DABE 29:19 - Biblía Axweesantá Hhohho' ar Mungú 2004

¹⁹ Barnaxes axweesanoó alqadoorí, tí hamí lo'o kawa /agé', hee gwaa axaás, aluuwo iri sagós ar awín, nee iri ooi, ‹Aníng gár i aw i káhh, tam aníng sagagawduueé' bura eehár,› gaarí kuungá' sleémeero nu fák, múk tlákw nee oo hhoe.

DABE 29:19 Iomraidhean Croise

IIMU/UUNGW 2:17

ala mamaá xa'anoó xu'utír muruú hhó' nee oo tlákw, mi /ayaar, asma bál mamaá xa'anoowí bira /ák xueek, a gwá'.»

2 WAAWITÁ 24:4

nee sleeme asma inós baraá Yerusalemuro tseerdaá múk dakuús wásl gina ku'uús. Ala AAKOÓ MUNGÚ tlakweemaadá' gaa slaiiká ngiwa gurtlay.

WARA'AMI 10:11

Tlakusmo i baraá muunaáwós i kaahi, «Mungú aa sagaqwaár, ilaawós gaa tuuntuúk, i baloó xuumisiiká.»

WARA'AMI 36:2

Birta i qaytsiít, tin kilós hheehhe'eemiis, asma tlakweemaawós mikiwa tsaáhh as kahhó' mukuwa aáhh.

WARA'AMI 49:18

Hee tam i qwal/úr hooti baraá slafingose, tam ku xirfayeemisi as tlehhmi'iiwós awa hhohho',

AXWEESANOÓ SAGALOOA 29:1

Heé ta gurbuaaín daqtá yaariire bira da/eewa gawdeés, in wa'aá wák ar qeqtín, sleeme i kotsqotiiká.

DAHARUSMO 11:9

Kuúng masoómo, masoombi'iimarók sa qwalaala/eek, nee muunaáwók qwala/aseek baraá masoombaimaroge. Adór ta sla' baraá muunaáwoge eehareek, nee adór ilaawoge taqo ga/eera. Ala ka xú' baraá muruuwí sleémeerowo Mungú kuúng u huuw baraá sakwasleema.

YEREMIA 18:12

Ala inooín i kaahiya', ‹Tisíng a tawo. Adoorén tidá' ta sla'aan an eeharaán, nee umuú heewo in hoot ar adór aa ár baraá muunaáwós kudá' tlaakwe.› »

YEREMIA 3:17

Nee qoomaadae gixsár Yerusalemu ka bay, ‹Kitángw aleesleemu oo AAKOÓ MUNGÚ.› Nee xoordu sleémeero niri burumburitiyá' dír geeraaeé'. Adoodá' tlaakw muner'ine ta slai ngi eehariaaká.

YEREMIA 36:29

Nee daanduú waawutmo Yehoyakimu waawutmoó Yudawo ta o', anuú AAKOÓ MUNGÚ a kah, kuúng kitaábuudá' una dá/, a didií kat, ahaá waáy gár kángw waawutmoó Babuloni ngusa gooín, iwa kaahi, ‹Yaamuuká' gi hhitín, muu nee makaywo giri hhaamiis.›

YEREMIA 44:27

Mukwí aníng u iltá tlaákw ar ga/áw as nguwa gár tlaákwí tleehh nee u hhooeemáy sla'aaká. Múk Yuda sleémeero kudá' baraá yaamaá Misrír hoót ku hhaamiis ar paánga nee qwari, ay dír ti suquuti.

YEREMIA 7:24

Ala inooín aníng iga ilaiwa/i'iiká laqaá axweesante'eé' nga iiárií qaasi'iiká. Inooín nina hootiyé' ar adoodá' sager'ine i slaiya', nee muner'ín tidá' gawden ngina eehariyé', inooín nina alií ki/iyé' kitángw tawa geerií kumiiti hhooeema tlehhtuwo.

ESEKIELI 13:16

Gaarí a alhhe'eesoó aruuseedár Israeli aa aariin nee iigu'utuú wayda gwa aan daanduú Yerusalemuro, ala wayda iqo kaahh. Anuú Aakoó MUNGÚ tí aga oó'.»

ESEKIELI 13:22

«Kuungá' múk hota ganaá' ugwa daba' tlaqé' ar lameemoohúng, oo aníng naa diqiya' tsatiiká, nee múk tlákw kuri /uurií hanisé', tlakweema tlehhtuuwo tari kumiít, nee slafingw'ín kuri ba/amisiiká.

