Genesis 1:1 - Iñupiatun Mumiksat Uqalugiksuat

¹ Aullaqisaami, God-im savaŋagaik qiḷaglu, nunalu.

Genesis 1:1 Iomraidhean Croise

2 Kings 19:15

aasii aŋaiyyuaqsivḷuni, “Atanġuruatiin, God-iŋa Israel, aquppiruatin aquppiutaqpagni qulaanni isaġuligaat cherubim, kisivich God-aurutin, aŋalatchivḷutin umialgutiŋiñik nunam. Ilvich savaŋagikiñ nunalu qiḷaglu.

Makpiġaaŋa Job-gum 26:13

Aniġniŋata qiḷak niptaqsiŋagaa, argaŋata tuqunŋagaa qimaaruaq niġrułłuk.

Makpiġaaŋa Job-gum 38:4

Inŋavich savakkapku maŋŋuŋa nunaqpaum? Iḷisimavaitkuvich, quliaqtuaġutiŋŋa.

Makpiġaaŋa Job-gum 9:8

God kisimi isivsiŋaruq qiḷagmik naakkaunnii nutqaqtinnialavlugich iŋiulgich isigamiñik.

Psalms 102:25

Iŋiḷġaan inillaŋagitin maŋŋuŋich nunam, suli ilvich argagnik savaŋagitin qiḷaich.

Psalms 104:24

Ataniiq, araa savaŋaratin iñugiakpaktut! Isumattutigni savaaġiŋagitin iluqaisa! Nuna siḷivinŋaruq savaaġnik iñuuruanik.

Psalms 104:30

Aniġniksritkapkich, tavra iñuguġaqtut; nutauruamik iñuggunmik qaitchiraqtutin nunamun.

Psalms 115:15

Atanġumtuq quviasaaġumagaasi, savaŋaruam qiḷagmiglu nunamiglu!

Psalms 121:2

Ikayuusiakaaġa qaisuuruq Ataniġmiñ, savaŋaruamiñ qiḷaŋmiglu nunamiglu.

Psalms 124:8

Ikayuusiaqput qaisuuruq atqagun Atanġum, savaŋaruam qiḷaŋmiglu nunamiglu.

Psalms 134:3

Atanġumtuq, savaŋaruam qiḷagmiglu nunamiglu, quviasaaġlisin Zion-miñ!

Psalms 136:5

Ilaata isumattutimigun savaŋagaich qiḷaich; ilaan nakuaqqutaa isuitchuamun ittuq;

Psalms 146:6

Savaŋaruaq qiḷaŋmik, nunamik, suli taġiumik, suli supayauranik ittuanik tavrani. Ilaata taŋŋiġuugaich unniqsuqłiisigiŋarani;

Psalms 33:6

Atanġum inillaktuaŋagai qiḷaich piraksriqsuunmigun, siqiñiq, tatqiq, uvluġiallu uqallaunmigun.

Psalms 33:9

Uqallagman, nuna savaaguŋaruq; piraksriimman sunapayaaq niptaŋaruq.

Psalms 8:3

Qiñiġaluaqapku qiḷak, Ilvich savaan, tatqiq uvluġiallu, inillaktuakkatiin iniksrallaaŋiññun—

Psalms 8:4

suunnaumavat makua iñugruiññat isummatigillakapkich; iñułhiñat, qaunagiratin?

Psalms 90:2

Iġġich savaaguŋaiñŋaisa naakkaunnii nuna iluqaan savaŋaiñŋaan, isuaniñ qaŋa God-aurutin isuanun aglaan.

Psalms 96:5

Allat god-auruat allani nunaqpaupayaaqtuani iñuuraqpałhiñaurut, Atanġum aglaan savaŋagaich qiḷaich.

Exodus 20:11

Itchaksrani uvluni uvaŋa Atanġuruaŋa savaŋagiga nuna, qiḷak, taġiuq, suli sunapayaaq ittuaq taapkunani, aglaan tallimat malġuanni uvlut unaŋuiqsiŋaruŋa. Tavra tainnamik uvaŋa Atanġuruaŋa ilaaguaŋagiga nalunaiqł̣ugu Sabbath salumarualiuqługulu.

Exodus 31:18

God-im uqautiŋaiġamiuŋ Moses Mount Sinai-mi aitchuŋagaa malġuugnik uyaqqagnik aglagviigñik ilaata aglaamiñik piraksriutauruanik.

Proverbs 16:4

Sunaliqaa Atanġum savaaŋa sivuniksraqaqtuq; aasii sivuniksraŋa pigiiḷḷiqirauruam suksraunġiġñiq.

Proverbs 3:19

Atanġum nuna savaŋagaa isumattunmigun; iḷisimmatimigun siḷa iḷiŋagaa.

Matthew 11:25

Tavrani Jesus uqallaŋaruq, Quyyavigigikpiñ, Aapaaŋ, Atanġuruatiin qiḷaŋmun nunamullu, iriqsimaŋakapkich iḷumun ittuat pisin isumatunasugiruaniñ iḷisimanasugiruaniḷḷu, aasii satqummiqł̣ugich iñuŋnun miqłiqtutun ittuanun.

Mark 13:19

Taipkunanikiataŋ uvluni iñuich nagliksaałhamaaġniaqtut qaŋapaŋmiñ God-im qaŋa savaŋmagu nuna. Aasii tainnatun nagliksaaqtigitqikkumiñaiñmiut aquagun taavruma.

