YOSUA 13:6 - Alkitab Singog In Mongondow Masa In Tanaa

⁶ Noituot doman in bayongan butá in intau in Sidon, inta nogutun kon buḷud kon sigad in buḷud mita in Libanon bo Misrepot-Maim.” “Bayongan in bangusa tatua in poguntunon-Kubí komintan, kon dodai in bangusa Israel monubudon kon i monia,” Guman i Tuhan noidudui kon i Yosua. “Butá tatua in mustibí sila-silaionmu kon umat in Israel sin mobaḻí kapunyaan monia, ná inta ain pinarenta-Ku kon inimu.

YOSUA 13:6 Iomraidhean Croise

MAZMUR 80:8

O Allah Inta Totok in mokawasa, tompiadon bui in kami; bobuidon in kami takin pia in gina, sinbá mosaḷamat in kami.

PINOGIAPAN 33:54

Onda intua musti silaion monimu in tonsilai in kaummu mita takin momaké in undi. Aka kon inanakan inta mobarong musti moḷoben doman in silai ogoi kon i monia, bo kon inanakan inta moyakag, mointok doman tonsilai in ogoi.

YOSUA 1:6

Pokoyakin bo pokobarani in iko, sin ikobí in modia kon bangusa tanaa kon tungkuḷ in mosia ḻimitú kon butá inta pinodandi-Ku kon mogoguyang monia.

YOSUA 11:12

Bayongan in kotá mita tatua inagow i Yosua, bo datunea mita in dinomok bo iḻimod pinodudui kon parenta i Musa, mogogundoi i Tuhan tua.

YOSUA 11:8

Bo Israel in pinopountung i Tuhan nongkon i monia. Intau in Israel nonubu bo nondudur kon i monia nodapot in Misrepot-Maim bo Sidon kon dotá in utuan, bo nodapot in Ḷopá in Mizpa kon dotá in pomukaan. Pinoparangan diápa doman mooyong nodapot in diádon tobatúmai in musung in kinotaḻiban – nodaitdon minatoi.

YOSUA 13:7

Dá, tanaa in sila-silaidon in butá tatua kon suku in bangusa Israel inta siow, bo kon tongobotak in suku in Manasye, sinbá tua in mobaḻídon kapunyaan monia.”

YOSUA 23:13

yo torop, kon notantú bidon kon ki Tuhan Allahmu in diábí mopoguntun in bangusa mita tatua sin kopiaan monimu. Sedang bo mosia tua in totokbí in mokobahaya kon i monimu, sin mosia tua in mobaḻídon naonda bo poyogaḷap kon i monimu. Pororigaandon totok monia in moiko; sin mosia in mobaḻídon naonda bo sambok kon ḻikudmu ande naonda bo dugi kon bonu in matamu. Moiko in umurandon mororiga modapot in diádon intau tobatúmai in kon sigad monimu in kotaḷáan kon butá inta mopia naa inta inogoi i Tuhan Allahmu kon inimu.

YOSUA 23:4

Butá mita in bangusa inta kinotaḷáanpa, ná doman tua in butá in bayongan bangusa inta ain sinaḷowku, tuata in butá inta nosimbanat nongkon dotá in pomukaan kon Ongkag in Yordan nopobayá ná toyopan nodapot kon Dagat Toyuak, bayongan intua aindon sinilaiku kon inimu sin mobaḻí kapunyaanmu.

YOSUA 23:5

Ki Tuhan, Allahmu in mopoguntun bo monaḷow kon bangusa mita tatua, bo moḷagui in mosia kon i monimu aka moiko mayá monubu kon i monia. Mouḻí bidon monimu in butá monia, ná inta ain pinodandi i Tuhan Allahmu kon inimu.