DABE 24:19 - Biblía Axweesantá Hhohho' ar Mungú 2004

¹⁹ «Qoomár bar qamuuhúng fiqitá', ufeedá' taa gunqaaresé' baraá qaymoórí ale, ma leehhara'. Tidá' aa met an meerá' as hoomár ayaahúng hoot, nee na/aá panaay nee /ameenár kwaeeli, as AAKOÓ MUNGÚ, Munguúhúng nuwa tsuuqi baraá gadiyeduuhúng sleémeero.

DABE 24:19 Iomraidhean Croise

YOBU 42:12

AAKOÓ MUNGÚ hotaá Yobu kukaá alu gina ak tsuúq ta kudaá geeraawo. Bee/ángw Yobu tari kume mibaá nee tsiyáhh, angamiarós a kume lahhoó', hikwa ngi kon kume tsár, nee daqwaayér /ameena a kumuú wák.

WARA'AMI 112:9

Muu gun qaqáy ar muunuú /awaák, narkuute gan qaqáy tawó ale. Gurhhooarós i baloó fakaká. Heewí ku aleesleemuú i haniis nee slám ku ilaiwawaa/.

AXWEESANOÓ SAGALOOA 14:21

Heé inslaawmoowós gu waaqaqaá' i tlakweemaá tlehhiit, Ala heé narkutmo gu gurtlatláw ku amohhoó'.

AXWEESANOÓ SAGALOOA 19:17

Heé narkutmo gwaa /iis a AAKOÓ MUNGÚ guna kirkitís. Inós ku buu' nee Mungú tlehhmuuwós kwí hhooe.

ISAYA 32:8

Ala heé ta ilaiwawa/i gár i leelehhiiti a ilaiwa/ame, nee inós muruú ilaiwa/ame gun aleekalaa/.

TLAHHOÓ LAÁWI 23:22

«Bar bu'uún baraá qaymooroge, ma baloó bu'uumaar ay alhhe'eesoó qaymoorók, laqaá ma alií ki/aar as buruurú kuwa sleemis, un meér as dahaayér waaraahh nee narkuute. Aníng an AAKOÓ MUNGÚ, Munguúwók.»

Luka 6:35

Ala wakuuserhúng sla'aak, hhooeemií tlehhiitaak, nee kirkime ka ya/aandá', ma ki/isárí daamaara'. Ala kuungá' qeemuú ur u sleerá', daqaní kuungá' a na/aá Kuduú Gawa. Asma inós ku hhoó' dír kudá' sluufaay wasle nee tlakuuseero.

Luka 6:38

Muruú ta koonda'a muu qaqawaak, kuungá' tundu qáy. Qoomoó taa hatsiís, kway tiíl, kway /umamaa', iri yaamií waa/, an kudá' muu ni kuungí haniisi. Asma qoomaydá' tar qoomeemesa', an kudá' tindi kuungí qoomeesi.»

DABE 14:29

Muruuwí daqaní an oo múk tlahhoó Laáwi, asma inooín gár ta kon i káhh, laqaá aalír ta kon baraá tla/angwhunge i káhh, sleeme ar dahaaye nee panaay, nee /ameenár kwaeeli, tidá' hoot baraá gixsarhúng wa aleeró. Kuká' sleémeero ni hardihiye' as niwa /aymár aya' niri aaxiyá'. Adoorí tleehhaak, daqaní AAKOÓ MUNGÚ, Munguúhúng nu tsuuq baraá gadiyérhúng sleémeero ar taqo tlehhita'a dabaahunge.»

DABE 15:10

Heé narkutmo tu/aak ar muunuú /awaák, bura tú/ ma qunuunu/aar, asma adoorí bara tlehhé', AAKOÓ MUNGÚ, Munguúhúng kuungá' nu tsuuq baraá gadiyeduuhúng sleémeero awa taqo tlehhita'a.

DABE 24:18

Inslawaak adór kuungá' aáng tar lawaale baraá yaamaá Misriro, nee AAKOÓ MUNGÚ, Munguúhúng nuna tuú/ baraadá' wa ale. Gawaá adoorihe án kuungá' nu baw, adoorí tleehhaak.

DABE 26:13

Naagáy aluuwo tari geeraá AAKOÓ MUNGÚ, Munguúwók wa ó', ‹Boohharí hhoohhoo' ngina amór dooeé' wa huúw, ngiri haniís dír tlahhoó Laáwi, nee dír hoomár ayaarén hoot, nee na/aá panaay nee /ameenár kwaeeli, adoodá' kuúng aníng ira hara'ayiín. Aníng hara'ayarók aga si'iiká laqaá aga gunqareesiiká.

RUTI 2:16

Slám bahh'alé duxuumaak baraá ufeero, ku gixeerá' as inós nguwa sles, ma siaara'.»

RUTI 2:2

Looarka wake Ruti Naomi gari beér, «Xáda, xáy, án a tláw baraá qamu, a bururú sleemisuú áw. Aníng a haraxuú' heé ya/aám nguwa slaw niwa aluuwós wa sleemiis.» Naomi iri ó', «Kiíng tláw, dasir'eé'.»