1 Timoti 1:12 - Ipili Nutestamene

^12-14 Wamba nambato Gotena pii layene epene oko ale naene atoto, Jisasa lo bilipi nalewa. Okone angi, nambato atapiane tene moto, Kataisa ando lamba lalu, kenda-pene andane minditupa Kitisene wandakali tupa maiki pua atewa. Nambato wuane pua atewane tekeko, nanimana Akali Andane Jisasa Kataisato namba ondo wete wato moya-kola, nambato bala lo bilipi loto, wandakali yangone tupa towa epelewa yamapane yo atewa. Tene okonena, nambato balana piape tupa katulo pua atolopele nembo toto, balato namba minu tai laya wato, nambato balana piape tupa pua atape leane. Nanimana Akali Andane Jisasa Kataisato wuane peane okonena, nambato bala ando wayu pele leyo.

1 Timoti 1:12 Iomraidhean Croise

Matiyu 20:4

Balato utupane lamawuato, yakamato nambana piape pingeaindo, nambato yole tika pua gukale-ko. Nambana ee okona piape pulu pulupa leaipia.

Aposolo 16:15

Ale ya-kola, nanimato wanda okonepi, bala towa atu anda mindikina paliyaini tupapi, utupane ipa mia-maema. Wuane pema-kola, wanda okonemane nanima languato, nambato Akali Andane oko lo bilipi leyo nayu lele nembo teaindo, yakama nambana andaka pitimakale ipulupape lea. Balato wuane loto, nanima ipulupa lo ayia ya-kola, nanimato balana pii okone ale alu, balana andaka pema.

Aposolo 9:15

Anana-yasato wuane lea-kola, Akali Andane okomane bala lamawuato, andipa akali okone bala nambana piape akali atoto, Isatale tane tupapi, wandakali yame waka tupapi, kiŋi tupapi, utupanenga balato nambana gene oko lo panawa ateakale loto, nambato bala yapa lo miauwa leaipia. Balato nambana piape oko puyale tandaka andane nolopeya tupa nambato bala andawa lokale-ko. Nimbato bala andolo puu leaipia.

Aposolo 9:22

Utupane-mane wuane leaini tekeko, Goteto Solo minu tai wete laya ya-kola, balato Gotena pii oko tika pua wete loto, Jisasa bala Mesaya oko ateya lo andawa leaipia. Soloto pii tika pua wete lea-kola, Damasakasa tano okona ateaini Juta yame wandakali tupamane balana pii utupane katulo yano napeleaini-pia.

1 Kotini 15:10

Wuane nalape-pene tekeko, Goteto namba ondowa moyoto, aposolo akali atape leane okonemane balato mee katapusa piape pua apia napeane. Jia. Namba aposolo akali mindi atoto, aposolo akali waka tupa pitaka sia minuto, piape tailo wete piyawane. Namba tanena tai-lene mindimane piape utupane na-piyawane. Jia. Goteto namba ondowa moyoto, namba minu tai laya eya-kola, nambato balana piape utupane piyawane.

1 Kotini 3:5

Apolosa nalipa akali api ateyapa-kola, yakamato nalipana yame ateyaipe. Akali Andane okomane piape waka-waka nalipa gea-kola, nalipato balana piape okonelapo pepa-kola, yakamato bala lo bilipi leai okoni.

1 Kotini 7:25

Andipa ateyama oko angi, kenda-pene andane minditupa ika leya okonena, wanda akali ima andipa ateyai wuane pua teke mee ateaindo, nambato okone kuai lolopeya nembo teyo-ko. Nimba wetene petene ateendo, nimbato bala peyo watoyale, asini mindi aiya napipe. Nimba wetene napetene ateendo, nimbato wanda mindi kee lokale lo asini mindi aiya napipe. Jia. Nambato wuane leyo tekeko, nimbato wanda mindi kee leendo, okone mana koo mindi jia. Wana mapokae mindi akali peando, okone mana koo mindi jia tekeko, wanda mindi akali peya-kola, kenda-pene kambua okone-laponga epalane. Kenda-pene utupane yakamanga na-epeakale nembo toto, nambato pii utupa yakama langeyo. Akali Andane okomane wana mapokaepi, iwana patanepi, utupane andayo pii oko namba langi napea tekeko, balato namba ondowa moyoto, namba enene pii lalawane akali mindi gulaya yane. Tene okonena, namba tane nembo teyo pua, pii oko yakama langeyo.

2 Kotini 4:1

Goteto nanima ondo wato, balana piape oko nanima geya-kola, nanimato balana piape oko puyale, kepa naene, pua atalamane.

