WAHYU 8:12 - Alkitab Singog In Mongondow Masa In Tanaa

¹² Onda intua malaekat inggopatnea nogirup domandon kon torompetnea. Dá noidatongdon in sepertiga in mata in singgai, sepertiga in buḷan bo sepertiga doman in tundi mita, sahingga noinggamádon sepertiga nongkon ropot in sindar monia. Ná doman tua, sepertiga nongkon bayag in diádon notarang bo ná doman tua in doḷom.

WAHYU 8:12 Iomraidhean Croise

YESAYA 13:10

Batúan in tundi bo pinosipunan in tundi mogogai in monindar; mata in singgai in simindip kon dodai in sia momuká, bo buḷan in diá bidon monindar bui.

YESAYA 24:23

Buḷan in simindip bo mata in singgai in diá bidon monindar, sin ki Tuhan Inta Totok in mokawasa in momarentabí mobaḻí datu. Sia in momarentabí kon Yerusalem, kon tudu in Buḷud in Sion, bo mopoontong in koagung-Nea kon itoi mita in umat-Nea.

YEREMIA 4:23

Mataku in ḷumongow monag kon butá, diá in koontongan bo noingkag, ḷumangag in akuoi kon ḷangit, uḻe, diábí in monindar.

YOËL 2:10

Kon tungkuḷ in mosia minayá butá nogugur, bo ḷangit in nodandú doman. Bo nosindipdon in mata in singgai bo buḷan, bo sindar in tundi mita noinggamádon.

YOËL 2:31

Mata in singgai in simindipdon bo buḷan in mobaḻídon mopura naonda bo dugú. Tua komintan in mobaḻí kon dodai in diápa moiangoi in Singgai i Tuhan, singgai inta motoyang bo mokokoningkim!

YOËL 3:15

Mata in singgai bo buḷan in simindipdon, bo tundi mita in diádon monindar bui.”

AMOS 8:9

Moiangoibí in wakutunea baḻíon-Ku in mata in singgai tumoyop moutupa in singgai bo dunia in simindipdon kon dodai in singgaipa. Akuoi, ki Tuhan, Inta Totok in moḷantud, ain nosingog.

MATIUS 24:29

“Naonda in mopaḷutdon roriga wakutu intua, yo mata in singgai mosindip, bo buḷan diádon monindar. Bo tundi mita in mongoḷabú nongkon ḷangit, bo kawasa mita kon baḷangon moirangkap.

MATIUS 27:45

Pinangkoi kon jam mopuḷú bodoyowá moutu in singgai nodapot in jam nogintoḷu sinimindip in ḻipú tatua.

MARKUS 13:24

“Táe naonda in kon wakutudon in roriga tatua, mata in singgai mobaḻídon mosindip, bo buḷan diádon monindar.

MARKUS 15:33

Naonda in noutudon in singgai, dunia sinimindip toḷu no jam in koonggotnea.

LUKAS 21:25

“Bo tandanea in koontonganbí kon mata in singgai, kon buḷan bo kon tundi. Kon dunia naa, bayongan in intau mongoondok bo mongotoboḻingo in mokoontong bo mokodongog kon singog in bokoḷ.

OUMAN IN RASUL MITA 2:20

Mata in singgai in mobaḻí mosindip, buḷan in mosimpuya naonda bo dugú kon wakutu in diápa moiangoi in singgai i Tuhan, singgai inta totok in moḷoben bo momulia tua.

KORINTUS 2 4:4

Sin ilah moraat inta mongawasa kon dunia naa in tantú mogoḻingoi kon raian in intau mita inta diá mopirisaya. Siabí tua in tantú mogoḻingoi kon i monia sinbá diá mokoontong kon bayag in Habar Mopia soaḷ kawasa i Kristus inta moḷoben, inta nobaḻí oḻinow i Allah.

WAHYU 12:4

Iputnea pinomorotnea, sahingga sepertiga in tundi nongototak kon butá. Naga tatua in simindog mako kon tayowon in bobay inta koyogot mononggadí tatua; sin monomayá moḻiom kon adí tatua aka pononggadídon i inánea.

WAHYU 16:10

Bo malaekat iḻimanea in nopobutak doman bonu in palonea kon tampat pomomarentaan in mahaḷuk tatua. Dá bayongan dodatuan in mahaḷuk tatua in sinimindip. Bo popisí in moiḻiudon totok in nakitea, dá mosia in moikaḷut kon dilá.

WAHYU 6:12

Bo akuoi in nokoontongdon bui kon i Adí in Domba tatua nomukat kon meterai inggonomnea. Bo nobaḻídon in ḻinug inta totok mokoondok kon dunia naa. Mata in singgai irumondí naonda bo didit morondí inta nokasar bo buḷan sinimimpuya naonda bo dugú.

WAHYU 9:15

Dá binuḻiandon in malaekat opat tatua. Mosia tua in sinila-silaiandon in tugas, oyúon kon jam, kon singgai, kon buḷan bo kon taong sin moḻimod kon sepertiga nongkon bayongan in intau inta kon dunia naa.

WAHYU 9:18

Sepertiga intau kon dunia naa kinoḻimodan in roriga toḷu inta noiantug tatua. Toḷu in roriga tua in; tuḷu, poyok, bo balerang inta iḷumuai kon bibig in kabaḷo mita tatua.