ZAKHARIA 8:12 - Alkitab Singog In Mongondow Masa In Tanaa

¹² Mosia in moponimboibí in bibit takin dame. Pangkoi mita in anggur monia in momungaibí, butá in mopoḷuaibí in bungainea, bo uyan in umuranbí morogot. Bayongan in barakat tatua in ogoi-Kubí kon bangusa mita inta nobiagpa nongkon bangusa tanaa.

ZAKHARIA 8:12 Iomraidhean Croise

KINOBAḺIAN 26:12

Ki Ishak nonompinomuḷa kon butá tatua, bo taong tatua sia in nokouḻí kon bungai in boyó mogatut noguntuḷ nongkon onu inta pinomuḷanea, sin ki Tuhan nomarakat kon inia.

KINOBAḺIAN 27:28

Igumon mako iko ogoian i Allah in topuot nongkon ḷangit, bo baḻíonnea in gobámu mita motoḷubú! Poigumon mako Sia in mobogoi kon inimu in gandum bo anggur inta mobarong totok!

DATU MITA IMITÁNEA 17:1

Oyúon in nabi tangoinea in ki Elia. Sia in nongkon Tisbe, kotá tobatú kon butá in Gilead. Kon singgai tobatú namangoi in sia kon i Datu Ahab bo noguman, “Pinodoyon kon i Tuhan inta nobiag, Allah inta sinumba in intau in Israel bo inta pinogundoianku, akuoi in mopotaau in naa kon i Tuang, kon bonu in doyowa andeka toḷu notaong moiduduimai naa in diábí in oḷú andeka uyan tongopiḻikmai, koḻikudbí in aka pogumankudon.”

MAZMUR 72:3

Igumon mako butá nami in motomoman bo mobiag motompia, bo inta moadil oyúon kon bayongan in bangusa.

MAZMUR 85:12

Kososatia in intau in mobiagbí nongkon butá, bo kooadil i Tuhan in moḷongowbí monag nongkon ḷangit.

AMSAL 19:12

Torú in datu naonda bo ganggor in singa; kopopia in datu naonda bo oḷú inta momobat kon mobobiag mita.

YESAYA 30:23

Aka moiko bo momunak, ki Tuhan in mopoangoi in uyan sinbá mobiag in pinomuḷamu tatua bo mobogoi in bungainea inta mobarong totok. Bo kon bobiagonmu in sadiaandon in bonok pongaanan monia inta mobendar.

YESAYA 61:7

Popisí in moiko ain pinokopo oyámai totok, bo tamak takin inta nohina ain nobaḻí silaimu, dá moiko in mokouḻí kon warisan kodua in kobayongnea kon butámu bo mokouḻí kon ḷunganga in gina mononoi.

YEREMIA 31:12

Mosia in mamangoi in Tombuḷud in Sion takin pogot motamburiang, poḷat modondong takin pia in gina popisí in bayongan inta inogoi-Ku kon i monia, gandum, ḷana, anggur, sapi bo domba. Mosia in mobaḻídon naonda bo taman inta mobayong in tubignea, bo diábí kodaitan in onu bo onu.

YEHEZKIEL 34:28

Mosia in diá bidon pogagowan in bangusa mita inta diá nonotaau kon i-Nakó, andeka domokon in mahaḷuk mita moraat. Mosia in mobiag bidon motompia bo mooyúon, bo diá bidon in tobatúmai in intau in mopogogondok kon i monia.

YEHEZKIEL 36:12

Umat-Ku Israel, in diaan-Kubí mobui bo mogutun kon butánea bui. Butá tatua in mobaḻídon kapunyaan monia tontaní bo umuran mobogoi in bungainea dá ki adí mita monia in diádon matoi bui in gogoy.’

YEHEZKIEL 36:30

Dugangan-Kubí in kotoḷubú in pangkoi mita in ayopmu bo bungai mita in pinomuḷa kon gobámu, dá moiko in diádon kon dodai in onda moiyitak kon malarat in kaanon inta mokoraat kon tangoimu kon sigad in bangusa mita.

