Luke 12:32 - Iñupiatun Mumiksat Uqalugiksuat

³² Iqsiñasi iñukitchuasii imnaich, qanuq Aapari iviġaumaruq atanniqsimasukłusi aasii qaunagilusi.

Luke 12:32 Iomraidhean Croise

Matthew 14:27

Tavra tavrauvvaa ilaan uqallautiŋagai, quviatchaktitausitchi. Uvaŋauruŋa. Iqsiñasi.

Matthew 20:16

Tavra Jesus uqallavsaaŋaruq, Tamatkua qamalliuruat paŋmapak salliġuutiniaqtut taimanigu, aasii salliuniataktuat qamalliġuurraulutiŋ.

Matthew 25:34

Tavrani Umialik uqallagniaqtuq taapkunuŋa taliqpiŋmi tuŋaaniittuanun, Qaisitchi, iviġaumakkusiaqaqtuasii Aapamniñ, kiŋuvaannaktaaġisiuŋ God-im atanniqsimavia ini itqanaiyaaguruaq ilivsiññun nunaqaŋa savaagumman.

Matthew 7:15

Nipuŋaitchitchi uqaqtauŋŋuaqtuanik God-mun, qanuq qaisuurut sagluqinnigukłutiŋ qiññaqaqłutiŋ imnaisun anniaqłiḷaitchuatun. Iliŋich ipiaġataqtut kaaksiuruatun amaqqutun anniaqłiġumiñaqtuatun ilivsiññik.

Luke 10:21

Taavrumani ikarraġmi Ilitqusiġiksuam quviatchaktinniġaa Jesus, aasii uqallaktiłługu, Aapaaŋ, Atanġuruatiin qiḷaŋmun nunamullu, quyyavigigikpiñ tamatkua iriqsimaŋakapkich isumaturuaniñ kaŋiqsisiqaqtuaniḷḷu, aasii satqummiqł̣ugich iñuŋnun ukpiġutiqaqtuanun miqłiqtutun. Aaŋ, Aapaaŋ, taamna piŋagiñ ilivich pisuutigivlugu iviġaumagivlugulu.

John 18:36

Jesus kiuŋagaa, Umialguŋitchuŋa mattumuŋa nunamun. Umialguguma mattumuŋa nunamun, kivgatka aŋuyakkayaqtut aitchuutautquŋiḷḷuŋa Jew-guruanun. Umialguŋitchuŋa nunam iñuŋiñun.

Acts 20:28

Qaunagisitchi ilivsiññun iluqaisalu ukpiqtuat, Ilitqusiġiksuam qaunagitquŋakkaŋi ilivsiññun. Qaunagisigik aŋaiyyuliqiruat God-mun, ilaan pigiliutiŋakkaŋi tuqqutaagun ilaan iġñiġmi.

Acts 20:29

Iḷisimaruŋa aullaanikkuma, iḷisaurriruat iḷumun inŋitchuanik iqsiñaqtuatun amaqqutun akunnaaġutiniaqtut ilivsiññun, aasii ukpiġutaiqsinniaġniaġaich ukpiqtuat.

Romans 6:23

Kiñaliqaa piḷuusiqirauruaq akiḷiusiaqaġniaqtuq tatavsaqtauluni isuitchuamun, aglaan God-im akiiḷaaq aitchuutigigaa iñuggun isuitchuaq tamatkunuŋa atausiŋŋuqatauruanun Christ Jesus-mun.

1 Corinthians 1:21

Qanuq God iḷumun isumaturuaq sivuniqaŋaruq iñuŋnun iḷitchuġiyumiñaisilaamiñik iliŋisa nanmiñiq isumattunmikkun. Aglaan iviġaumagiŋagaa annautisukługich iñuich ukpiġikparruŋ tusaayugaaġiksuaq, qiññaqaqtuaq asiḷiqqutitun nunam iñuŋiñun.

Philippians 2:13

Qanuq God savaktuq iḷuvsiññi piyummasiqsuqłusi sunik ilaan pitqukkaġmiñik suli taŋŋiqsillavlugich.

2 Thessalonians 1:11

Ataramik aŋaiyyutisuugivsi, aŋaiyyuvigivlugu God-ikput ilaanun nalliummatiliqsitquvlusi miqłiqtuġiyumiñaqsiḷusi, ilaan suaŋŋataagullu taŋŋiqsitaquvlugich savaalluatapayaurat piyumakkasi pianikkasiḷu ukpiġurri pisigivlugu.

2 Thessalonians 1:5

Tamatkua nalupqinaiyautaurut God-im nalaunŋaruakun isivġiutaanun, qanuq uvva ilaan nagliksaaqtitaupkaġaasi nalliummatiliquvlusi piqatauniksravsiññun ilaan atanniqsimmataani.

Hebrews 12:28

Aitchuusiaqaqapta umialgunmik aulayyaktauyumiñaitchuamik, quyyatiqaqta suli savautilluataġlakput God qiksigipiaġataġlugu,

James 2:5

Piviuttaġikkavsii aniqatiit, naalaġnisitchi, God-im piksraqtaaġiŋagai piiḷḷiuqtuat mattumani nunami piiḷḷiuquŋił̣ł̣ugich ukpiġunmi, kiŋuvaannaquvlugiḷḷu atanniqsimaviŋmiñi unniqsuqłiisauŋaruamik ilaan piviuttaġirimiñun.

2 Peter 1:11

Suli paġlakkusiaqaġluataġniaqtusi isiġuvsi isuitchuamun atanniqsimavianun Atanipta Annaurriptalu Jesus Christ.

Revelation 22:5

Suli unnuaqaġniaŋitchuq, piqaqtuksrauŋaiġñiaqtut qaummaŋanik qullium naaggaunnii siqiñġum, qanuq Ataniq God qaummatiginiaġaat, aasii iliŋich atanniqsimanniŋniaqtut umialiktun taimuŋa isuitchuamun.