Luku 6:23 - Ipili Nutestamene

²³ Wamba wandakali utupanena yumbane tupamane potopesa akali tupa minu koyainipia. Wuane pua teke andipa wandakali utupane-mane yakamapi minu koyaindo, yakama epelewa atape-pene. Yakamato Akalina Iwanane oko bilipi lo atolai-kola, wandakali-mane yakama minu koyaindo, matili yakama ati kenga yuu epene okona polai-angi, Goteto yole andane mindi yakama gulupeya nembo toto, yakama epelewa atalapape.

Luku 6:23 Iomraidhean Croise

Luku 1:41

Elisambesato pii okone ale ya-kola, iwana balana ininga peteane okomane ema taimane peaipia. Okone angi, Oli Sipitisa oko Elisambesa balanga epo tumbi leaipia.

Luku 6:35

Gote ati kenga ateya okomane bala lo bilipi leyama nayu na-lalaini wandakali tupapi, koo piyaini wandakali tupapi, utupane pitaka ondo wato moyalane. Yakamana ayiane ati kenga ateya okomane wandakali tupa ondo alane pua teke, yakamato wandakali yangone tupa ondo wato moyo atalapape. Wuane puato, yakama towa yanda-pene wandakali tupa towa epelewa yamapane yo atoto, utupanenga mana epene tupa minalapape. Dee, matili wandakali mindimane yano peya-geakale nembo toto, minditaka mai napene, mee moyo maiyapape. Yakamato Gotena ondo ene mana okone wato mineaindo, yakama balana andopane gulo atoto, matili yakamato yole andane wete mindi molopeyai. Jisasato wuane leaipia.

Aposolo 14:10

Andoto, Poloto pii taimane loto, nimba ika loto, nimbana kene okolapo tika pua ata leaipia. Wuane lea-kola, akali okone bala taimane ika lo atoto, asini epoko peaipia.

Aposolo 3:8

Tai gulea-kola, bala taimane ika loto, peakaiyu nena pua asini epoko pua peaipia. Epoko piyu, bala Pita, Jone-la, okonelapo towa atu lotu anda andane okona kolandaka lalu, Gotena gene oko laiyu loto, peakaiyu nena pua asini peaipia.

Aposolo 5:41

Wuane pea-kola, aposolo akali tupamane wua lo nembo teainipia: Nanimato Jisasana piape pimai-yamane okonena, akali kanjole tupamane nanima yala alapale nembo toto, minu peyalai. Nanimato kenda-pene okone katulo mee awua atolo-peyama lo Goteto nembo tala okonemane nanimana gene tupa laiyu lala nembo teainipia. Wuane nembo toto, aposolo akali tupa yakama epele wato, akali kanjole tupa ateakale tepa alu, kamaka peainipia.

Lomo 5:3

Kenda-pene minditupa nanimanga epeya-kola, nanimato kenda-pene auwa atolane mana oko moto, wamba kapoyale kepa naene, tai gulalamane. Tai guloto, makande pene nanimanga epalane tupa nanimato katulo sia minalamane. Makande pene nanimanga epalane utupane sia minuto, nanima mini lapo pali napene, Goteto nanima moyolo-peya lo bilipi loto, maliyo atoto, nanima epelewa atalamane.

2 Kotini 12:10

Nambato Kataisana piape oko pua ateyo-angi, wandakali-mane namba andayo pii koo loto, kenda-pene andane tupa namba giki peyai-kola, namba kenda-pene kambua awuato, tai nalene gulo atalawane. Kenda-pene waka tupa nambanga epalane tekeko, namba tai nalene ateyo-angi, Goteto namba minu tai laya eya-kola namba tai-lene gulo atalawane. Tene okonena, kenda-pene utupane nambanga epeyai-angi, nambato okone katu ya lo nembo talawane.

