Matiyu 13:11 - Ipili Nutestamene

^11-12 Tipa peai-kola, balato utupanena pii okone yano peyoto, wandakali mindimane Gotena pii oko bilipi leyo nayu leando, Goteto balana bilipi oko minu tai laya ola-kola, wandakali okonemane Gotena pii oko bilipi leyo nayu lolopeya lea. Disaipolo tupa yakamato Gotena pii oko bilipi leyama nayu leyai okonena, Goteto pitaka taka ando atalane loto, nambato pii mana wamba too pene yane tupa yakamanga andawa lalawane. Wuane tekeko, wandakali waka tupamane Gotena pii oko bilipi leyama nayu naleyai okonena, Sataneto akali utupanena bilipi oko mo alu piya olopeya. Tene okonena, Goteto pitaka taka ando atalane lo pii mana wamba too pene yane tupa nambato wandakali utupanenga panakame lamai napene, pii kokoli lo angu lamai-yawane.

Matiyu 13:11 Iomraidhean Croise

Matiyu 13:10

Jisasato pii kokoli okone lea-kola, balana disaipolo tupamane bala ateanga epoto, anu peakale nimbato pii kokoli angu loto, wandakali tupa lamailini lo tipa peai.

Matiyu 16:17

Wuane lea-kola, Jisasato bala lamawuato, Jone iwanane Saimone, yuu okona wandakali mindimane namba Gote Iwanane Mesaya oko ateya lo nimba andawa naleya lea. Nambana Ayiane ati kenga ateya okomane namba Gote Iwanane Mesaya oko ateya lo nimba andawa langeya-ko. Nimbato epelewa atape-pene.

Matiyu 19:11

Wuane leai-kola, Jisasato utupane lamawuato, akali minditupa-mane katulo wanda kee nalene, mee ata na-piyaini. Jia. Goteto mana okone akali minditupanga maya-kola, utupane-mane angu katulo wanda mindi kee nalene, mee atalaini.

Matiyu 20:23

Wuane leapi-kola, Jisasato akali okonelapo lamawuato, enene, minditaka mindi kapo penenga petene gulola oko nambato nolowa-kola, liyambatopi nolo-peyapi tekeko, nambana kii tikasa-tole yandopi, nambana kii koyasa-tole yandopi, akali mindi bala peteakale lolane piape oko nambana jia. Wamba nambana ayiane okomane akali lapo toko okone-lapona peteakale lata yane leaipia.

Maki 10:40

Liyambato wuane pulu-peyapi tekeko, nambana kii tikasa yandopi, nambana kii koyasa yandopi, akali mindi bala peteakale lolane piape oko nambana jia. Toko okone-lapona namba ayiane okomane akali lapo peteakale lata yane leaipia.

Maki 4:11

Tipa peai-kola, balato utupanena pii okone yano peyoto, takita atalaini wandakali tupamane yamapane peke leaindo, Goteto utupanena koo tupa apolopeya leaipia. Tene okonena, utupane-mane yamapane peke naleakale nembo toto, nambato pii kokoli tupa angu utupane lamalu-wakola, ole kambuanga utupane-mane nambana pii okone ale wato teke, pii okonena tene tupa katulo nembo natolo-peyai. Ole kambuanga utupane-mane nambana piape andoto teke, Goteto pitaka taka ando atalane lo katulo anda napulu-peyai. Wuane tekeko, Goteto pitaka taka ando atalane lo pii wamba too pene yane oko nambana disaipolo tupa yakamanga lapana yane leaipia.

Luku 8:10

Wuane leai-kola, Jisasato utupane lamawuato, Goteto pitaka taka ando atalane loto, nambato balana pii mana wamba too-pene yane tupa yakamanga andawa lalawane tekeko, wandakali waka tupamane nambana piape lee-mane angu andoto, Goteto pitaka taka ando atalane lo anda napeakale. Dee, utupane-mane nambana pii oko ale-mane angu ale wato, Goteto anu puato, pitaka taka ando atalane nembo nateakale nayuto, nambato pii kokoli tupa angu lalawane.

Jone 6:65

Tene okonena, nambato yakama languato, namba Ayiane okomane namba lo bilipi lolane tai-lene oko wandakali mindinga mai napeando, wandakali okonemane namba atolowanga katulo naepolo-peya lewane lea.

