YOHANES 1 3:5 - Alkitab Singog In Mongondow Masa In Tanaa

⁵ Bo kinotaauan bidon monimu kon ki Kristus tua in namangoi sin motobut kon dosa mita intau, bo Sia tua in diábí kon dosa.

YOHANES 1 3:5 Iomraidhean Croise

HOSEA 14:2

Pobuidon mangoi kon i Tuhan Allahmu, ei bangusa in Israel! Dosamu ain nokopopisí kon inimu norondog bo noḷabú.

MATIUS 1:21

Sia in mopononggadí in adí ḷoḷaki bo Sia tangoianmu ki Yesus, sin Sia tuata inta moposaḷamat kon umat mita baradosa.”

LUKAS 23:41

Tongá aka hukuman kon i natonda in patusbí tarimaan podudui in oaid naton, táe Sia naa in totokbí in diá kotaḷá!”

LUKAS 23:47

Naonda in itoi in tontara nokoontong kon onu inta ain nobaḻí tatua, sia nodayow kon i Allah, kainia, “Totuu, Sia naa in diábí kotaḷá!”

YOHANES 1:29

Nopoikoḷomai kon singgai, indoianmai Yohanes ki Yesus namangoi kon inia. Bo ki Yohanes in noguman, “Indoiai, tuata in ki Adí in Domba i Allah inta momopat kon dosa in dunia.

YOHANES 1:31

Akuoi tontaní, diábí nonotaau kon i-Nia in koḻipod. Bokaka akuoi namangoi nobaptis in tubig sinbá intau mita in Israel monotaau kon i-Nia.”

YOHANES 14:30

Diádon moantó in oumanon-Ku kon i monimu, sin wakutuneadon mongongawasa in dunia naa mamangoi. Táe diábí kokawasaannea in Akuoi.

YOHANES 8:46

Ki ine in kon sigad monimu in motaau moponiata kon oyúon in dosa-Ku? Aka totuu in pinoguman-Ku, yo nongonu sin moiko in diábí mopirisaya kon i-Nakó?

KORINTUS 2 5:21

Sin Sia inta nodarit kon bayongan in oaid inta diá mopia, pinaké domandon i Allah mobaba kon bayongan in dosa naton, sinbá kita in buidon mobiag motompia takin i Allah sin notobatúdon i Kristus.

TIMOTIUS 1 1:15

Totuubí in singog tanaa, tuamai in patusbí tarimaan bo pirisayaan komintan: “Kon ki Kristus ain namangoi in dunia naa sin moposaḷamat kon intau baradosa.” Bo akuoibí naa in intau inta totok in binaradosa bo inta totok doman in moraat.

TIMOTIUS 1 3:16

Diábí tobatúmai in motaau momayow, kon moḷobenbí totok in onu inta noibunipa kon agama naton naa: Sia namangoi in dunia naa sinumon rupa intau, bo inakubí in Roho i Allah, bo inontong in malaekat mita. Habarnea pinowayadon kon sigad in bayongan bangusa, bo Sia in pinirisaya in bayongan intau kon dunia naa poḷat sinintak namonik in soroga.

TITUS 2:14

Sia tuata inta ain noposarakan in awak-Nea sin mopoḷuat kon i naton nongkon bayongan inta moraat, bo kita in baḻíon-Nea tobatú umat inta noiḷuatdon nongkon kawasa in dosa bo tongádon mobaḻí umat-Nea inta morajing mogaid kon inta mopia.

IBRANI 1:3

Sia doman naa in moponiata in kamuliaan i Allah inta diá in poḻiuan tua. Bo noniatadon totok kon i-Nia in rupa i Allah tontaní. Singog-Nea inta mokawasa totok tua in pinaké-Nea moḷukad kon dunia naa. Bo naonda in sinobut-Neadon in dosa mita in intau, iḻimitúdon in Sia kon ḷoḻitúan pomomarentaan kon soroga moyotakin i Allah Pongawasa inta totok in moḷantud.

IBRANI 4:15

Imang Moḷoben naton tua in deemanbí imang inta diá umuran kotaki-takin mokorasa kon yoyiga mita naton. Sia ain sinoba kon bayongan yagi-yagi ná doman kita naa; táe diá in Sia nogaid kon dosa!

IBRANI 7:26

Dá ki Yesusbí tua in Imang Moḷoben inta paraḷuon naton. Sia tua in nodaritbí kon bayongan in yagi-yagi, diábí in taḷá andeka dosa onukadon kon i-Nia. Sia in pinotondí nongkon intau mita inta dinosa, bo dinia pinoonik in tampat inta moḷantu-ḷantud nongkon ḷangit.