Kolosi 1:24

Wamba Goteto balana pii layene epene oko yakamanga lapana wakale nembo toto, nambato balana pii layene epene utupane pitaka lamawua atape lo langeane. Wuane lea-kola, namba balana sosa okona piape akali gulewa. Sosa oko Kataisana umbaini oko eya-kola, Kataisato balana sosa okone moyoyale, tandaka andane neane. Balato wuane peane pua teke, andipa nambato balana sosa oko moyoyale tandaka neane okonena tako pua tandaka no ateyo. Nambato yakama moyoyale tandaka no atoto, yamapane epene palu ateyo.

Jemesa 1:2

Nambana amene imalini yame, yakamato Gote lo bilipi leyama nayu leyaipe, naleyaipe lo andoyale, Goteto kenda-pene mindipene-mindipene tupa yakamanga epeakale lo ando kondalane. Dee, yakama Kitisene tai atalapale nembo toto, Goteto kenda-pene utupane yakamanga epeakale loto, yakamana bilipi oko minu mandeke peakale lo ando kondalane teke. Tene okonena, kenda-pene utupane yakamanga epola-angi, yakamato epelewa teke atape-pene nembo talapape.

1 Pita 4:13

Matili Kataisa balana tai-lene oko towa panakame epola-angi, yakama epele andane wete olo-peyama nembo talapape. Wuane nembo toto, wamba Kataisa bala tandaka neane pua teke, andipa yakamapi tandaka no atoto, epelewa atalapape.

Lapana Yane 2:17

Wandakali mindimane mana koo tupa yanda pimawuato, sia miniando, ati kenga tawe tomo epeane too pitane atene minditupa bala maiyu, nambato ana ake-pene mindi bala mauwakale. Gene wenene mindi ana ake-pene okonena pepa peyatane atola-kola, ana okone mola wandakali okonemane angu gene okone andolopeya. Wandakali waka mindikipi mindimane gene okone anda napulu-peyai. Oli Sipitisa okomane pii okone loto, sosa tupa lamaeya oko ale asia yene wandakali tupamane wayumane ale ape-pene. Akalina Iwanane gulene akali okonemane wuane lea.

Lapana Yane 2:26

Wandakali mindimane mana koo tupa yanda pimawuato, sia minalu, nambana mana epene tupa wato minu atama pulu, bala saka atolane oto tupa koyo pula gii okona giau leando, balato wandakali yame waka tupa bosa lo ando ateakale lokale.

Lapana Yane 2:7

Mana koo tupa yanda pimawuato, sia minula wandakali okonemane Gotena Patandaisa yuu epene okona wandakali saka atapowa ateakale lo ataya alane ita okona dini oko yo neakale lokale. Oli Sipitisa okomane pii okone sosa tupa lamaeya oko wandakali ale asia yene tupamane wayumane ale ape-pene. Akalina Iwanane gulene akali okonemane wuane lea.

Lapana Yane 21:7

Wandakali mindimane mana koo tupa yanda pimawuato, sia mineando, namba balana Gote oko atolowa-kola, bala nambana andopane atolopeya. Bala nambana andopane atola-kola, minditaka epene utupane pitaka balana paluni yolopeya.

Lapana Yane 3:12

Wandakali mindimane mana koo tupa yanda pimawuato, sia mineando, balato nambana Gote okona lotu anda oko minu tai laya yakale loto, nambato bala lotu anda okonena anda mau mindi gulaya olopeyo. Wuane puluwa-kola, bala lapone Gotena lotu anda okone tepa alu, kamaka napolo-peya. Jia. Matili nambana Gote okomane Jutusaleme wenene oko ati kenga ato epe lolopeya nembo toto, nambato balana tano okonena gene okopi, nambana Gote okona gene okopi, namba tanena gene wenene okopi, gene tepo utupane nambato wandakali okone balanga pepa peyo ate lokale.

Lapana Yane 3:5

Wandakali mindimane mana koo tupa yanda pimawuato, sia mineando, nambato balanga wuane pua teke tona ake-pene okonepene mindi mo piya wakale. Mo piya olowa-kola, balana gene oko wandakali saka atapowa atolane tupana gene yalane buku okona pepa peyatane yola-kola, nambato gene okone kunu apia napulu-peyo. Jia. Namba Ayiane okona wenongapi, balana enjole tupana wenongapi, nambato wandakali okonena gene oko lapana olopeyo.