Aposolo 16:14

Pii lo petema-kola, Gote lo lotu lalane wanda Litiya lene mindimane pii nanimato lemane tupa alewa petea. Tayataita tano wanda okonemane lapalapa tundupa-pene tupa salimi loto, bisanisa pua piti-yaepia. Akali Andane okomane wanda okonena yamapane mopeke laya ya-kola, wanda okonemane pii Poloto leane tupa wayumane ale ya.

Lomo 11:25

Amene imalini yame, yakama tane wai ene ateyama nembo tolaini lo, nambato Gotena pii wamba too pitane yane mindi yakama langeyo. Wamba Isatale tane wandakali minditupana nembo-tene ana gulene atama pulu, Goteto wandakali yame waka oko-tuma balana wandakali guleakale lata yane tupa pitaka balana yame okona mo tako pula oto okona giau lolopeyai leyo.

Lomo 16:25

Wamba mali kambua wete Gotena pii layene epene oko too pitane ateane tekeko, matili wandakali yame pitaka-mane pii okone bilipi loto, wato mineakale loto, Goteto pii okone lo pana yaepia. Atapowa atalane Gote okonemane balana pii okone potopisa akali tupanga lo pana wato, utupane-mane pii okone pepa peyalapape lea-kola, pii okone panakame yaepia. Panakame ya-kola, Jisasa Kataisato wua peane loto, nambato Gotena pii layene epene oko yakama lamai-yawane. Nambato wuane piyawane okonemane Goteto yakamana bilipi oko katulo minu tai laya olopeya.

1 Kotini 13:2

Nambato Gote lo bilipi leyo nayu loto, balato ati andane peleya tupa lopalu, yuu waka mindinga yata yakale lo pote leyo-kola, balato wuane piyae yando, okone epene tekeko, nambato wandakali tupa towa epelewa yamapane yo ata napewando, namba akali angini mindi jia. Nambato Gotena nembo-tene too pene tupa pitaka andoto, mana waka tupa pitaka andalawane yandopi, Gotena pii lamaulane tai-lene oko nambanga yandopi, okone epene tekeko, nambato mangene utupane pitaka pua atoto teke, wandakali tupa towa epelewa yamapane yo ata na-piyawane yando, namba akali angini mindi jia.

1 Kotini 15:51

Nanima umbaini okonepene ata-pata Gotena yuu epene okona katulo kolandaka nalolo-peyama okonena, nanimana umbaini tupa lawa puato, koya napene, saka atapowa atolane umbaini tupa gulape-pene. Tene okonena, nambato pii too pene mindi yakama langeyo oko ale alapape. Nanima pitaka oma napulu-peyama jia. Minditupa saka atolo-peyama tekeko, nanima pitakana umbaini tupa lawa puato, waka mindi-pene gulolo-peyai. Matili enjole mindimane biakulu mindi peyola-kola, Goteto wandakali omene tupa malinga ika laya olopeya. Okone angi, balato utupanena umbaini tupa mo lawa pula-kola, utupane katulo dee lapone koyoto oma napulu-peyai. Enjole okonemane biakulu okone peyola-angi, wamba ini kapoyale wetete Goteto nanima oma napene, mee saka atoloma wandakali tupana umbaini mo lawa pula-kola, matili-matilipi nanima katulo dee lapone koyoto, oma napulu-peyama. Jia.

1 Kotini 2:14

Oli Sipitisa atene wandakali tupamane angu katulo pii utupane yapa lo tale puato, epene wete ya lo nembo talaini. Wuaneko, Oli Sipitisa ata napene wandakali tupamane pii utupanena tene tupa katulo nembo natene ato, kee wato leyai nembo toto, Gotena pii nanimato lalamane tupa ale wato teke, wandakali utupane-mane bilipi na-lalaini.

1 Kotini 2:7

Wamba wetete Goteto yuu ati-la, okonelapo yakale nalene atea-angi, bala wai-ene wetete atoto, nanima balana yuu epene tii-pene okona polane asini epene mindi yata yane tekeko, asini okone too-pene yaepia. Wandakali-mane asini okone nembo natene, tatakewa ateyai-kola, nanimato Gotena pii oko utupane lamawuato, asini okone utupanenga andawa lalamane.

