ZAKHARIA 9:16 - Alkitab Singog In Mongondow Masa In Tanaa

¹⁶ Aka singgai tatua moiangoi, ki Tuhan in moposaḷamatbí kon umat-Nea, naonda bo gombala moposaḷamat in dombanea nongkon anib. Mosia in monindarbí kon butá i Tuhan, naonda bo permata mahkota inta mopouḻi-uḻinag.

ZAKHARIA 9:16 Iomraidhean Croise

MAZMUR 100:3

Toropdon kon ki Tuhan tua in ki Allah. Sia in nomaḻí kon inaton bo Sia in kitogi kon inaton; kita in umat-Nea, bangusa inta iḷukadan-Nea.

IḶUAIAN 28:21

Kon batúan in permata musti popokurig in tangoi tobatú nongkon sigad i adí Yakub inta mopuḷú bo doyowa nobaḻí tompoingat kon suku mita Israel.

IḶUAIAN 28:9

Pogamá kon batu delima doyowa. Potayakdon kon intau inta mopandoi monontaḷ kon buḷawan sin popokurig in pais in tangoi i adí mita i Yakub inta mopuḷú bodoyowá kon batu podudui in umur monia, togogonom in kon batu tobatú. Bo batu permata doyowa tatua musti bongkowon in buḷawan bo poukat kon tontogot in obaga in ḷambung epod mobaḻí tanda tompoingat kon suku Israel inta mopuḷú bodoyowá. Natuata in pinododia i Harun kon tangoi monia inta ain pinopokurig kon batu inta kon obaganea, sinbá Akuoi ki Tuhan, umuran mokotorop kon i monia.

YESAYA 40:10

Indoiai, ki Tuhan Allah in namangoi takin kawasa sin mogaid kon oaidan pongin ropot-Nea. Sia in sinakinan in intau mita inta ain pinoḷuat-Nea.

YESAYA 54:12

Benteng mita posindogon-Ku nongkon batu delima, Bonawangmu mita in nongkon batu permata, dindingmu mita in nongkon batu ratna mutu manikam.

YESAYA 60:14

Adí mita in intau mita inta nondorot kon inimu in mamangoibí tumungkud, inta nokoimontandon noningkuḻe kon inimu in mohoromatbí, iko in tangoionbí ‘Kotá in Tuhan’, ‘Sion, Kotá i Allah Mokudus in Israel’.

YESAYA 60:3

Bangusa mita in moyo-moyodudui in mamangoi kon bayagmu, datu mita in moibog kon sindar inta nomuká kon inimu.

YESAYA 62:3

Iko in mobaḻí naonda bo mahkota mogaga kon ḻima i Tuhan, mahkota in dodatuan kon ḻima i Allahmu.

YEREMIA 23:3

Táe ki agat in umat-Ku in sipunon-Kubí nongkon butá mita inta pinoḷumbúan kon i monia. Mosia in diaan-Kubí buí kon butá monia bo bui monia in modugangdon mobarong.

YEREMIA 31:10

Ki Tuhan in noguman, “Indongogai ei bangusa mita! Potaaudon in koyow-Ku modapot kon ḷoḷan in dagat Umat-Ku inta ain pinorarit-Ku in sipunon-Kubí bo biagon naonda bo gombala moḷukad kon dombanea.

YEREMIA 31:11

Umat in Israel ain pinosaḷamat-Ku, bo pinoḷuat-Kudon nongkon bangusa inta moropot.

YEHEZKIEL 34:11

Ki Tuhan Inta Totok in moḷantud in noguman, “Tayakon-Kudon tontaní in domba-Ku mita bo tompiaan in mosia,

YEHEZKIEL 34:12

naonda bo gombala motayak bo mosipun kon dombanea mita inta noirarit bo bui tompiaan. Mosia in diaan-Ku bui nongkon tampat mita inta kinoraritan monia kon singgai inta nosindip bo inta diá mopia tua.

YEHEZKIEL 34:31

Totuu, moikobí in paanan in domba-Ku inta pinokaan-Ku. Moiko in umat-Ku, bo Akuoi in ki Allahmu. Akuoi ki Tuhan Inta Totok in moḷantud ain nosingog.”

MIKHA 5:4

bo Sia in mobogoi in kobiagan modame. Aka tontara in Asyur monubu kon butá naton bo mondangat kon poḷoḷukadan naton, yo itoi mita naton inta moropot totok in potabádon momarang kon i monia. Itoi mita naton tatua in monaḷowdon kon Asyur podoyon kon ropot in pakakat in parang, bo moposaḷamat kon i naton nongkon kawasa monia.

MIKHA 7:14

O Tuhan, ḷukadaidon in umat-Mu, umat inta piniḻí-Mu. Mosia in nogutun noitontaní kon kayuon mai-maí, kon yuak in butá inta mopia. Biódon mako in mosia mokouḻí kon kaanon kon rawang bonok in Basan bo kon Gilead ná dungkuḷmai.

ZEPANYA 3:20

Moiangoibí in orasnea, intaumu inta noirarit in kapiton-Ku mobui. Moiko in baḻíon-Kudon ponango-nangoian kon sinangkub in butá, bo kototomomanmu in poguḻiton-Kudon bui.” Ki Tuhan in nosingogdon.

HAGAI 2:23

Kon singgai tatua iko Zerubabel, mogogundoi-Ku, in baḻíon-Ku pomarenta podoyon kon tangoi-Ku. Sin ikobí inta ain piniḻí-Ku.” Ki Tuhan Inta Totok in Mokawasa ain nosingog.

ZAKHARIA 10:6

“Intau in Yohuda in iropotan-Kubí, umat in Israel in posaḷamaton-Ku. Diaan-Ku in mosia mobui mangoi kon butánea popisí in Akuoi motabi kon i monia. Popoaid-Kubí kon i monia naonda bo bangusa inta diá kon dodai in onda in iḻiong-Ku. Akuoibí in ki Tuhan Allah monia, bayongan in sambayangnea in indongogan-Kubí bui.

ZAKHARIA 8:23

Kon singgai mita tatua mopuḷú in intau ango-angoi in mamangoi kon intau in Yahudi tobatú bo moguman, ‘Kami in moibogbí doman in mopia ná moiko; sin dinongogdon nami kon ki Allah in nomarakat kon i monimu.’ ” Ki Tuhan Inta Totok in mokawasa ain nosingog.

LUKAS 12:32

“Moiko inta tongá topiḻik, dikabí moondok! Sin mosanangbí in gina i Amámu in mobogoi in barakat kon i monimu kon bonu in kawasa-Nea.

YOHANES 10:27

Domba-Ku mita in mokidongogbí kon singog-Ku mita. Kinotaauan-Kubí in mosia, bo mosia in dumuduibí kon i-Nakó.