YEHEZKIEL 36:9

Akuoi in kon dotámu ei Israel, bo tantúon-Kudon kon butámu in pasoḷan bidon bui bo amboran bui in pinomuḷa.

HOSEA 13:3

Tuamai in intau mita tatua in moinggamábí naonda bo topuot andeka oḷú doḷo-doḷom. Mosia in mobaḻídon naonda bo ḷobud in baḻeká inta inirup in tompot kon poḷoḻintogan kon gandum, bo naonda bo poyok inta iḻumuai nongkon bubú in poyok.

HOSEA 14:5

Ki Tuhan in noguman, “Umat-Ku inta nonuaḻing, gamáan-Ku bui bo kotabi-Ku takin ḻimbatú in gina; mosia in diá bidon torúan-Ku bui.

YOËL 2:19

Sia in notubag kon i monia nanaa, “Tanaa in moiko komintan in ogoian-Ku: in gandum, anggur bo ḷana in zaitun sin kaanon, sinbá moiko komintan in pobotugon. Diábí pomayá-Ku mako in singkuḻeon in moiko andeka kosingan in bangusa mita.

YOËL 2:22

Ei mahaḷuk mita, dikadon moḻia-ḻiaw in gina. Rawang mita in bonok tanaa in iḷumunowdon. Pangkoi mita in kayu modatog in bungainea, bungai mita in anggur bo ara mobarongdon totok.

IMAMAT 26:3

Aka moiko mobiag moidudui kon atorang-Ku mita bo dumudui doman kon parenta-Ku mita,

ZEPANYA 3:13

Intau in Israel inta kiagatnea, diá bidon mogaid bui kon inta moraat kon i inekabí; mosia in diá bidon monguboḷ bui bo diá bidon bui mongakaḷ. Mosia in mobiag bidon motomoman bo motompia, bo diá bidon angoian in ondok kon i inekadon.”

HAGAI 1:10

Tuamai in uyan diádon moḷabú monag dá diádon in pinomuḷa in mobiag.

HAGAI 2:18

Kon singgai tanaa, singgai indoyowa nopuḷú bo opat buḷan in siownea, dodatoḷan in Baḷoi-Ku noḷapatdon pinoḻitú! Taridiai onu in mobaḻí pangkoion kon tanaa mako.

HAGAI 2:19

Umpaka diádon in kiagat in gandum, bo pangkoi in anggur, pangkoi in ara, pangkoi in delima bo pangkoi in zaitun diápa nomungai, táe pinangkoi kon tanaa Akuoi in momarakatdon kon i monimu!”

ZAKHARIA 8:6

Soaḷ tatua in koontongan diá kumaan kon akaḷ kon intau mita inta nobiagpa nongkon bangusa tanaa, táe diábí in diá kumaan kon akaḷ-Ku.

MALEAKHI 3:11

Diábí pomayá-Ku mako in pangkoḷá momoguyaat kon bungai in boyómu, pangkoi mita in anggurmu in modatogbí totok in bungainea.

MATIUS 6:33

Táe, tayakpa muna in ki Allah bo aidaidon onu inta kinoibog-Nea. Dá komintan tua in ogoi-Neabí doman kon inimu.

KORINTUS 1 3:21

Tuamai in dikabí moduí kon intau, sin bayongan yagi-yagi in nodait bidon inogoi kon i monimu.

ULANGAN 32:2

Poigumon mako in topotundúku mamonag naonda bo uyan, bo tosingogonku motait naonda bo oḷú, naonda bo rinsi-rinsik in uyan kon tudu in bonok, bo uyan inta morogot kon pinomuḷa mita.

ULANGAN 33:13

Bo kon buí i Yusup sia noguman: “Igumon mako in butá monia barakatan i Tuhan in uyan, bo tubig nongkon ḻimonag in butá.

ULANGAN 33:28

Dá buí i Yakub in mobiagbí takin diá in tongkuḷabot kon butá inta nopuḻing in gandum bo tubig in anggurnea, bo binutakan in topuot nongkon ḷangit.

YAKOBUS 3:18

Soaḷ inta mopia tua bungaibí in bibit dodamean inta inambor in intau inta moibog in dodamean!