YOHANES 13:5 - Alkitab Singog In Mongondow Masa In Tanaa

⁵ Onda intua Sia in nogaḻin kon tubig kon bonu in baskom, bo mulaidon nondarit kon sioḷ in murí-Nea mita poḷat iradatan-Nea in handuk inta pinogibintoḷ-Nea tatua.

YOHANES 13:5 Iomraidhean Croise

KINOBAḺIAN 18:4

Pomayádon mako bain akuoi in mogamá kon tubig sin pondaritan kon sioḷ i Tuang mita. Koḻigai bá mogogaipa kon siungon in kayu tanaa sinbá moinggamápa in ḷopí.

KINOBAḺIAN 19:2

bo noguman, “Tuang mita, akuoi in mopoigum kon bá mongandupa kon baḷoiku. Tai Tuang in motaau in mondaritdon kon sioḷ bo mogogaipa in doḷom naa kon baḷoiku, bain ikoḷom doḷo-doḷom bo mongingguput kon bobayáan.” Táe mosia in notubag, “Sukur moantó, kami in mogogaidon kon lapangan in kotá”.

KINOBAḺIAN 43:24

bodongka inatodneadon in mosia sinumuot kon baḷoi. Sia in nobogoi in tubig sin pondaritan monia kon sioḷ, bo nobogoi doman in kokaanon in keledai monia.

DATU MITA 2 3:11

Ki Datu Yosapat in noḻibó, “Diá degá in nabi kon naa inta motaau moḻibó kon i Tuhan mongo onu in musti aidan naton?” Porwira tobatú inta nongkon tontara i Datu Yoram in notubag, “Oyúon in ki Elisa ki adí i Sapat! Dungkuḷmai sia tua in mobobantung i Elia.”

MAZMUR 51:2

naonda in sia sinoboḷow i Nabi Natan popisí in nonuaḻing takin i Batsyeba.

IḶUAIAN 29:4

Potabádon in ki Harun bo ki adínea mita mamangoi kon ngara in Ḷoḷaigan-Ku bo mondarit kon awak.

YESAYA 1:16

Daritaidon in awakmu kodariton totok. Gogaiai in bayongan inta moraat inta inaidan monimu tua. Dikadon bui mogaid kon inta moraat,

YEHEZKIEL 36:25

Mopaḷut mako kon tua moiko in pisikan-Ku in tubig inta mosilang, sinbá modaritdon nongkon bayongan in berhalamu bo nongkon bayongan yagi-yagi inta ain nokokotor kon i monimu.

IMAMAT 14:8

Onda intua intau tatua musti momatá kon pakeangnea, mokigonsing bodongka moinggú. Dá modaritdon in sia, bo motaaudon tumuot kon ḷoḷaigan, táe kon bonu in pitupa nosinggai bui sia in diápa motaau tumuot kon ḷoḷaigannea tontaní.

ZAKHARIA 13:1

Ki Tuhan Inta Totok in mokawasa in noguman, “Kon singgai tatua momukábí bokaká tobatú sin mopotusi kon buí i Daud bo intau inta nogutun kon Yerusalem nongkon bayongan in dosa bo posumbaan kon berhala inta ain inaidan monia.

LUKAS 7:38

Koomba-ombaḷ in sia namangoi sinimindog kon diug in sioḷ i Yesus, dá sioḷ i Yesus nobuntad in ḷuánea. Táe kon dodaipa doman tatua sioḷ i Yesus iningkagannea in buoknea tontaní, bodongka inayokannea in sioḷ i Yesus bo binutakkannea in ḷana nobondu inta kodia-dianea tatua.

LUKAS 7:44

Onda intua ki Yesus nobobui kon bobay tatua bo noguman kon i Simon nanaa, “Inontongmu in bobay tanaa degá? Akuoi in moguman kon inimu: Akuoi namangoi in baḷoimu, táe diá inogoianmu in tubig pondaritan-Ku kon sioḷ, táe bobay tanaa ain nondarit kon sioḷ-Ku takin ḷuánea, onda intua iningkagannea bui in buoknea tontaní.

YOHANES 13:10

Tubag i Yesus kon inia, “Intau inta ain noinggú, ain bidon nodarit komintan, tuamai in diá bidon paraḷu daritan komintan koḻikud bidon in sioḷnea. Moiko nion in nodarit bidon tongá diápa komintan.” (

YOHANES 13:6

Bo nodapotdon in Sia kon i Simon Petrus. Ki Simon Petrus naa noguman, “Tuhan, umpaka dá ki Tuhanbí in mondarit kon sioḷ-Ku?”

