Luku 11:41 - Ipili Nutestamene

⁴¹ Yakama tanena umbaini kenga angu wasa-wasa peya napene, yakamato wandakali jia yo ateyai tupa ondowa moyoto, tomo pelesa tupanga yalane tupa neakale maiyapape. Maulai-kola, yakamana umbaini, yamapane-la, okonelapo lapotaka kalato nayene atolopeyai.

Luku 11:41 Iomraidhean Croise

Matiyu 5:42

Wandakali mindimane yano mindi gii lo tee leando, nimbato bala masia mawuato, jia nalape. Wandakali mindimane minditaka mindi gii lo tee leando, okone maipe. Jisasato wuane leaipia.

Luku 16:9

Wandakali mindimane minditaka aŋako yola tupa kuai lo ando yatawa ateando, balato minditaka andane yola tupa kuai lo ando yatawa atolopeya teke. Wandakali mindimane minditaka aŋako yola tupa kuai lo ando yatawa ata napeando, balato minditaka andane yola tupa kuai lo ando yatawa ata napulu-peya teke. Yakamato wandakali waka mindina minditaka mindi kuai lo ando yatawa ata napeaindo, apito yakama tanena minditaka yolai tupa ando yatawa atalapa lo yakama gulupeyape. Yakamato yuu okona tawe muni koo tupa kuai lo ando yatawa ata napeaindo, apito minditaka angini oko yakamato ando yatawa atalapale lo gulupeyape. Wandakali mindimane akali andane lapona piape peando, balato akali andane mindi epelewa yamapane yalu, akali andane mindoko towa embo wato, masia malu-peyako. Akali mindimane akali andane lapona piape akali katulo ata napipe-pene. Yakamato mini lapo palu atoto, Gote muni-la, okonelapo lapotaka yamapane yoto, piape peaindo, mana okone katu nalolo-peya. Matili yakama omolai-angi, muni ando yatawa atalaini piape okone koyo pulupeya. Okone angi, ati kenga atalane Gote okomane nimba balana yuu epene okona ipu leakale nembo teaindo, andipa yakamato wandakali yangone tupa epele yakale loto, yuu okona tawe muni tupa tale pua mawua atalapape lo nambato yakama langeyo. Jisasato wuane leaipia.

Luku 18:22

Pii leane okone ale wato, Jisasato bala lamawuato, mana epene mindiki angu nimbato wato mina napilini leaipia. Wandakali waka tupamane nimbana minditaka eya tupa pitaka kambeakale lape. Kambolai-kola, nimbato muni mole tupa wandakali tipia tupa maipe. Wuane peendo, matili nimbana minditaka epene wetete tupa ati kenga yola-ko. Andipa nimba namba watama ipu leaipia.

Luku 19:8

Utupane-mane wuane leaini tekeko, Sakiasato Akali Andane Jisasa oko lamawuato, wamba nambato owato pii loto, wandakali mindinga takisa muni minditupa konda pua mialawae yando, andipa nambato paini ole tukumindinga yano peyo mauwakale leaipia. Wuane piyu, nambana minditaka eya tupa pitaka atutu lo tale puato, minditupa wandakali tipia tupa mauwakale leaipia.

Aposolo 10:15

Wuane lea-kola, pii mindi leane okonemane dee lapone loto, Goteto minditaka mo epene gulaya yane tupa ando, nimbato utupane kalato atene gulo eya lolene leaipia.

Aposolo 11:29

Ulia nono andane okone Jutiya disitiki okona ya-kola, Andiyoko tane Kitisene wandakali tupamane pii mindi lo yake puato, nanimato Jutiya disitiki okona ateyai Kitisene wandakali utupane moyo, nanima mindiki-mindiki lo muni nanimanga eya tupa tale puato, minditupa utupanenga pee lamakale leainipia.

Aposolo 24:17

Wamba namba mali minditupa yuu waka tupana atalu, matili nambato Juta yame wandakali minditaka jia yene ateaini tupa moyokale nembo toto, Jutusaleme pewa. Pulu, nambato munipi minditaka wandakali utupane maiyu, minditaka Gote lo opa maipe-pene tupa maewa.

Epesasa 4:28

Pake nene wandakali tupamane dee lapone pake naa nape-pene. Jia. Utupane-mane wandakali tipia tupa moyo minditaka tupa tale pua mai-makale nembo toto, yakamana kini-mane piape epene tupa tailo pua atape-pene.

Taitasa 1:15

Mana epene minalaini wandakali tupamane andeyai-kola, Gotena wenonga minditaka eya tupa pitaka epene teke-teke eya lo andalaini. Wuane tekeko, Kataisa lo bilipi nalene wandakali utupane yakamana mini yamapa-la, lapotaka koyatane eya okonena, utupane-mane andeyai-kola, minditaka eya tupa pitaka koo teke-teke eya nembo talaini.

Iputu 13:16

Wuane pua atoto, yakamato mana epene tupa minuto, yakamana minditaka yolai tupa tale puato, minditaka nayene jia yo atolaini wandakali tupa moyo maiyapape. Wandakali yangone moyo minditaka maiyaini mana okone Gote lo opa maiyaini mana okonepene eya-kola, Goteto mana okone epele alane-ko. Yakamato mana epene okone embesa naene, wato minu atalapape.

Jemesa 1:27

Nanimana bilipi okola, lotu lalamane okola, okonelapo mee gulolane nembo toto, nanimato yuu okona mana koo tupa wato minulumane tika ando atoto, andopane manyanipi, wanda yalopi, utupane moyo, kenda-pene utupanenga yola tupa awua atape-pene. Nanimato wuane pemando, Goteto andola-kola, balana wenonga nanimato Kitisene mana epene tika-pene tupa wato minu atoloma-kola pulupeya.