DANIELI 12:10 - Biblía Axweesantá Hhohho' ar Mungú 2004

¹⁰ Múk yaariír slasla/aruín ku hingees, ki hhohhoees nee kin hamaatl. Ala múk tlákw tan kumiit tlakweema tlehhtuuwo. Tam heé wák i kaahh dír múk tlakwe oo gaarí ga tsaahh. Ala múk sagalooár koóm an múk adoorí ga tsaáhh.

DANIELI 12:10 Iomraidhean Croise

WARA'AMI 107:43

Múk sagalooár koóm muruuwí ku alqaytsiti, nee kawa tsaahhi sla'aarír warqawaaká ar AAKOÓ MUNGÚ.

WARA'AMI 51:7

Hhoohhoeesáng ar hisoópo, aníng daqaní ti hhoohhoó', hamaatláng, aníng daqaní ti /awaák adór tla/aá tluwaay.

AXWEESANOÓ SAGALOOA 1:5

Heé sagalooár koóm ngi axaasi, nee nguwa sagalooár i dok, nee oo xu'utír koóm iwa hardihi dír gurbu'utá gu fuqurángw i haniis.

ISAYA 1:18

AAKO i kaahi, «Qwalaasé' hamí aníng nee kuungá' a axweesaán, tlakweemaahúng tim da/atatuyá' adór inqwaarír daa/aát wá ale, nin /awkukuyá' adór tlaa/aá tluwaay, tim da/atatuyá' adór tseere, nin /awkukuyá' adór se'éngw bee/ángw /awák.

ESEKIELI 36:25

Aníng kuungá' nun ma'áy tsiririxiís, ma'aá hhohho', nee tari hhoohhoaaeerá' baraá slasla/aruhúng kudae, nee dír slasla/aruú slaqsi'iihúng kudaá mungui sleémeerowo.

ESEKIELI 47:11

Ala wa/angwdá' oo niíts nee tlahhesoowo awa bihhaá tlawi, ma'aá tsuuá' ngi slay'aaká, ala ma'ay'ín in meetiyá' tawa ma'aá diwi.

DANIELI 11:33

Múk sagalooár koóm múk yaariír ku intsaahhatis. Tam adoorihe inooín ki tsuu/ ar paánga nee ar asla deelór hhaawakahe, kiri haasaáng wa ar tláy nee daqaari'iimar'ín kari hayóh.

DANIELI 11:35

Muu bahh'ale kuduú sagalooár koóm ku tsuu/ as inooín kiwa hhoohhooeesi, nee kiwa hamaatli ay qoomár alhhe'eesaay, asma alhhe'eesaay hamí aa xayká.

DANIELI 12:3

Mukdá' sagalooár koóm ta gwa/aat adór doori, nee kudá' muu ngwa geerahariye' baraá hotaá ganaa'á' i suwaahamitiyá' adór tsatse/ ay alhhe'eesay wasle.

HOSEA 14:9

Heé sagaloó' muruuwí ngu tsaahhi. Heé daharuú koóm muruuwí ngu xui. Asma lohdaá AAKOÓ MUNGÚ i ganaaiyá', nee múk ganaá' lohuudá' gin eehar. Ala múk tlákw in dukuuts baraadae.

SEKARIA 13:9

Aníng daqtadár tám ngiri waarahhaás ar baraá asla, aníng in kwahhuút ngiri hhohhoeés adór peésa kar kwahhuumaamiti, aníng i iiár adór sahaábu kur iiara'ari. Umuueé' nguri ateetiyá', án ngiri axaás, aníng niri oo', ‹Mukwí an kwe'eé'› Inooín niri ooiya' ‹AAKOÓ MUNGÚ an Munguúrén.› Anuú AAKOÓ MUNGÚ tí ngina oó'.»

MALAKI 3:3

Inós in iwiit adór heé peésár kwahhuút ar asla as ngiwa hhohhoeemisi. Inós kaahamuusér Mungú gan hhoohhooees, gan hhoohhooees adór sahaábu nee peésa kir hhohhoeemamisi, ay dír inooín AAKOÓ MUNGÚ ngway ilahhooárií haniisiyá' ar loohír ganaa'.

Marko 4:11

Yesu giri báy, «Kuungá' naaqór waawuti'iimár Mungú aga xué', ala dír mukduú hatlá' oo tsee/aawo kan kah ar slaqsi'i,

Luka 24:25

Yesu giri báy, «Kuungá' a tsuwa daktana. Kuungá' tundu tsuwa har gawdén mura' haratlintaaooro, kudá' sleémeero tinda alki/iít nee aaruuse.

Yohana 18:37

Pilato guri yaahaás, «Ala kuúng a waawutmoówoóke?» Yesu guri báy, «Kuúng an kát adór aníng tar waawutmo. Aníng gár tisa laqwaál nee gár nisa hardáh baraaká' yaamií alé, a tí kilós, ‹Kángw looeema nguwa kah. Umuúqo heewo oo bartá looeema, axweesante'eé' ga axamiis.› »

Yohana 7:17

Hee barnaxes sla'aarír kudá' aníng iga ya/aaw gaa ya/án tleehhamooro, kángw intsaahhastadá' daqaní gu tsaahh, áx amór i dahh a amór Mungúhe, laqaá án kilooeé' an axweés.

