2 Atuutiqaġniaqtuŋa quviasugluŋa pisigilutin. Nanġaġniaġikpiñ, Qutchigñiqsrauruatiin God.
Quyanaaġikpiñ Ataniiq, iluqaaġlugu uummatiga; Atuġniaqtuŋa nanġaġlutin sivuġaanni iñuuraqpaich.
Atuqtuŋa quyyanmik uqausiġivlugiḷḷu aliuġnaqtuat savaatin.
Akimaniaqtuŋa akiḷḷimniñ avatimniittuaniñ. Qasalaaġluŋaasii quviasuunmi aitchuiḷuŋa Ilaan Aŋaiyyuvikpaŋani; Atuġniaqtuŋa, Nanġaġniaġiga Ataniq.
Ataniq suaŋŋatigigiga suli sapunniaqłuŋalu; Ukpiġigiga ilaa. Ikayuġuugaaŋakii suli qaamasuusiqł̣uŋa; Nanġaġiga ikiaqtalaaġnaqsivḷugu atuutinik.
Ullautiluŋaasii ilvich ikipkaivigñun, God-auruatiin; kaŋigigaatin uvva quviasuutigma. Atuqtuurallaġma nuqaqtiligmik atuġniaqtuŋa nanġaġutin ilvich, God-auruatiin, God-iiŋ.
Tamatkua aglaan navianaitchuaqsiuqtuat Iligniñ quviasugniaqtut; atuqtuaġisirut quviasuunmigni. Navianniuqtinniaġnagich Ilignik nakuaqsriruat; pisigivlutin quvianġurut iḷumutupiallak.
Quyanaaġiga Ataniq pitqiksiġautairrutaagun; Atuqtuŋa nanġautinik Ataniġmun, qutchigniqsrauruamun.
Iḷitchuġiyumaut kisivich Atanġutilaaġnik, qutchigñiqtauvlutin aŋalatchiruagurutin nunapayaurami.
Nanġaġniaġikpiñ uummatiga iluġaaġlugu, Ataniiq God-igiraqpiñ; Quliaqtuġniaġiga kamanaqtuaguniġiñ isuitchuamun.
Qanutun nakuutigiva quyyatiqaqtuni iliŋnun, Ataniiq, atuqtuniḷu nanġautinik qutchiksiḷiqłutin, Qutchigñiqsrauruatiin,
Kamanaqtuat savaaqpich, Ataniiq, quyatchaisuugaanŋa; pisigilugich savaaġiŋaratin, atuutiqaġniaqtuŋa quviasuunmik.
Iḷisimapkaqsiuŋ qaumanġa nunaqpauruanun, aliuġnaqtuat suaŋŋanmiñik savaaŋich iñupayaanun.
Quviasugitchi Ataniġmi iluaqtualiqirauruasi, quyyatiqaġlusi atqanun salumaruamun.
Ataniiq Sapiġñaqtuaguruatiin, atanniqsimagiñ nunapayaaq; Qutchiksuagułhaaqtutin iluqaiññiñ god-auruaniñ.
Atanġum quviasuusiġḷisi ataramik. Uqallautigivsaaġiga, quviasugitchi.