YAKOBUS 1:5 - Alkitab Singog In Mongondow Masa In Tanaa

⁵ Aka oyúon in kon sigad monimu in diápa totok mobijaksana; yo musti mopoigum kon i Allah, dá ogoianbí i Allah in kabijaksanaan in sia. Sin takinbí pia in gina bo tabi in ki Allah in mobogoi kon batúan in intau.

YAKOBUS 1:5 Iomraidhean Croise

TAWARIKH 1 22:12

Bo igumon mako ki Tuhan Allahmu in mobogoi kon inimu in kabijaksanaan bo pandoi sin momarenta kon Israel podudui in hukum-Nea mita.

TAWARIKH 2 1:10

Manangka intua ogoiaidon kaasí in akuoi naa in kabijaksanaan bo pongotahuan inta paraḷuonku kon modia kon i monia. Sin aka diá natua, yo diábí in akuoi mokotongod in momarenta kon umat-Mu inta mobarong totok naa?”

MAZMUR 51:6

Tongábí kon ini-Mu, tongábí kon ini-Mu binaradosa in akuoi, bo pinomiaku in onu inta inanggap-Mu moraat. Dá patusbí hukumon-Mu in akuoi, moadilbí in pononantú-Mu.

IḶUAIAN 31:3

bo inogoian-Ku in sia in kawasa-Ku. Sia inogoian-Ku in pomomangaḻe, toḻidat bo kototaau kon bayongan yagi-yagi oaidan:

IḶUAIAN 31:6

Ki Aholiab, ki adí i Ahisamakh nongkon suku Dan, ain piniḻí-Ku doman sin motuḷung kon inia. Bas mita inta mopandoi ogoian-Ku doman in toḻidat inta diá in poḻiu, sinbá mosia motaau mogaid kon onuka in pokiaid-Ku:

AMSAL 8:17

Akuoi in motabi kon i monia inta moibog kon inakó; inta motayak kon inakó, in moyodungkuḷkubí.

MATIUS 11:20

Ki Yesus nomangkoidon noningkuḻe kon kotá mita inta mokakit pomiaan-Nea kon inta mokoherang. Popisí in intau mita kon kotá mita tatua doí mogogai in mogaid kon dosa mita monia.

MARKUS 16:14

Pangabisannea, ki Yesus nokipogontong kon murí-Nea mita mopuḷú bomitá tatua, wakutu in mosia koyogot mongaan. Sinorúan-Nea in murí-Nea mita tatua sin diá totok mopirisaya bo motogat totok in gina sahingga in diá mopirisaya kon intau mita inta ain nokoontong kon ki Yesus in nobiagdon bui.

YOHANES 14:13

Bo onukabí in poigumon monimu podoyon kon tangoi-Ku, aidan-Kubí intua kon i monimu, sinbá ki Amá in pomuliaan pongin i Adí.

YOHANES 15:7

Aka moiko bo umuran motobatú takin-Ku bo totundú-Ku in umuran popotonop mako monimu kon gina, yo poigumdon kon i Amá kon onukabí in koibog monimu; dá onu in pinoigummu tua in ogoi-Neabí.

YOHANES 4:10

Ki Yesus in notubag, “Aka kuma bo kinotaauanmu in totabi i Allah bo kinotaauanmu in ki ine in noigum kon inumon kon inimu, yo nopasti bidon kon iko tontaní in moigumbí kon tubig inumon kon i-Nia tua. Bo ogoian-Neabí iko in tubig kobiagan tatua.”

YAKOBUS 1:17

Pomuḷoi in oogoi inta mopia bo tombuinag inta mosompurna, namangoibí intua nongkon soroga, pinopoponag i Allah inta nomia kon bayongan inta nobayag kon ḷangit. Sia tua in ki Allah inta diá kon dodai in onda mobaḷui bo diábí doman mokopopisí in mogaid kon inta mosindip.

YAKOBUS 3:17

Táe intau inta nokouḻí kon kabijaksanaan nongkon i Allah, yo sia in muna-munamai totok modarit, onda intua moibog in sia kon dodamean, mobahasa mako, bo motoindudui. Moḷoben in tabinea bo oaidnea mongopia. Diábí in sia momiḻí kon intau bo diábí tongá ki ubo-uboḷmai mopia.

YAKOBUS 5:16

Tuamai moiko in musti mosi akuan kon taḷá bo mosi sambayangan, sinbá undaman in moiko. Sambayang in intau inta dinumudui kon ibog i Allah, moḷoben in kawasanea.

YOHANES 1 3:22

Bo onu in igumon naton kon i-Nia, tarimaanbí naton, sin kita in umuran dinumudui kon parenta-Nea mita bo nogaid kon onu inta mokosanang kon gina-Nea.