LUKAS 11:9 - Nanduk Ngget Tul Pidnak Wene

⁹ Iri ala-ge, an-nen yak kundusu yur-o: Nggi yer-o. Nggi yogola-ge, wok kunduwa-o. Kore yer-o. Kore yogola-ge kagub-o. Tu mende lel lel ker-o. Lel lel kagola-ge, tu kuwarak kunpuwa-o.

LUKAS 11:9 Iomraidhean Croise

NDAWI ENGGA 118:5

An-e anggun panggun arem woralat-nen Nagawan Indo eram wene pil lasola-ge, at-nen nene erep nggarosolar-e, wisirik nibij-o.

NDAWI ENGGA 27:4

An-nen nindi perasu-ge misiget yu nak Nagawan Indo ebem nggi yusu-o. Misiget ukwe yusu-ge yu nag-o: Nagawan Indo-nen konak nak kwat noboso elem iri na-ge an nerengen-nen kasolat, ndemel nuburuk noso elem nggi yosolat yurak pem an woralar-e, kat kama nak wolmomtak irit ukwe-o.

NDAWI ENGGA 27:8

Kat-nen yosolar-e: ”An nogore yi-o” yigen na-ge an-nen yosolar-e: ”Nagawan Indo wa-e. An-e kogore yimin-o” luk yigi-o.

NDAWI ENGGA 34:10

Singa ndakngge ereba-ge naso mende lak me nere kaso-t nde, Nagawan Indo-nen yidnak yidnak kwatli nab-e yi mende ndi mende ukwe lak, ndak irit worali-o.

NDAWI ENGGA 34:4

An-nen Nagawan Indo eram tepan yosola, at-nen onggo yij-o. Onggo yosolar-e, an-nen kwiye kaso oboksa lak tak pij-o.

YESAYA 45:19

An-nen wene yosolar-e, kurak kurak yosolat, mbik mbok kurasa yosolat iri-ge yoso bug-o. An-nen-e nilirak Isarael nab-e we ereba-t nogore yuwakluk, ’Nin nggwe nogore yer-o’ luk yak ondoso bug-o. Nagawan Indo an-nen-e ndemeret nak yak ondosolat, ndemeret wene iri nag-et enaru rak posolat kwaroso-nen yusu-o” luk yij-o.

NDANIEL 9:3

Karug-e, mondok kiri keresa Nagawan Indo Mbal Pem Nagawan emengen mbarosolar-e: ”Nenabuwa ki-o” luk yak tigi-o. Iri kwarosolar-e, inndi puru yogolat-nen yurugwi karung sum iri na yutluk, mburu ninggit lak, tepan nak yosolat mabe bem irit koreyak woragi-o.

MATIUS 21:22

Kit kinndi angin tubu luk, tepan yogolat-nen nggi yugup mende-ge wanugub-er-o” luk yij-o.

MATIUS 21:31

Nde, li mberen iri na-ge at eid indi-n pidnak kwarij-e ta kali-o?” luk yak ondosoloma-ge, it-nen yogolar-e: ”Ambara manggu irir-o” luk yogola-ge, Yesus-nen it yak ondosolar-e: ”An-nen yak kendeyeg-o: Mbal Pem Nagawan-nen tenagaidnak wi nggogolar-e, kit abok tak kunpurak, pemerinta enmanggim tol ndok wurugwi nap min terak ye inpil nugwi kwami min, it nanduk nde nggwili-o.

MATIUS 6:29

an-nen yak kendeyeg-o: Salomo iri-ge nagawan arengge worag-et nde, usum erare-ge engen isi ereba erare nggal ndak ndak yirigit lag-o.

MARAKUS 11:24

Iri bem-e, an-nen yak kendeyeg-o: Kit-nen tepan pem nggi yugup tengge-ge ’Mbal Pem Nagawan-nen abu wok nendamu-o’ peraruk, kinndi angin tubu yugup pem-e, wok kunduwar-o.

MARAKUS 13:37

’Yik karok wolmer-o’ luk yak kundusu yu-ge ap pidsa min-et yak undusu-o” luk yak indij-o.

LUKAS 11:10

Nde, nggi yuwa nab-e wog-et tuwa-o. Kore yuwa nab-e kujwa-o. Tu lel lel kujwa nab-e tu kuwarak ubuwa-o.