1 Kotini 4:1

Wandakali-mane nanima aposolo akali tupa nembo toto, nanima Kataisana piape akali tupa atoto, balana pii too-pene tupa ando ata maiyamane nembo tape-pene.

Epesasa 5:32

Pii layene okonena tene angini oko too pitane ateya tekeko, pii okonemane Kataisa-la, balana sosa okola, okonelapo umbaini mindiki gulalane leya nembo toto, nambato pii okone leyo.

Epesasa 6:19

Nambato Gotena pii layene epene oko lamawua atalawane okonena, namba katapusa ateyo tekeko, nambato yuku naene atoto, balana pii layene epene oko wandakali tupa lamawua atape-pene. Tene okonena, nambato Gotena pii oko loyale puluwa-angi, balato namba moyo pii epene mindi namba geakale lo yakamato pote lalapape. Dee, Goteto pii epene okone namba gula-kola, namba yuku naene atoto, balana pii layene epene too pitane ateane okone wandakali tupa lamawua ateakale lo yakamato pote lalapape.

1 Timoti 3:16

Wamba Jisasa bala akali enene mindi guloto, yuu okona panakame epea-kola, enjole tupamane bala andeaini-pia. Oli Sipitisa okomane bala akali tika-pene wete ateya lo lapana ya-kola, wandakali tupamane balana pii oko lo tawe yainipia. Balana pii lo tawe yai-kola, yuunga wandakali tupamane bala lo bilipi leainipia. Goteto bala atu ati kenga peakale lo mea-kola, Jisasa bala gene andane wetete meaipia. Gotena pii layene wamba too pitane yane utupanena tene tupa andane wetete eya lo bilipi leyama nayu leyama.

1 Timoti 3:9

Akali utupane-mane Gotena pii layene wamba too pitane yane okone bilipi loto, pii okone kuai lo wato mineyamape, wato mina napeyamape nembo tape-pene.

Jemesa 1:5

Goteto mangene mindi peakale lo wandakali mindimane pote leya-kola, Goteto wandakali okone ando laiya nalene, mangene okone piyane. Wuaneko, kenda-pene mindi yakamana mindinga epola-kola, balato anu puape lo tatake yando, Gote nimbato nembo-tene epene mindi gipe lo balato pote lape-pene. Pote lola-kola, Goteto nembo-tene epene mindi bala malupeya.

1 Jone 2:20

Apito owato pii loto, Kataisa towa yanda-pene akali atalaepe. Akali mindimane Jisasa bala Mesaya oko jia leando, bala owato pii loto, Kataisa towa yanda-pene akali mindi atolo-kola pulupeya. Balato Gotena Iwanane oko masia maiyando, Ayiane Gote okopi masia maula-kola teke pulupeya. Tene okonena, wandakali mindimane Gotena Iwanane oko masia maiyando, Ayiane Gote oko bala towa atu ata napulu-peya. Wuane tekeko, wandakali mindimane Jisasa bala Gotena Iwanane oko ateya lo lapana yando, Jisasa-la, Ayiane Gote okola, okonelapo lapotaka bala towa atu atolopeya. Nambato yakamana pepa peyo epe leyo okone, yakamato enene pii oko nembo nateyai nayuto, naleyo. Jia. Akali epene tika-pene wetete Jisasa Kataisato Oli Sipitisa oko yakama gea-kola, yakamato Gotena pii enene oko nembo toto, Gotena pii enene okomane owato pii mindi laa napiyane nembo teyai. Yakamato wuane nembo teyai okonena, nambato yakamana pepa oko peyo epe leyo.

1 Jone 2:27

Oli Sipitisa wamba Jisasato yakama geane oko yakama towa atu ateyai okoni. Oli Sipitisa okonemane owato pii mindi yakama langi napiyane. Jia. Balato enene pii angu loto, mana epene tupa pitaka yakama langiyane. Wuaneko, wandakali waka mindimane yakama mana langualane tene mindi ata napeya. Jia. Oli Sipitisa okomane yakama mana langeane pua teke, yakama Jisasa towa atu atalapape.