Galesia 3:26

Wamba yakama Kataisana yame atamakale loto, ipa meai okoni. Okone angi, Goteto Kataisana mana epene tupa yakamanga yata ya-kola, yakama bala yale guleai. Yakama pitaka-mane Kataisa bilipi loto, yame mindiki ateyai. Andipa Goteto andeya-kola, Juta yamepi, wandakali yame waka tupapi, yakama yame waka-waka ata napeyai. Wandakali minditupa-mane wandakali mindina katapusa piape pimawuato, yole mia na-piyaini. Wandakali minditupa-mane piape puato, yole mialaini. Wuane tekeko, Goteto andeya-kola, wandakali yame okonelapo yame mindiki ateyapi. Balato andeya-kola, wanda yamepi, akali yamepi, yame okonelapo mindiki gulo ateyapi. Yakama pitaka-mane Jisasa Kataisa bilipi leyai okomane Gotena mandiyene yame ateyai. Tene okonena, Gotena loo tupamane yakama yatawa ando ata napeya.

Pilipai 4:13

Kataisato namba minu tai laya eya-kola, balana tai-lene okomane nambato minditaka pitaka taka katulo piyawane.

1 Timoti 1:1

Namba Polo. Goteto nanima taputi pua molo-peke leane okonena, Jisasa Kataisato nanima lamolo epolopeya lo maliyo ateyama. Okonelapo-mane namba aposolo akali ata leapi-kola, namba Jisasa Kataisana aposolo akali ateyo.

1 Timoti 1:11

Nambato balana piape katulo ando atolopeya lo Goteto nambanga tungi peyoto, nambato balana pii layene epene oko lamawua atape loto, balato balana piape okone namba geane. Geai-kola, nambato balana pii layene epene oko wandakali tupa mana lamawuato, Gote bala epene tika-pene wete ateya lalawane.

1 Timoti 1:2

Wamba nambato Gotena pii layene epene oko nimba langewa okone nimbato bilipi lo atele mambele, Timoti nimba nambana iwanane enene gulo atele. Wuaneko, nanimana Akali Andane Jisasa Kataisa-la, Ayiane Gote-la, okonelapo-mane nimba ondowa moyoto, nimbana yamapane mo tambo laya yakale lo nambato pote leyo.

1 Timoti 6:13

Gote bala epene tika-pene wetete ateya. Tai-lene tupa pitaka balanga yene ateya. Bala akali andane tupana akali andane atoto, kiŋi tupana kiŋi ateya. Gote bala angu oma napene, saka atapowa atalane. Yuu bala ateyanga tii wetete peya-kola, yuunga wandakali mindi Gote ateyanga mandaka pupe-pene guu na-lalane. Jia. Wamba wandakali mindikipi mindimane bala lee-mane anda napeainipia. Andipapi, wandakali-mane katulo bala lee-mane anda napeyama. Jia. Balana tai-lene oko yapowa yola-kola, matili-matilipi wandakali pitaka-mane balana gene oko laiyu lo atape-pene. Pii okone enene. Wamba Goteto Jisasa dee lapone yuu okona epeakale lolane oto mindi yata yaepia. Oto okone epola-angi, Goteto balana iwanane okone nanimanga mo pana olopeya. Wamba Pondiasa Pailate wenonga, akali minditupa-mane Jisasa Kataisa kosimi leai-angi, Jisasato Gotena pii minditupa kuai lo lapana wato, Gotena piape peaipia. Andipa Gote, Jisasa-la, okone-lapona wenonga nambato nimba languato, Gotena piape tupa pua atape leyo. Gote balato pitaka taka saka ataya alane. Koo tene mindi nimbanga nayakale lo ando atoto, nimbato balana piape tupa kuai lo puato, nanimana Akali Andane Jisasa Kataisa bala dee lapone epolopeya oto okone ando mola.

2 Timoti 2:2

Wamba nambato wandakali kambua tupana wenonga atoto, Gotena pii layene epene oko wandakali utupane lamawua atewa-angi, nimbato pii okone alewa atee okoni. Andipa piape kuai lo piyaini akali minditupa-mane pii okone wandakali waka tupa lamai-yakale nembo toto, nimbato akali minditupa yapa lo moto, pii okone akali utupane mana lamaipe.

2 Timoti 4:17

Nambato Gotena pii oko wandakali yame waka tupa lamalu-wakola, wandakali pitaka-mane pii okone ale yiake leakale nembo toto, Akali Andane oko bala namba towa atu atoto, namba minu tai laya yane. Alu mindi pusi kapua andane wete gene layone lene tupamane namba neai-yale tekeko, Akali Andane okomane namba molo-peke leane.

Taitasa 1:4

Nambato Kataisa lo bilipi leyo pua teke, Taitasa nimbatopi bala lo bilipi lele okonemane nimba nambana iwanane enene gulo atele. Nanima taputi pua meane akali Jisasa Kataisa-la, Ayiane Gote-la, okonelapo-mane nimba ondowa moyoto, nimbana yamapane mo tambo laya yakale lo pote loto, nambato nimbana pepa oko peyo epe leyo.