YOSUA 2:9 - Alkitab Singog In Mongondow Masa In Tanaa

⁹ bo noguman kon i monia, “Kinotaauankubí kon butá tanaa inogoidon i Tuhan kon i monimu. Bayongan in intau kon naa moondokdon kon i monimu.

YOSUA 2:9 Iomraidhean Croise

KINOBAḺIAN 35:5

Kon tungkuḷ in ki Yakub bo rombongan buḷoi, adí bo ginaḷumnea nobuat, ki Allah nogoḻingoi kon intau mita inta kon kotá tatua, dapot in mosia diá nogaḷow kon i Yakub bo rombongannea.

SAMUEL 2 17:10

Dá intau mita inta totok in mongotorindog bo mobarani naonda bo singa in notantúbí kon angoianbí in ondok. Sin bayongan intau in Israel in nonotaau bidon kon ki amá i Tuang tua in pahlawan, bo intaunea mita in intau doman mita inta motorindog bo mongobarani.

DATU MITA 2 5:15

Bo Nobuidon minayá in sia takin tumotakinnea kon i Elisa. “Tanaa in kinotaauankudon,” guman i Naaman kon i Elisa, “kon sinangkup in dunia tongábí tobatú in Allah, tuata in Allah inta sinumba in intau in Israel. Tuamai, in poigumonku bá moibogpa in ki Tuang motarima kon onu in ogoiku.”

DATU MITA 2 7:6

Sin, ain binaḻí i Tuhan intau mita in Siria nokodongog kon singog naonda bo ponubuan in paanan in tontara inta mobarong totok inta sinumakoi kon kabaḷo bo kereta. Intau mita in Siria tua in norai kon ki datu in Israel ain nonondan kon i datu in Het bo Mesir takin tontaranea sin monubu kon i monia.

NEHEMIA 6:16

Naonda in musung mita nami kon sigad in bangusa mita kon diugmai tua nokodongog kon tua, nooyá in mosia sin kinotaauandon monia kon oaidan tatua in inaidanbí pinodoyon kon totuḷung i Allah.

ESTER 8:17

Kon batúan in kotá bo propinsi, kon ondaka in pinobacaan kon surat parenta i datu, yo intau mita in Yahudi in mopiabí in gina, nongosanang in gina bo norame. Nodapot in nobayong in intau kon tua in sinumuotdon nobaḻí intau in Yahudi, popisí in mosia in noondok kon bangusa tatua.

AYUB 19:25

Kinotaauanku kon soroga oyúon in mototuḷungku; kon imbuitnea mamangoi in Sia motuḷung kon inakó.

MAZMUR 112:10

Intau moraat nokoontong kon tua bo sinumorú; mosia in noporokokot in bagang popisí in nondoí. Bo noyopú in mosia; kamang monia in noinggamá nodapot in mononoi.

MAZMUR 115:16

Ḷangit in tongábí ki Tuhan in kitogi, táe butá in inogoi-Nea kon intau.

IḶUAIAN 18:11

Naa in kinotaauankudon kon ki Tuhanbí in mokawa-kawasa nongkon bayongan ilah, sin tua komintan inaidan-Nea kon dodai intau in Mesir dinumodiadon totok kon intau mita Israel.”

IḶUAIAN 23:27

Bangusa mita inta angoion monimu baḻíon-Kudon moondok kon i-Nakó; mosia in potombaukon-Kudon; bayongan musungmu modait momurow bo moḷagui.

MOHOHUTUBA 8:12

Umpaka mogatut in aid moraat in inaidan in intau baradosa, umuranbí in sia mobiag bo modapotbí in moonggot in kobiagannea. Kain intau, ki ine in motoindudui kon i Allah, notantúbí kon kobobiagnea in komintan mogampang.

YESAYA 19:1

Naa in koyow kon Mesir. Ki Tuhan in namangoi in Mesir sinumakoi kon goḷom inta moḻikat. Berhala mita in Mesir gumugur kon tayowon-Nea bo intau mita in Mesir yimintok in gina.

YESAYA 23:5

Nodapot in intaupa in Mesir moitaḻikokogbí bo modoḻiok aka mokodongog kon Tirus in iyopúdon.

YEREMIA 27:5

“Pinongin kawasa-Ku inta moḷoben bo pinongin ropot-Ku binaḻí-Ku in dunia bo intau takin bayongan in mahaḷuk, bo tua in motaau-Kubí ogoi kon i ineka in koibog-Ku pobogoian.

NAHUM 2:10

Niniwe in norimumudon, moingongow bo noḷogat. Gina in noḻia-ḻiawdon sin moondok. Duḷud in moḻemédon bo mourot. Pogot in bayongan in intau nongobilaidon totok.