YOHANES 13:8

“Donaai, Tuhan,” guman i Petrus kon i Yesus, “donaaibí mokoimontanmai Tuhan mondarit kon sioḷku!” Táe ki Yesus in notubag, “Aka diá daritan-Ku iko, yo iko in diábí mokouḻí kon tonsilai nongkon i-Nakó.”

YOHANES 19:34

Táe sian i Yesus sinakuḷ in tobatú tontara in ginubat; dá iḷumuaidon in dugú bo tubig.

OUMAN IN RASUL MITA 22:16

Bo tanaa in donaaidon mokopoonggot in iko, pobangondon bo bayádon pokibaptis. Pokuanidon kon i Tuhan sinbá iko in pilatandon nongkon bayongan in dosamu.’ ”

KORINTUS 1 6:11

Koḻipod oyúon in kon sigad monimu in umuran mogaid kon natua mita. Táe tanaa in poniatadon kon nodaritdon in moiko nongkon bayongan oaid inta diá mopia. Moiko in nobaḻídon umat i Allah inta piniḻí-Nea. Moiko buidon noyobayat i Allah, sin nopirisayadon kon i Tuhan Yesus Kristus bo popisí kawasa doman in Roho inta nongkon i Allah naton.

EPESUS 5:26

Inaidan i Kristus intua sinbá motaau-Nea daritan in jamaat tatua takin totundú-Nea bo takin tubig inta pobaptis, sinbá motaaudon posarakan-Nea kon i Allah.

TIMOTIUS 1 5:10

bo kinotaauan doman in intau kon umuranbí in sia nogaid kon inta mopia, ná umpamanea, ain nonompia kon i adínea mita, motabi kon tumpaḷa intau, moibog mobogoi in kaanon kon intau mita mopirisaya. Moibog doman motuḷung kon intau mita inta nobiag nobogá, pokoknea mosia in totu-totuudon nogaid kon onu inta mopia.

IBRANI 10:22

Tuamai, koḻigai dimiugdon in kita kon i Allah takin gina motuḻid bo totu-totuudon mopirisaya sin gina naton in dinaritandon nongkon raian mita inta mongoraat, bo awak naton in dinaritan domandon in tubig inta modarit totok.

YOHANES 1 1:7

Táe aka kita in mobiag kon bonu in bayag ná ki Allah inta kon bonu doman in bayag, dá kita in mustibí mobiag modagin, motompia bo mositabian tobatú bo tobatú. Bo dugú i Yesus, ki Adí-Nea tua, mondarit kon i naton nongkon bayongan dosa.

YOHANES 1 5:6

Ki Yesus Kristus tuata inta namangoi kon dunia takin tubig inta pinobaptisan kon i-Nia bo takin doman dugú in kinopatoian-Nea. Sia in namangoi deemanbí tongá takin tubig, táe takinbí tubig bo dugú. Bo Roho i Allah tontaní nobogoi in kosakusian kon totuubí intua, sin Roho in diábí kon dodai in onda in monguboḷ.

WAHYU 1:5

bo nongkon i Yesus Kristus, sakusi inta mosatia. Sia tua inta muna-munamai totok biniag bui nongkon kinopatoian bo Sia doman in nongawasa kon bayongan datu kon dunia naa. Ki Yesus in motabi kon i naton, tuamai Sia in noibog minatoi sin momilat kon i naton nongkon kawasa in dosa mita naton,

WAHYU 7:14

Dá tubagku kon inia: “Diábí kinotaauanku, ki Tuangbí in nonotaau kon tua.” Dá sia in noguman bui kon inakó: “Mosia naa in intau mita inta nosaḷamatdon nongkon roriga inta moḷoben, bo ain binatáan monia kinobudó in jubah monia kon bonu in dugú i Adí in Domba tatua.

HAKIM MITA 19:21

Onda intua dinianea in mosia minayá in baḷoinea bodongka nopokaan in keledai mita monia. Bo naonda in mokokiangoi mita tatua nomatádon kon sioḷ, nongaan in mosia.

SAMUEL 1 25:41

Sinimindog in ki Abigail bo sinumungkud poḷat noguman, “Akuoi naa in bobantung i Daud, diábí mobogat in ginaku in momatá kon sioḷ mita in bobantungnea mita.”