ESEKIELI 14:7

«Umuú qoomaaro, hee tam gaalá dír múk Israeliwo, laqaá dahaaymo oo yaamaá Israelír wa hoót, birta paraátl dir'eene, nee barnaxes slaqsa'aá munguaá hatlá' giri haratlintií' ar ilakaahara, nee tlakweemaaká' tari dukuutsmo dír án nee inose, aluuwo iri daqáy dír aarusmo as ngiwa xu'utír wa slai gár aníng ni kah, naagáy aníng AAKOÓ MUNGÚ, inós un mu/aywaáts.

ESEKIELI 14:8

Aníng nee inós ti araán. Aníng inós un laya tleéhh nee slaqsaay, aníng un hingeés baraá tla/ángw xooror'eene. Diirí an didá' kawa tsaahhi adór aníng tár AAKOÓ MUNGÚ.

FAARO 15:30

«Ala barnaxes hee iwa dakuusi ina tsabín a dakuús ar pa/aayorooká. Inós bar an yaamuloousmo, laqaá hoomo, inós gár kuwa hariím a gaasa. Asma inós AAKOÓ MUNGÚ gun waaqaqaa'.

FAARO 15:39

Afuuntluraywí qoomár bura aandé', kuungá' nu inslawtamisi, hara'ayár AAKOÓ MUNGÚ sleémeero, nee nee adoodá' i kat ka tlehhá' as kuungá' ilaatleerír munerhúng ma eeharaharaara', nee muruú ilaahunge ta ara'aandá'.

Rumi 1:21

Inooín tam Mungú ngwa tsaahhi'i, ala inooín ngwa xirfayeesi'iiká tawa Mungú, nee slám ngwa sluufmiisi'iiká. Ala inslaway'ín iri daktu'uút, nee muner'ín tidá' sagalooár koomaaká iri ak gíp.

2 korinto 10:5

Nee slám gár atén ta fee/itaan a umuúqo inslawaywo, kudá' il/aám, oo daara/ángw koóm, oo taa tleéhh as hee kángw Mungú munguwa xuú'. Atén umuúqo inslawaywo un ohiimaán, nee kuwa iialooesaan dír Kristo i alé.

Efeso 4:17

Gawaá adoorihe án kuungá' nun baw, slám nun gurbu'uúm kángw kilá' wa ale ar baraá umuú Aako, ma kumiitara' tawa hota' adór múk xoordaá hatlá' ar alé. Asma inooín inslaway'ín a tawo,

Efeso 5:6

Hee munduwa al/aáy ar /ayma'aá tawo. Asma múk muruuwí tlehhiít xarasleemaá Mungú ngun i hardihiyá' asma tawa iialooeemisiiká.

DABE 17:2

«Barnaxes aga axasé' baraá gixsaduhúng kudá' AAKOÓ MUNGÚ naa kuungá' i haniís, heé hhawaata laqaá /ameeni tlakweema gaa tleehh dír geeraá AAKOÓ MUNGÚ, Munguúhunge, nee alqadoorós gari sií',

DABE 28:15

«Ala barnaxes kuúng afór AAKO MUNGÚ, Munguúwók, aga iialooeská, laqaá barnaxes hara'ayaarós sleémeero nee dabeerose, tí laarí ni kah, aga harmagahhká ooharo, naagáy kuúng lo'oorí sleémeero un /ák:

DABE 29:12

Kuungá' a diirí as lo'o kawa /aga' ar tawa data' baraá alqadór AAKOÓ MUNGÚ, Munguúhúng laarí.

DABE 29:18

Gimsé' ti harmagahhe' laarí hhawaata laqaá /ameeni, laqaá heé doohúng, laqaá oo tlahhayhúng tumu wák oo diirí wa sihhmiít laarí, oo AAKOÓ MUNGÚ, Munguúrén gu sií', miwa deeruút, iri munguaá xoordaá hatlá' sagadiyér áy. Gár adór tí an adór dee/armoó aa harmaa/, mamaá qarqará' giri laqwaál, kudá' qarkú koomá'.

DABE 29:20

AAKOÓ MUNGÚ, heé adór kwí gu baloó gurtlayká, nee buhhtaá AAKOÓ MUNGÚ nee da/itose heewí ngu al'oohiyá', lo'o sleémeero ar taa gooín baraá kitaábuuwí heedaádá' gu /ák, nee AAKOÓ MUNGÚ umuú heedaádá' gun fiits gawaá daanduú yaamuwo.