IBRANI 9:26

Sin aka natua dá tantú mopobui-buibí domanmai Sia in monahang kon roriga inta mulaipamai dunia naa pinomia. Táe noniata magí, tanaa kon singgai tumi naa, Sia in namangoi tongábí komintan bo noposarakan in awak-Nea tontaní sin potobut kon bayongan in dosa naton.

IBRANI 9:28

Natua doman in ki Kristus, tongábí komintan pinosumba saḷaku kuruban pinotobut kon dosa in intau mobayong. Sia in mamangoipabí bui, táe deeman bidon mamangoi mogimpaḷut kon persoalan dosa, táe dongka bidon moposaḷamat kon intau mita inta mogoḷat mako kon koangoian-Nea bui.

PETRUS 1 1:18

Sin kinotaauan bidon monimu kon moiko in sinobut bidon nongkon kobobiag monimu inta diá in mangaḻenea, sin tuabí in pinopoponag in mogoguyang monimu. Pinoguboḻi kon i monimu tua in deemanbí barang inta mogogu-goguyaat ná saḷaka andeka buḷawan,

PETRUS 1 1:20

Ki Kristus in piniḻídon i Allah kon wakutupa in dunia naa diápa pinomia. Bo kon singgai mita tumi naa, sia namangoi in dunia naa sinbá posaḷamaton in moiko.

PETRUS 1 2:22

Sia in diábí dodai onda in nogaid kon dosa, bo diábí doman tobatúmai intau nokodongog kon i-Nia nonguboḷ.

PETRUS 1 2:24

Ki Kristusbí tontaní in notanggung kon dosa mita naton. Tua mita in sinanggung-Nea kon tudu in Kayu pinoyotaḻempang, sinbá kita in moipilatdon kon bonu in kawasa in dosa, bo mobiagdon podudui in ibog i Allah. Kekeb-Neabí mita tatua inta mokopia kon i monimu.

PETRUS 1 3:18

Sin ki Kristus tontaní in tongábí doman komintan minatoi popisí in dosa mita intau. Tobatú intau inta diá kotaḷá; minatoi popisí in intau inta kotaḷá. Ki Kristus in nogaid kon tua sinbá kita in motaau-Nea diaan mayá kon i Allah. Sia in iḻimod kon kaadaan saḷaku intau, táe biniag bui kon bonu in Roho.

YOHANES 1 1:2

Wakutu in kinobiagan tatua pinoniata, nokoontong doman in kami. Tuamai kami in mobogoi in sakusi soaḷ Sia. Kami in mopotaau kon i monimu soaḷ kobiagan mopia bo mononoi moyotakin i Amá, sin tua aindon pinoontong kon i nami.

YOHANES 1 1:7

Táe aka kita in mobiag kon bonu in bayag ná ki Allah inta kon bonu doman in bayag, dá kita in mustibí mobiag modagin, motompia bo mositabian tobatú bo tobatú. Bo dugú i Yesus, ki Adí-Nea tua, mondarit kon i naton nongkon bayongan dosa.

YOHANES 1 2:1

Adíku mita! Naa mita in pinaisku kon i monimu, sinbá moiko in diádon mogaid kon dosa. Tongá aka oyúon in mogaid kon dosa, dá oyúon in mototuḷung naton, Sia tua in ki Yesus Kristus inta moadil. Sia in mayá in tayowon i Allah bo mopoigum sinbá ampungandon in taḷá mita naton.

YOHANES 1 2:2

Bo pinotonsigad kon i Yesus Kristus tuata, bayongan in dosa naton inampungan. Bo deemanbí doman tongá taḷá naton, táe taḷábí doman in bayongan intau.

YOHANES 1 2:29

Kinotaauandon monimu kon ki Kristus in nobiag podudui in ibog i Allah. Tuamai musti kotaauan doman monimu kon pomuḷoi in intau inta nobiag podudui in ibog i Allah, ki adíbí mita i Allah.

YOHANES 1 3:8

Táe intau inta umuran mogaid kon dosa, mosia tua in ki adí mita in Ibilis, sin Ibilis tua in nongkon pinomangkoianpabímai umuran nogaid kon dosa. Tuabí in mangaḻe inangoian i Adí Allah, Sia in morimumud kon oaidan mita in Ibilis.

WAHYU 1:5

bo nongkon i Yesus Kristus, sakusi inta mosatia. Sia tua inta muna-munamai totok biniag bui nongkon kinopatoian bo Sia doman in nongawasa kon bayongan datu kon dunia naa. Ki Yesus in motabi kon i naton, tuamai Sia in noibog minatoi sin momilat kon i naton nongkon kawasa in dosa mita naton,