WAHYU 7:9 - Alkitab Singog In Mongondow Masa In Tanaa

⁹ Nopaḷut mako kon tua akuoi in nokoontongpa bui kon intau inta modamaḷ totok, diádon tobatúmai in intau in mokoiyap kon kobayongnea tua. Mosia tua in intau mita inta nongkon bayongan bangusa, suku, negara bo bahasa. Mosia in sinimindog kon tayowon in tampat pomomarentaan tatua bo kon tayowon i Adí in Domba. Mosia komintan nogiḷambung in jubah nobudó bo kokada-kadai doman tanga in kayu palem.

WAHYU 7:9 Iomraidhean Croise

KINOBAḺIAN 13:16

Akuoi in mobogoi kon inimu in buí inta totok in mobarong, dapot in diádon tobatúmai intau in mokoiap kon i monia. Ná doman ḷobud inta diá koiapan in intau, yo ná doman tua in buímu mita diá doman koiapan in intau.

KINOBAḺIAN 49:10

Ki Yohuda in mokadai kon tungkud in dodatuan, Buínea in momarenta dapot in mononoi. Bangusa mita in modia mangoi kon pajak, bo tumungkud takin moondok kon tayowonnea.

MAZMUR 2:8

Igumdon, dá bayongan in bangusa ogoi-Kubí kon inimu, bo sinangkub in dunia baḻíon-Kudon kapunyaanmu.

MAZMUR 22:27

Inta nobiag nobogá in mongaanbí modapot in mobotug; intau inta mamangoi kon i Tuhan in modayowbí kon i-Nia. Igumon mako moiko in umuran mobiag motompia modapot in mononoi!

MAZMUR 76:4

Kon tua irimumud-Nea in bayongan pakakat in parang, bayongan piot mopouḻi-uḻinag, kaḻeaw bo kedang.

MAZMUR 77:2

Noḷangon in pinokokuaniku kon i Allah; noḷangon in kuaniku, bo inindongogan-Nea in akuoi.

MAZMUR 98:3

Kinotoropan-Nea in tabi bo kososatia-Nea kon Israel, umat-Nea. Bayongan in bangusa kon sinangkub in butá ain nokoontong kon kinountungan i Allah naton.

YEREMIA 16:19

Tuhan, Ikobí in inta noḷukad kon inakó bo nobogoi in ropot kon inakó; Iko in notuḷung kon inakó kon dodai in nororiga. Bangusa mita nongkon popod in butá in mamangoibí kon ini-Mu bo moguman, “Mogoguyang nami in tongábí oyúon in ilah uboḷ inta totokbí in diá in mangaḻenea.

YEREMIA 3:17

Kon dodai intua kotá in Yerusalem in tangoiondon ḷoḻitúan ‘Pomomarentaan i Tuhan’, bo bayongan in bangusa in mosipun kon kotá tatua sin mosumba kon i-Nakó. Mosia in diá bidon dumudui kon ibog in gina monia inta pamandot bo moraat tua.

YEHEZKIEL 47:5

Komintanpa doman in sia nogukur kon ḻima nogatut nometer, bo kon tua tubignea in noiḻiudon in ḻinow ḷoḷanan in sioḷ. Aka intau moibog in intau ḷumoḷan yo mustibí in sia ḷumanguy.

DANIEL 4:1

Naadon in palakat i Datu Nebukadnezar inta pinoki dianea kon intau mita nongkon bayongan in bangusa, inanakan bo singog kon sinangkub in dunia: “Salam kobiagan motompia!

DANIEL 6:25

Onda intua ki datu nomarenta kon intau sinbá modomok kon intau mita inta ain nopongadu kon i Daniel. Bo mosia takin ki adí mita bo ki buḷoi mita monia pinogonag kon bonu in angob in singa tatua. Diápa nodapot in mosia kon apad in angob tatua, singa mita tatua ain nodomok kon i monia poḷat nomutuk kon tuḷan mita monia.

HOSEA 1:10

Bangusa in Israel in mobaḻíbí ná kobayong in bungaion kon dagat, nodapot in diá koukuran andeka diá koiyapan. Tanaa in ki Allah in noguman kon i monia, “Moiko in deemanbí Umat-Ku,” táe moiangoibí in wakutunea Sia in moguman kon i monia, “Akuoibí in ki Allah inta nobiag bo moiko in ki adí-Ku mita!”

