YOSUA 4:3 - Alkitab Singog In Mongondow Masa In Tanaa

³ Pokigamaaidon in mosia kon batu mopuḷú bodoyowá nongkon yua-yuak in Ongkag in Yordan, kon tampat inta sinindogan in imang mita. Potabádon in mosia momotaan kon batu mita tatua modapot in tampat inta pononḷoḷaigan monimu naonda in doḷom.”

YOSUA 4:3 Iomraidhean Croise

KINOBAḺIAN 28:22

Bo akuoi in mobogoi kon i Tuhan mopuḷú noporsen nongkon bayongan in yagi-yagi inta inogoi i Tuhan kon inakó. Batu tompoingat inta pinosindogku tanaa in mobaḻí tampat posumbaan kon i Tuhan.”

MAZMUR 103:2

Dayowdon in ki Tuhan, ei dimukudku, dika ḻiongon in bayongan in kopopia-Nea!

MAZMUR 11:4

Ki Tuhan in oyúon kon Baḷoi-Nea inta motusi, tampat pomomarentaan-Nea in kon soroga. Sia in umuran monaridi kon umat intau bo nonotaau kon bayongan in oaid monia.

LUKAS 19:40

Dá ki Yesus in notubag, “Poguman-Kudon kon i monimu! Aka mosia naa bo kibio-biómaidon, yo batu bidon mita tanion in momaḷú.”

YOSUA 24:27

Nopaḷut mako kon tua ki Yosua noguman kon bayongan in intau kon tua, “Batu tanaa in mobaḻí sakusi naton. Bayongan in tosingogon inta siningog i Tuhan kon inaton, aindon siningog kon tayowon in batu tanaa. Dá batudon tanaa in mobaḻí sakusi kon i monimu, sin moponorop kon i monimu sinbá diá moḷawang kon i Allahmu.”

YOSUA 3:13

Bain aka imang mita inta momotaan kon Poti Dodandian i Tuhan mopotobogdon in sioḷnea kon tubig in Ongkag in Yordan tatua, dá tubignea in mobontowdon; tubig inta nongkon uḷuannea in mobutongdon kon tampat tobatú.”

YOSUA 4:4

Dá ki Yosua nogoinídon kon intau mopuḷú bodoyowá inta kinopiḻían tatua,

YOSUA 4:8

Taya mopuḷú bodoyowá tatua nogaidon kon onu inta pinarenta i Yosua. Pinodudui kon topotundú i Tuhan kon i Yosua, mosia nogamá kon batu mopuḷú bodoyowá kon yua-yuak in ongkag in Yordan – kobayongnea in ná doman kobayong in suku mita kon bangusa Israel – bodongka dinia monia kon tampat pinononḷoḷaigan monia.

SAMUEL 1 7:12

Nopaḷut mako kon tua ki Samuel noposindog in batu tobatú, kon pinosigadan in Mizpa bo Sen. Sia in noguman, “Ki Tuhan totu-totuudon notuḷung kon inaton.” – Bo batu tatua in sinangoiannea “Batu Pinotuḷungan”.