Acts 14:15

Aŋutiit, summan tainna pivisi? Uvaguktauq uvva aŋutik iñugruiññaak irrusiqaqtuak ilivsisuttauq. Aasii maaniittugut alġaqsruutigisukługu tusaayugaaġiksuaq, mumiquvlusi tamatkunaŋŋa taŋiġitchuaniñ suniñ, iñuuruamun God-mun savaŋaruamun qiḷaŋmiglu nunamiglu taġiumiglu imaġikkaŋiñiglu.

Acts 17:24

God savaŋaruaq nunamik suli supayaanik imaġikkaŋiñik, Atanġuruq qiḷaŋmullu nunamullu, iñuuviqapiaġniaqtuksrauŋitchuq ininik iñuich savaaŋiññik.

Acts 4:24

Tavra tusaakamirruŋ taamna, iluqaġmiŋ aŋaiyyuqatigiirraqsiŋarut God-mun, uqallakłutiŋ, Sapiġñaqtuaq Ataniq, savaŋaruatiin qiḷaŋmik, nunamiglu, taġiumiglu, suli supayaanik imaġikkaŋiññik,

Romans 11:36

Qanuq God-im kisimi supayaat savaŋagai. Supayaat ittut suaŋŋataagun God-im. God-im savaŋaniġai kamanaqsiḷiqtausukłuni. Nanġaqtauli God isuitchuamun. Amen.

1 Corinthians 8:6

uvagulli iḷisimarugut atausisualuŋmik God-mik Aapamik, savaŋaruamik supayaanik, suli ilaa pisivlugu iñuurugut. Iḷisimammiugut atausisualuŋmik Ataniġmik, Jesus Christ-mik, ilaagun supayaat savaaguŋavlutiŋ, suli ilaan aitchuŋagaatigut iñuggunmik isuitchuamik.

Ephesians 3:9

Suli God-im piraksriŋagaaŋa kaŋiqsiñaqsitquvlugu ilaan sivunniuġutigiŋarani iñupayaanun, annaurrauniksraŋat iñupayaurat Jew-guŋitkaluaqtuat Jew-guruallu. God-im savaŋaruam supayaanik, nalunaqtinŋagaa aippaapak taamna sivunniuġutini.

Hebrews 1:10

God uqallavsaaŋaruq, “Ilivich Ataniiq, inillaŋagiñ nuna isuaniñqaŋa, suli qiḷak savaŋagiñ.

Hebrews 1:2

aglaan makkunani aqulliġñi uvluni ilaan uqautiŋagaatigut uqaqłuni Iġñiġmigun, nalunaiqsamigun kiŋuvaannaquvlugu supayaanik, ilaan piqatigivlugu Iġñiq savaŋavlugich supayaurat.

Hebrews 11:3

Ukpiġutiqaqłuta kaŋiqsigikput God-im uqaluŋmigun nunamik savaŋatilaaŋa, tamatkua sut tautugnaqtuat savaaguŋatilaaŋannik suniñ salapqiŋitchuaniñ.

Hebrews 3:4

Qanuq igluqpapayaaq iñuum nappaŋagaa, aglaalli God savaŋaruq supayaanik.

2 Peter 3:5

Piiguqsaaġirut uumiŋa. Iŋiḷġaan God uqallaŋman qiḷaiḷḷu nunalu savaaguŋarut. Nuna nunaġuŋaruq immamiñ immakullu,

1 John 1:1

Tuyuġivsi sivuniġivlugu taggisiqaqtuaq Uqaluŋmik iñuunaqtuamik. Ilaa inŋaruq aullaqisaamiñqaŋa. Uvagut tusaaŋagikput tautuŋagikpullu naipiqtuqługu isumalaaġutigivlugu, suli aksiukkayukługu argaptiŋnik.

Revelation 10:6

aasii kiliŋniŋaruq pisivlugu God iñuuruaq taimuŋa isuitchuamun, savaŋaruaq qiḷaŋmik suniglu qiḷaŋmiittuanik, nunamiglu nunamiittuaniglu, taġiumiglu taġiumiittuaniglu. Isaġulik uqallaŋaruq, God piñatchiaŋaiqsaqtuq tavraŋŋaaglaan.

Revelation 14:7

Tavra ilaa uqallaŋaruq nipatuvluni, Qiksiksrautiqaġitchi God-mun nanġaġlugu kamanautaagun, qanuq isivġiiñiksraŋa iñuŋnik tikitchuq. Puttitchi qiksigilugu sivuġaanun God-im savaŋaruam qiḷaŋmik nunamiglu, taġiumik maqsraluktuanik imiġnik.

Revelation 21:6

Suli ilaan uqallautiŋagaaŋa, Naataniktut, Uvaŋa Alpha-uruŋa Omega-lu, aullaqisaaq isuuruaġlu. Kimulliqaa imiġuliqsuamun aitchuutiginiaġiga imiq akiiḷaaġlugu taavrumaŋŋa maqisaġvianiñ imġum iñuunaqtuam.

Revelation 22:13

Uvaŋa Alpha-uruŋa Omega-lu, sivulliq aqulliġḷu, aullaqisaaq isuuruaġlu.

Revelation 3:14

Suli isaġulganun aŋaiyyuvium Laodicea-mi aglagiñ. Uqaluŋiñik Amen-guruam, ukpiġnaqtuam iḷumullu iḷitchuġipkairuam God-im iḷumun ittuaŋanik, aullaqisaaguruaq iluqaiññun God-im savaaŋiñun.

Revelation 4:11

Ataniqpuut God-ikpullu, nalliummatirutin ilivich aitchuusiaqaġuvich nanġaunmik qiksiksraunmiglu ataniġnaqunmiglu, qanuq ilivich savaŋagitin supayaurat, suli ilivich pisuutipkun igliqtut savaaguŋarullu.