YOSUA 12:2 - Alkitab Singog In Mongondow Masa In Tanaa

² Tobatú in tangoinea in ki Sihon, datu in Amori inta noiḻitú kon Hesybon. Butá inta kon bonu in kawasanea in tongobotak in butá in Gilead; inta nongkon Aroër (kon bingkí in Ḷopá in Arnon) bo kotá inta kon yua-yuak in ḷopá tatua nodapot in kinoouput in Ongkag in Yabok inta kon pinosigadan in butá in bangusa Amon;

YOSUA 12:2 Iomraidhean Croise

KINOBAḺIAN 32:22

Kon doḷom doman tua ki Yakub nobangon bo nodia kon i buḷoinea doyowa, bo kon buḷoinea doyowa inta bobantung bo ki adínea mopuḷú bomitá, iḷumoḷan kon Ongkag in Yabok.

TAWARIKH 1 5:8

bo ki Bela ki adí i Azas, ompu i Sema nongkon inanakan i Yoël. Suku i Ruben in nogutun kon Aroër bo butá inta pinangkoi kon Aroër nopobayá ná utuan nodapot kon Nebo bo Baal-Meon.

NEHEMIA 9:22

Pinopountung-Mu in mosia kon nobayong in dodatuan bo bangusa kon pinosigadan in butá monia. Hesybon butá i Datu Sihon, iḻitúan monia; Basan butá i Datu Og, inutunan monia.

MAZMUR 135:11

ki Sihon datu in Amori bo ki Og datu in Basan, bo bayongan in datu kon Kanaan.

YEREMIA 48:19

Moiko inta nogutun kon Aroër, sindogdon kon bingkí in daḷan bo tondudutka! Ḻibódon kon i monia inta noḷagui, bo inta nosaḷamat, ‘Onu degá in nobaḻí?’

ULANGAN 1:4

Tua in nobaḻí naonda in ki Musa nonaḷow kon Sihon, datu in intau Amori, inta nomarenta kon kotá in Hesybon, bo Og, datu in Basan, inta nomarenta kon kotá mita in Asytarot bo Edrei.

HAKIM MITA 11:13

Ki datu in Amon notubag kon totabá mita tatua, “Naonda in umat in Israel namangoi nongkon Mesir, mosia in nogamá kon butá nami, pinangkoi kon Ongkag in Arnon nodapot kon Ongkag in Yabok bo Ongkag in Yordan. Yo tanaa in pobuidon intua takin dame.”

HAKIM MITA 11:22

Butá in Amori tua in iḻitúan monia pinangkoi kon Arnon kon dotá in toḷatan, nodapot kon dotá in utuan kon Ongkag in Yabok, bo nongkon padang gurun kon dotá in pomukaan, nodapot kon Ongkag in Yordan kon dotá in toyopan.