Luku 3:14 - Ipili Nutestamene

¹⁴ Wuane lea-kola, ami yanda yene minditupa-mane bala tipa puato, nanima anu pimape leainipia. Wuane leai-kola, balato utupane lamawuato, yakamato wandakali tupa peyoyale puato yandopi, owato kote loto yandopi, utupanena minditaka tupa pake gulo mia na-piyapape. Yakamana piape pulai okona yole gulai tupa moto, okone atu ya nembo talapape leaipia.

Luku 3:14 Iomraidhean Croise

Matiyu 8:5

Jisasa bala Kapaneame tano okona peakaiyu lea-angi, Lomo tane ami yanda yene andete mindiki ando atalane opisa mindimane epoto, pii mindi bala lamai-yaepia.

Luku 19:8

Utupane-mane wuane leaini tekeko, Sakiasato Akali Andane Jisasa oko lamawuato, wamba nambato owato pii loto, wandakali mindinga takisa muni minditupa konda pua mialawae yando, andipa nambato paini ole tukumindinga yano peyo mauwakale leaipia. Wuane piyu, nambana minditaka eya tupa pitaka atutu lo tale puato, minditupa wandakali tipia tupa mauwakale leaipia.

Luku 3:10

Joneto wuane lea-kola, wandakali kambua epo amunguli peaini tupamane Jone tipa puato, wuane yando, nanimato mana epene andoko wato minamape leainipia.

Luku 3:13

Wuane leai-kola, balato utupane lamawuato, gapomane okomane takisa muni oko tuma mialapape lola pua, yakamato moto, minditupa konda pua molaini leaipia.

Aposolo 10:7

Enjole okonemane wuane lalu pea-kola, Koniliasato balana andaka piape piyapele akali lapopi, ami yanda yene mindipi, utupane ipulupa leaipia. Ami yanda yene okonemane mana Goteto epele alane tupa wato minu atoto, ole dindi lo Koniliasa towa atu atalaepia.

Pilipai 4:11

Nambanga minditaka mindi jia eya-kola, nambato pii okone naleyo. Jia. Minditaka mindi nambanga yandopi, nayandopi, namba katulo atokale lo mana mewane.

Taitasa 2:3

Wuane pua teke, wanda mini-yene tupamane mana epene tika-pene tupa minu peteakale lo nimbato utupane mana lamaipe. Kitisene wandakali tupamane mana koo mindi mineaindo, wandakali waka tupamane Kitisene utupanena mana koo okone andoto, Gotena pii oko andayo lamba lolopeyai. Wandakali waka tupamane wuane napeakale loto, wanda tai tupamane yakama akalini tupana pangosa pituto, yakamana akalinipi, andopanepi, utupane towa epelewa yamapane yo pitipe-pene. Utupane-mane kuai lo nembo toto, mana koo mindi mina napene, mana epene tika-pene tupa angu minu pitipe-pene. Wuane pua pituto, utupane-mane yakamana andaka piape pulane yola tupa pua pitipe-pene. Wanda tai tupamane mana epene utupane pitaka mineakale loto, wanda mini-yene tupamane mana utupane pitaka wanda tai tupanga mana lamawua pitipe-pene. Mana utupane pitaka wanda tai tupanga mana lamai-makale nembo toto, wanda mini-yene tupamane wandakali yangone tupa layangama epoko pua piti napene, ole dindi lo bia ipa tai nauwa lakae lo nembo natape-pene. Jia. Utupane-mane mana Goteto epele alane tupa wato minu epoko pua pitipe-pene.

Lapana Yane 12:10

Wuane peai-kola, mindimane ati kenga atoto, pii taimane wete loto, utulu otongapi, Satane bala nanimana Gote okona wenonga atoto, nanimana Kitisene amene imalini tupa kosimi loto, utupanenga koo tene yata alane tekeko, andipa Gotena enjole tupamane bala yuu okona auwa ainena leaini lea. Andipa nanimana Gote oko bala nanimana kiŋi atoto, piape taimane puato, nanima molo-peke lea. Balato gene andane mindi Jisasa Kataisanga mawuato, bala Mesaya oko ateakale lata wato, pitaka taka bosa lo ando atolane tai-lene oko bala maiyepia.