Yohana 8:47

Heé Mungú axweesantá Mungú gaa iiárií qamín. Ala kuungá' a axamisa'aaká, asma kuungá' a múk Munguheeká.»

1 Korinto 6:11

Baraá tla/angwhunge bahh'alé aáng a múk adór kwí. Ala kuungá' tunda hamaátl, tunda hhoohhooeés, tunda gan'amí harafaár ar umuú Aakoorén Yesu Kristo nee ar /uuruú Qeeruú Munguúrén.

2 korinto 7:1

Sla'aaruuser'eé', al'axweesantí sleémeero a toorén. Gawaá adoorihe, atén ti kilootén hhoohhooeesaán baraá umuúqo slasla/aruú gawaá slaqwa nee oo baraá qeeruuwo. Nee tawa hootaan ar slafíngw ló'wa hhohhó', Mungú kuwa ilaiwawa/aan.

Tito 2:14

Inósuú kilá' slafiingós nguna haniís as daandeemoorén, as atén tiwa ba/amisi baraá tlakweema sleémeerowo, nee atén tiri múk hhohhó' tleehh, nee tawa mukós kudá' tlehhema'aá hhohho' ngi tlehhiitá' ar ilakaaharu.

Ebrania 12:10

Baabi'iirén awa slaqwa baraaká' yaamuwo atén tin muxaxiná' as slafingwí oo har qoomár niina. Slám tina muxiyé' ar har adoodá' inooín taa ár. Ala Mungú atén tin muux ar adoodá' atén ti gaa waa buu', asma inós gár i slai masók atén hhohhoaarirós tidá' an slawaán.

1 Petro 1:22

Kuungá' taa hhoohhooesé' asma looeema kiwa ilaiwawa/é', as tawa hota' ar sla'aarír hhaahhafiingw wasl dír hhaeewo. Gawaá adoorihe kuungá' ti ló'wa sla'aaslae' ar mune sleémeero.

1 Petro 1:7

Iiara'aduuwí gídaabárós i deer. A haratlintaaorhúng kan iiara'ar, xáda xáy haratlintaaorhúng tisíng ar lóe? Sahaábu a gár qwaar, tam ku iiari ar baraá asltadár sahaábu kur hhoohhooeemiis. Ala haratlintaaorhúng ka ló'wa afhhamít ta sahaábuwo. Asma haratlintaaorhúng bar kaa iiár, i hariín kawa diidi'iimiisi nee kawa xirfayeemisi nee kan ilaiwawaa/ qoomár Yesu Kristo burkwa geehhooés.

1 Yohana 5:20

Garmoó Mungú adór nira hardáh, atén a xuaán, nee inós fuquraangw ngwa haniís oo inósuuduú Munguú ló' kuwa xuaan. Nee atén a baraá inósuuduú ló' i diriiaán, as tawa baraá Garmaawós Yesu Kristo. Kwí an Munguú ló' nee slafíngw alhhe'eesay wásl.

Geehhoeemaá 16:11

Munguú gawaá doori kuri /ooslislín as slahh'amuuín kudá', nee as um'idá' ngaa ohine', slám tlehhemi'ii'ín kudá' kaa hhu'u'unká.

Geehhoeemaá 19:14

Nee boo/oó gawaá doorí dirií' guri eehár, taa tsa/án gawaá farsuú /awák. Inooín inqwaruú kaa i tsiitimiís a inqwaruudá' /awák taa tleéhh ar kitaánír hhohho'.

Geehhoeemaá 19:8

Nee slám Mungú dasidá' gaa aleesleemií haniís kawa tsiitisi ar inqwaruú /awák oo taa tleéhh ar kitaánír hhohho'.» Inqwaruudá' /awák oo hhohhó' a tlehhemi'iidá' ganaa'á' awa múk hhohhó' oo Mungú.

Geehhoeemaá 22:11

Heé /aytusmo i kumiiti baraá /aytaarose. Heé slasla/aruú tlehhaahhiít i kumiiti baraá slasla/aruwose. Heé hota ganaá' i kumiiti baraá gan'amuuwo, nee heé hhoohhoó' i kumiiti tiwa hhoohhoeemisi.»

Geehhoeemaá 3:18

Gawaá adoorihe gár kuúng wa hariim a adoorí an tléhh, Sahaábuudá' taa hhoohhooeés ar asla dir'eé' tiwa tlaxw, as kuúng tawa daqaarmo tleehhit, nee tlabaadá' /awak kiwa tlaxw, nee kiwa dahas, as /aankwetsuuwók kudá' murér koóm mukuwa ara'ár. Nee slám maasáy na tlaxweek, ilaawók kiri slík, as kuúng tawa xumis.

1 SAMUELI 24:13

Adoodá' múk bál qaro ngira oó', tawa kaahi, ‹Baraá múk tlakwe gár ti'imiit a tlakweema.› Ala aníng dakw'eé' ngu gawaawók i looloqoosaaká.