ZAKHARIA 11:5 - Alkitab Singog In Mongondow Masa In Tanaa

⁵ Mototaḷuinea mita noḻimod kon domba mita tatua táe diábí ihukum. Mosia inta nopotaḷui in tapú in domba mita tatua in noguman, ‘Dinayo-dayowdon in ki Tuhan! Tanaa in nodugangdon nooyúon in kita!’ Gombala mita tatua in diábí in tabi kon domba mita inta biniag monia.

ZAKHARIA 11:5 Iomraidhean Croise

DATU MITA 2 4:1

Kon singgai tobatú ki baḷú in nabi tobatú in minayá kon i Elisa bo noguman, “Amá, ki buḷoiku in minatoidon! Bo kinotaauanbí doman i Amá kon sia tua in intaubí inta motoindudui kon i Allah, táe koboḻi in sia kon intau ibanea. Tanaa in intau tatua in namangoi sin mogamá kon i adíku doyowa bo baḻíonnea ki ata monia, sin poguboḻi kon boḻi i buḷoiku inta ain minatoi tua.”

NEHEMIA 5:8

bo noguman, “Takin ḻimbatú in ropot kita in notobutdon kon i utat mita naton intau in Yahudi inta pakisa nopotaḷui in awaknea kon bangusa ibanea. Táe tanaa in moikodon in momakisa kon i monia mopotaḷui in awaknea kon i monimu, bokaka moiko doman in intau Yahudi!” Itoi mita tatua in diá nokotubag umpaka tongá totontagá.

YEREMIA 2:3

Israel, iko in Akuoi tontaní in kitogi, batoḷ in dodob-Ku inta kinotabi-Ku. Akuoi in nopouma in bodito kon bayongan in intau inta nopororiga kon inimu, Akuoi, ki Tuhan, ain nosingog.”

YEREMIA 50:7

Mosia in sinubu bo sinikisa in bayongan in intau inta moyodungkuḷ monia. Musung mita in umat-Ku in noguman, ‘Onu in inaidan naton, diábí noitaḷá, sin intau mita tatua in binaradosadon kon i Tuhan. Mogoguyang monia in mopirisaya kon i Tuhan, dá mosia in mustibí doman umuran motoindudui kon i-Nia.’

YEHEZKIEL 34:10

Akuoi, ki Tuhan Inta Totok in moḷantud in moguman kon inimu, kon Akuoi naa in musungmu. Domba-Ku mita tatua in gamáan-Kubí bui nongkon inimu bo diádon ogoi-Ku bui kon i monimu; moiko in diá bidon ogoi-Ku morai kon kopontingan monimu tontaní. Domba-Ku mita in posaḷamaton-Kubí nongkon inimu dá mosia in diádon mobaḻí kokaanonmu.’ ”

YEHEZKIEL 34:21

Moiko in nogundud poḷat nondangat kon domba inta notakit nodapot in moitondí in mosia nongkon paanan in domba.

YEHEZKIEL 34:6

Dá domba-Ku mita in minayádon in tombuḷudannea mita inta moḷantud bo kon buḷud mita. Mosia in noibaya-bayá mako kon sinangkub in butá, diábí tobatúmai in intau in nopandungmai bo notayak kon i monia.

HOSEA 12:8

Ki Tuhan in noguman kon bangusa in Israel, “Moiko in motombogá naonda bo intau in Kanaan; mododagangmu mita moibog monguboḷ kon mototaḷuinea pongin simbangan inta diá moitutui.

HOSEA 12:9

‘Kita tanaaya in nooyúondon,’ guman monia. ‘Kita in nountung! Diábí tobatúmai in motaau moponapud kon kita in nokouḻí kon kaoyúonan tatua takin aid diá mojujur.’

AMOS 2:6

Ki Tuhan in noguman, “Intau in Israel ain nopobui-buimai binaradosa, tuamai in notantú bidon kon hukumon-Ku in mosia. Intau mojujur inta diá mokopobui kon iḷuanannea, ain pinotaḷui monia nobaḻí ata. Natua doman in aid monia kon intau nobiag nobogá inta diá nokouboḻi kon boḻinea, umpaka boḻinea tatua tongá ná boḻi in aip in sioḷ togapang.

MATIUS 23:13

“Koboditodon in moiko, ei mototundú kon agama Yahudi! Ei moiko intau inta mongomunapik. Sin moiko in moḷamboi kon intau inta mamangoi kon i Allah. Moiko tontaní in doíbí mobaḻí umat i Allah, bo intau ibanea inta moibog in ḷamboianbí monimu. [

YOHANES 10:1

“Totuubí in singog-Ku naa: Intau inta tumuot kon ḷantung in domba, bo diá mongin ḷoḻingkop, táe monomponikbí mongin daḷan ibanea, yo sia tua in mononakow bo mogogagow.

YOHANES 16:2

Moiko in poḷuaionbí nongkon baḷoi mita in pososambayangan. Bo moiangoibí in wakutunea kon intau inta moḻimod kon i monimu in mosangka kon sia tua in dinumuduibí kon parenta i Allah.

PETRUS 2 2:3

Popisí in mosia motamaa, dá intau mita inta deeman totuu guru tua in mongonguman kon inimu in ouman mita inta tongá ai-aidan monia tontaní sinbá kouḻían monia kon kauntungan in moiko. Táe bá kotaauan monimu, pongadilan inta mopoḷabú in hukuman kon i monia tua in noonggot bidon in sinadia, bo koyoyangan inta ain sinantú kon i monia in mogoḷat bidon mako.

WAHYU 18:13

Kuḻit in kayu manis, pododungú mita, bahan mita mobondu, taḷong mobondu bo kamania, anggur bo ḷana, topong bo gandum; sapi, domba, kabaḷo bo kereta, ata mita, nodapot kon nyawa in intau.

WAHYU 3:17

Moiko in mosingog: ‘Kami in nobiag nooyúon bo bayongan in yagi-yagi komintandon oyúon; diádon in nogaat kon i nami.’ Táe diábí kinotaauan monimu kon moiko nion in nobiagbí nomalarat totok, bo totok doman in mokoajar kon gina in kaadaan monimu nion! Moiko nion in nomasiking, diá koḷambu-ḷambung, bo bilog.