PINOGIAPAN 20:14

Onda intua nongkon Kades, ki Musa nopotabá in totabá mita sin mayá mokipodungkuḷ kon i datu in Edom. Guman monia, “Kami in nongkon suku mita in Israel inta oyúonpa in tondoḷ in kompong i Tuangku. Degá kinotaauan bidon i Tuangku in yoyiga inta noiantug kon inami.

PINOGIAPAN 20:24

“Ki Harun in diábí moituot kon butá inta ain pinodandi-Ku kon bangusa Israel; sia in matoibí sin popisí in kamunda ain noḷawang kon parenta-Ku kon diug in bokaká in Meriba.

MATIUS 20:15

Degá diá motaau in akuoi in mopomaké in kapunyaanku podudui kon onu in koibogku? Andeka moyaat degá in ginamu, aka akuoi mogaid kon inta mopia kon intau ibanea?’ ”

ULANGAN 11:25

Kon bayongan butá tatua baḻíonbí i Tuhan Allahmu in intau mita kon tua agían in ondok kon inimu ná inta pinodandi-Nea, dá diádon tobatúmai in intau mokoḷamboi kon i monimu.

ULANGAN 2:25

Pinangkoi kon singgai naa baḻíon-Ku in moiko kobangkaḷ in bangusa mita kon ondaka. Bayongan intau in mourotbí sin moondok aka mokodongog kon tangoi monimu.’ ”

ULANGAN 28:10

Dá ontongondon in bayongan bangusa kon dunia kon moiko nion in bangusa inta piniḻí i Tuhan, bo mosia in mobangkaḷbí kon i monimu.

ULANGAN 32:8

Kon dodai in ki Inta Totok in Moḷantud nosilai kon butá, batúan bangusa sinantúdon in butánea takin ilah tobatú in nobaḻí pongawasa.

IBRANI 11:31

Popisí in oyúon in pirisaya, dá ki Rahab, bobay sundaḷ tua in diábí kinoḻimodan noyotakin in intau mita inta noḷawang kon i Allah; popisí in nopia totok in pinototomunea kon totabá mita in intau Israel.

YOSUA 2:11

Naonda in kinodongogan nami in ouman mita tatua, inagíandon in ondok in kami. Bayongan in intau nami kinoinggamáandon in barani popisí in moiko. Ki Tuhan Allahmu totu-totuubí ki Allah inta Totok in Mokawasa kon ḷangit bo kon butá.

YOSUA 2:24

Onda intua mosia noguman, “Notantú bidon kon ogoibí i Tuhan in bayongan in butá tatua kon inaton; Bayongan in intau kon tua moondokdon kon i naton.”

YOSUA 2:8

Doḷom tua kon dodai in toimata doyowa tatua nosiug, ki Rahab minayá in ḷuntung,

YOSUA 5:1

Bayongan in datu in Amori kon dotá in toyopan kon Ongkag in Yordan, bo bayongan datu in Kanaan inta kon bingkí in Dagat Toyuak nokodongogdon kon Ongkag in Yordan ain iningkagan i Tuhan kon bonu in umat Israel iḷumoḷan kon ongkag tatua. Dá inagíandon in ondok in mosia bo uyotdon mako popisí in intau Israel.

YOSUA 6:2

Ki Tuhan noguman kon i Yosua, “Tanaa ogoi-Kudon kon inimu in Yerikho takin datu bo bayongan in rayatnea inta mongobarani tatua.

YOSUA 9:10

bo onu inta pinomia-Nea kon i datu in intau in Amori doyowa kon dotá in pomukaan kon Yordan, inta ki Sihon datu in Hesybon bo ki Og datu in Basan inta nogutun kon Asytarot.

YOSUA 9:24

Mosia notubag, “Pinomia nami in natua sin dinongogdon nami kon ki Tuhan Allah inta sinumba i Tuang tua ain nopotabá kon i Musa, mogogundoi-Nea tua, nobogoidon kon i Tuang in bayongan butá tanaa bo moḻimod kon bayongan in intau inta nogutun kon butá tanaa kon dodai in tai Tuang mogamádon kon butá tatua. Kami in moondokdon totok aka ḻimodon in kami, tuamai pinomia nami in tanaa mita.

YOSUA 9:9

Mosia notubag, “Kami naa in namangoi nongkon butá inta totuu moyayú, Tuang, sin dinongogdon nami in soaḷ ki Tuhan Allah inta sinumba nai Tuang. Dinongogdon nami in bayongan inta pinomia-Nea kon Mesir,

HAKIM MITA 7:14

Tubag in yobayatnea, “O, tua in notantú bidon kon pitow i Gideon ki adí i Yoas, intau in Israel tatua! Mangaḻenea, kon ki Allah ain nopountung kon inia nongkon intau in Midian bo bayongan in tontara naton!”