ZAKHARIA 4:2 - Alkitab Singog In Mongondow Masa In Tanaa

² “Onu in inontongmu?” iḻibónea. “Totuduan in togá tobatú nongkon buḷawan,” tubagku. “Kon popodnea monik oyúon in pobobonuan kon ḷananea, bo kon ḻibuneamai pitu in togá, inta kon batúannea tumopopitu in sumbu.

ZAKHARIA 4:2 Iomraidhean Croise

TAWARIKH 1 28:15

kon batúan in togá bo sioḷnea,

TAWARIKH 2 13:11

Pomuḷoi in doḷo-doḷom bo ḷoḷabungnea motubá in mosia kon dupa bo moposumba in kuruban angagon kon i Tuhan, bo poḷat moposadia in roti oḷudon. Pomuḷoi in doḷom mosia mopoyongkit in togá mita inta kon tudu in pototuduan kon togá nongkon buḷawan. Kami in umuranbí dinumudui kon parenta mita i Tuhan, táe moiko in nonaḷámaidon kon i-Nia.

TAWARIKH 2 4:7

Pinomianea doman in 10 in totuduan togá nongkon buḷawan podudui in model inta ain sinomayá, bo 10 in meja. Bayongan in sioḷ in totuduan togá bo meja tatua inukat kon bonu in yuang totokanea kon Baḷoi Tuhan – kon batúannea in ḻima kon dotá in koḷoigi, bo ḻima doman in kon dotá in koḷanannea. Pinomianea doman in 100 in palo buḷawan.

MOHOHUTUBA 12:6

Rante saḷaka in mobontow bo moyo-moyotondi; togá buḷawan moḷabú bo moḷosi; tontogot in totayuk mobontow bo mogoguyaat; seré morimumud bo moirarit.

YEREMIA 24:3

Bo ki Tuhan in noguman kon inakó, “Yeremia, onu in inontongmu?” Akuoi in notubag, “Bungai in ara, Tuhan. Inta mongopia in totok in mopia, bo inta nongoburuk in totokdon in diá mopia dá diádon motaau kaanon.”

YEREMIA 52:19

Pakakat mita buḷawan bo saḷaka, noitakin doman palo mita nointok bo tampat in baga, palo mita inta pototagúan kon dugú in mahaḷuk inta iratá sin pokuruban, tampat in ḷobud, sioḷ in togá, palo mita pototubáan kon dupa, bo palo mita pobonuan kon sosumba tubig in anggur, komintan ginamá tontaní i Nebuzaradan.

AMOS 7:8

Sia in noḻibó kon inakó, “Onu in inontongmu, Amos?” Akuoi in notubag, “Tontogot pogukur noisindog notuḻid, Tuhan.” Bo ki Tuhan in noguman, “Akuoi in mopomaké in tontogot tanaa sin mopoontong kon umat-Ku in naonda bo dinding inta diá motuḻid. Akuoi in diá bidon momaḷui bui kon tomayá-Ku, notantú bidon kon hukumon-Ku in mosia.

ZAKHARIA 5:2

Malaekat tatua noḻibó mongo onu in inontongku. Tubagku, “Tobatú ḻitodan in buk pinoḷayug in tompot. Kobanatnea in siow nometer bo kooḷadnea in opat nometer bo tobotak.”

WAHYU 1:12

Akuoi in nobobui ná tumi sin moindoi mongo ki ine inta noguman kon inakó tua. Bo inontongku pitu in sioḷ pototuduan kon togá inta pinomia nongkon buḷawan.

WAHYU 1:20

Naabí in rahasia in tundi pitu inta inontongmu kon ḻima-Ku koḷanan, bo pitu in sioḷ pototuduan kon togá inta pinomia nongkon buḷawan tua: Tundi pitu tatua in malaekat mita in jamaat pitu doman tatua, bo pitu in sioḷ pototuduan kon togá tua in jamaat pitu tatua doman.”

WAHYU 4:5

Nongkon tampat pomomarentaan tatua noisindar magí in kilat bo iḷumuai in singog in gotup inta moyo-moyodudui. Bo kon tampat pomomarentaan tatua oyúon in poḷombow pitu inta koyongki-yongkit; tuata in Roho i Allah taya pitu.