YOANES 14:13

Nde, an nebem-nen Neid kek tak puwakluk, an nunu bem kit-nen nggi yugub mende-ge pidsa kwat kinpimin-o.

YOANES 15:16

Kit-nen an len nibigit lag-o. Alat nde, an-nen len kunpuruk, kit-nen-e engen kwarat pogolar-e, pem-et woralik nalik momtak engen pobokluk-nen an-nen wirik kinpigi-o. Nde, an nunu bem an Neid nggi yak tugup mende-ge, iri na-t wok kunduwa-o.

YOANES 15:7

Kit-nen nde an narem puksa woragolat, an-nen yidnak wene na kit kenarem woralat-nen kit kindingen mende mbi Neid eram nggi yogola-ge, wog-et kunduwa-o.

YOANES 4:10

Yosoloma-ge, Yesus-nen kwe na yak tosolar-e: ”Mbal Pem Nagawan-nen onggo lag-et we wok ondoso mende min kat kebem yi nggi yidnak nap an min karu nggal-nen-e kat-nen ’Yi kenang niri-o’ luk yak norosola-ge, an-nen-e unlug-et wolmomtak yi wok ketleb-o” luk yak tij-o.

OROMA 2:7

Ap erep-nen-e konak mende nak kwarogolar-e, Mbal Pem Nagawan unu nak kek tak purak nak kore yogolat, at erembel wanurak nak kore yogolat, pem-et wolmomtak nak kore yili nab-e Mbal Pem Nagawan-nen unlug-et pem-et woralik nalik wolmomtak elem wok unduwa-o.

2 KORINTUS 6:2

Mbal Pem Nagawan-nen yosolar-e: ”An nalen yidnak tarem-e kit kenne kuligi-o. Kinmiri yurak tarem-nen-e an-e yongga kindigi-o” luk yij-o. Ndemerer-o! Mbal Pem Nagawan alen yidnak tarem-e yawor-o. Kinmiri yurak tarem-e yawor-o!

IBERANI 11:6

Nde, ap-nen-e Mbal Pem Nagawan ebem indi angin tubu yigit lak ala-ge, Mbal Pem Nagawan-nen-e ap iri ebem-e alen kujwa bug-o. Nde, Mbal Pem Nagawan eram lobok yuwa nap-nen perasolar-e: ”Mbal Pem Nagawan-e ndemeret worasu-o” yuruk, ”Mbal Pem Nagawan-nen-e kwara at ogore yuwa nap na onggo wok unduwa-o” luk wene na bem indi angin tubu yosolat wolmag-o.

IBERANI 4:16

Iri bem-e, Mbal Pem Nagawan indi op koreyak worasu sa at eram wok yogolar-e, ninndi kwiye lag-et wok yuwog-o. Nit nenabuwa kasolat, nit ninndi kabak yidnak tarem-nen we irit yongga nunduwakluk wok yuwog-o.

YAKOBUS 1:5

Ap mbi kit kennggendumu indi tenggerak elem wanigit lak worala-ge, indi nggat nggat elem na wok tuwakluk Mbal Pem Nagawan ebem nggi yurag-o. Nggi yosola-ge, Mbal Pem Nagawan-nen enabuwa karuk, indi konag-et ap pidsa we wok ondoso me, wok tuwa-o.

YAKOBUS 5:15

Nde, inndi angin tubu yogolat-nen tepan yogola-ge, kugi worak nap iri kugi lak tak puruk, Nagawan Indo-nen ki rak puwa-o. Nde, at-nen meya kwaridnak mbi worala-ge, amberam tak puwa-o.

1 YOANES 3:22

Nit-nen-e at-nen yidnak yidnak nak kwarogolat, at-nen peraso mende nak kwarogola-ge, at ebem nggi yul mende pidsa wok nunduwa-o.

NAM PARA WENE 2:24

Alat nde, kit Tiatira woragwi nap erep-nen-e mul ondoso wene meya iri na wanigit lak yogolat, Sere wene owak iri na kenaru yigit lak yigeb-o. Nde, iri yigep pem-e, kit angin tak kunpurak mende kenpem pimin pug-o.