/ár afaa wasl ga babáw, ‹Sihhiitáng›. Xay, muruusíng kuúng u intsaahhatísi? Qaytsiít, kwaa sliík ar sahaábu nee ar muqslár peésa, ala i hiinsluú kon'aaká baraaine.»

Tlehhema'aá ya/Abuuse 17:29

Ala atén barnaxes a na/aá Mungú, a hariímarooká atén tawa kaahaan Mungú a slaqás nee sahaábu, laqaá peésa, laqaá tlaa/ano. Asma muruuwí a muruú taa tleéhh ar aleesleemuú muu nee sagalooa.

Tlehhema'aá ya/Abuuse 19:26

Kuungá' aga aandé' nee aga axasé' adór heewí ta bay Paulo i tlehhiiti. I kaahi, ‹Munguaá ta tlehhiiti ar dabaá muu a munguiwooká.› Inós múk yaariír gwa harakeemiís guri warqeés, ala a diirír gixsár Efeso kiloseeká, ala tam baraá yaamaá Asia sleémeero.

DABE 7:25

Slaqsi'ii'ín kudá' taa dakuút awa mungui, da/aak. Peésaadá' kira tleéhh, nee sahaábuwo, mi ilatleeruusara', laqaá muruuín kwí mu ar tlawaara' as tawa koohúng. Adoorí bara tlehhé' a tsaaxweeli dirhunge, nee AAKOÓ MUNGÚ, Munguúhúng ga waak.

Geehhoeemaá 9:20

Nee múk aa meet, oo taa tsu/iiká ar muxtaarí, gadiyeédár dabaaín kaa hhu'u'unká, neetlaame kaa mayká sluufmisuuwo, nee munguaá muqslaaqatuuwo, kudá' taa tleéhh ar sahaábu nee ar peésa nee ar muqsla nee ar tlaa/e nee xaai. Munguiiká' i xumisiiaaká nee i axamisiiaaká, slám i hi'iimitiiaaká.