YOHANES 1 2:3 - Alkitab Singog In Mongondow Masa In Tanaa

³ Aka kita bo umuran dumudui kon parenta mita i Allah, dá tua in tandanea kon kita in nonotaau kon i Allah.

YOHANES 1 2:3 Iomraidhean Croise

MAZMUR 119:32

Takin pia in gina dumudui in akuoi kon parenta-Mu, sin binaḻí-Mu in akuoi totok in momangaḻe.

MAZMUR 119:6

Aka akuoi monaridimai kon bayongan in parenta-Mu, dá akuoi in diábí pokopooyáanmai.

YESAYA 53:11

Tuamai in ki Tuhan in noguman, “Naonda in nobaba mako kon roriga, sia in mosanangbí bo mopuas. Mogogundoi-Ku tua, inta mokosanang kon gina-Ku, ain nobaba kon hukuman in intau mobayong; pinodoyon kon inia Akuoi in mongampung kon i monia.

LUKAS 6:46

“Nongonu sin moiko in mokuukbí kon i-Nakó, ‘Tuhan, Tuhan,’ bokaka bo doíbí in mogaid kon onu inta pinoki aid-Ku?

YOHANES 14:15

“Aka moiko in motabi kon i-Nakó, yo moiko in dumuduibí kon parenta-Ku mita.

YOHANES 15:10

Aka moiko umuran mogaid kon inta pinarenta-Ku, yo moiko in umuran mosatia in dumudui kon tabi-Ku, ná doman Akuoi inta umuran mosatia kon tabi i Amá-Ku sin umuran nopobayá in parenta-Nea mita.

YOHANES 15:14

Moiko nion in yobayat-Ku mita, aka pomiaan monimu in onu inta pinarenta-Ku kon inimu.

YOHANES 17:3

Nanaa in kobiagan mononoi tua; ibogon tua bayongan intau in monotaau kon i Amá inta tongábí Sia tua in ki Allah inta mobanar, bo monotaau doman kon i Yesus Kristus inta pinotabá i Amá.

KORINTUS 2 4:6

Sin ki Allah in nogumandon nanaa, “Nongkon sindip momukádon in bayag.” Bo ki Allah doman tatua inta nopomuká in bayag-Nea kon bonu in gina naton, sinbá mobayag domandon in raian naton bo monotaau kon kototarang in bayag i Allah inta nonindar kon pogot i Kristus.

IBRANI 5:9

Dá naonda in Sia binaḻídon mopoposaḷamat inta nosompurna, Sia in nobaḻídon pangkoi in kasaḷamatan inta mononoi kon bayongan intau inta umuran dumudui kon parenta-Nea.

YOHANES 1 2:13

Pinaisku in naa kon i monimu, Amá mita, sin moiko in nonotaaudon kon i-Nia inta oyúondon nongkon pinomangkoianpamai. Pinaisku in naa kon i monimu, intau mita inta nongobagupa, sin sinaḷowdon monimu in ki Inta Moraat.

YOHANES 1 3:14

Kinotaauandon naton kon kita iḷumuaidon nongkon kawasa in popatoi, bo nomampingdon kon bonu in kawasa inta mokobiag, sin lantaran kita notabidon kon i utat mita naton. Sin ki ine in diá motabi kon i utatnea, yo sia tua in tantúpa nobiag kon bonu in kawasa in popatoi.

YOHANES 1 3:19

Natua in caranea kita monotaau kon kita naa in noituot ki adí mita i Allah inta mobanar, bo gina naton moonowdon kon tayowon i Allah.

YOHANES 1 3:6

Komintan intau inta nobiag notobatú takin i Kristus, diábí umuran mogaid kon dosa. Intau inta umuran mogaid kon dosa, diábí kon dodai onda in mokoontong kon i Kristus andeka monotaau kon i-Nia.

YOHANES 1 4:13

Lantaran ki Allah ain nobogoi in Roho-Nea kon i naton, dá kinotaauan naton kon kita naa in nobiag bidon notobatú takin i Allah, bo ki Allah nobiag doman notobatú takin naton.

YOHANES 1 4:7

Utat mita inta kinotabiku! Koḻigai bá kita in umuran mobiag mositabian tobatú bo tobatú, sin tabi tua in nongkon i Allahbí, bo intau inta kototabi kon tumpaḷa intau in ki adíbí mita i Allah bo nonotaau kon i Allah.

YOHANES 1 5:19

Kinotaauanbí naton kon kita naa in kapunyaanbí i Allah, umpakabí komintan dunia kinawasaandon in Inta Moraat.

YOHANES 1 5:2

Naa in daḷan naton monotaau kon kita in motabi kon i adí mita i Allah: Kita motabi kon i Allah bo motoindudui kon parenta-Nea mita.

YOHANES 1 5:3

Sin aka motabi kon i Allah yo mustibí motoindudui kon parenta-Nea mita. Bo parenta-Nea mita in diábí mobogat kon i naton,

WAHYU 12:17

Naga tatua totokdon in sinumorú kon bobay tatua, sahingga minayá nogaḷow kon buí in bobay tatua inta ibanea. Mosia inta umuran dinumudui kon parenta i Allah bo inta nobogoi in kosakusian soaḷ ki Yesus bo kawasa-Nea.

WAHYU 14:12

Dá kon naa, umat i Allah inta motoindudui kon parenta-Nea bo mosatia kon i Yesus, musti Mokopotabá.

WAHYU 22:14

Mosanangdon totok in intau inta nomatá kon jubahnea kinodarit totok. Mosia in motaau mokaan kon bungai in pangkoi in kayu kobiagan bo tumuot kon bonu in kotá mongin ngaranea.