IMAMAT 23:40

Kon singgai dungkuḷ tua moiko in musti mosipú kon bungai in boyómu kon gobámu mita, bo dáun doman mita in palem bo tanga mita in kayu inta norubombong, bo pangkoidon in ramean inta nobaḻí singgai pia in gina sin mohoromat kon i Tuhan Allahmu.

ZAKHARIA 10:8

Umat-Ku in oiníon-Ku bo sipunon-Ku tobatúon. Mosia in poḷuaton-Ku bo baḻíon-Ku mobayong ná dungkuḷmai.

ZAKHARIA 2:11

Kon dodai intua mobayong in bangusa in mamangoi kon i Tuhan sin nobaḻí umat-Nea. Sia in mogutunbí kon yua-yuakmu, bo kotaauandon monimu kon ki Tuhan in nopotabádon kon inakó namangoi kon inimu.

LUKAS 12:1

Kon dodai intua ribuan intau in nosipun, dapot in moyopuntukdon kon sioḷ. Koyogotpa moyosipun in intau mita tatua, ki Yesus in noguman kon murí-Nea mita, “Mokopopia in moiko kon ragi intau in Parisi, makusudnea in oaid intau in Parisi inta mongomunapik.

LUKAS 21:36

Tuamai in umuran kiḷuka-ḷukadmai bo posambayang sinbá umuran moropot in moiko bo mokobaḻí simindog kon tayowon Adí Intau.”

YOHANES 12:13

Dá mosia nogamádon kon daun mita in palem bo minayá nonontomu kon i Yesus. Takin sanang in gina mosia in noguman, “Dayowdon in ki Allah! Binarakatandon in Sia inta namangoi kon bonu in tangoi Tuhan, Datu Israel!”

SURAT I PAULUS KON JAMAAT RUM 11:25

Utat mita! Haraponku mako moiko in diá monganggap kon ain nonotaau kon bayongan in yagi-yagi. Sin oyúon in soaḷ inta kinoibog i Allah, táe diápa kinotaauan in intau. Bo ibogonku in kotaauan monimu intua; nanaa: tongobotak intau in Yahudi mokopotogat kon gina, táe cara monia tua in tongábí modapot in motompodon in kobayong in intau inta deeman Yahudi in mamangoi kon i Allah.

EPESUS 6:13

Manangka intua, tanaa, pakédon touḷut in parang nongkon i Allah sinbá kon singgai moraat naa, moiko in mokosanggup monayow aka tubuon in saturu mita. Bo bá naonda in moiko moparang dapot in mopaḷut, yo umuranpa motorindog bo moropot in moiko.

IBRANI 11:12

Umpaka wakutu intua ki Abraham nádon onda bo intau minatoi in awaknea, táe nobayongpabí doman in buínea, diábí koiapan in kobayongnea sin nádon tundi kon ḷangit bo bungaion kon bingkí in pintad kobayongnea.

IBRANI 12:22

Tongá aka moiko namangoidon in Buḷud Sion bo kotá i Allah inta nobiag, tuata in Yerusalem inta kon soroga takin ribuan malaekat-Nea.

WAHYU 11:15

Bo malaekat impitunea in nogirup kon torompetnea, dá kinodongogandon in singog mita inta mongoḷangon totok nongkon soroga noguman, “Kawasa momarenta kon dunia naa, masai naa kinadaiandon i Tuhan naton, bo i Datu mopoposaḷamat inta pinodandi-Nea. Sia bidon in momarenta modapot in mononoi!”

WAHYU 22:3

Kon bonu in kotá tatua diá bidon in kotugatan kutuk i Allah. Tampat pomomarentaan i Allah bo i Adí in Domba tatua in kon bonudon in kotá tatua. Bobantung-Nea mita moibada kon i-Nia.

WAHYU 3:18

Tuamai naa in tonggina-Ku kon i monimu, potaḷui kon buḷawan kon i-Nakó, buḷawan taakan sinbá mobaḻídon mooyúon in moiko. Bo potaḷui doman kon ḷambung mobudó kon i-Nakó, sinbá mogiḷambungdon in moiko bo awak monimu inta nopilang bo mokooyá in kooḻingoiandon. Bo potaḷui domandon kon undam poḻepo kon mata sinbá mokoontongdon in moiko.

WAHYU 4:4

Noiḻibu kon tampat pomomarentaan tatua, oyúon doman doyowa nopuḷú bo opat in tampat pomomarentaan ibanea. Kon tampat mita tatua doyowa doman nopuḷú bo opat in itoi iḻimitú. Mosia in nogiḷambung nobudó bo nomaké in mahkota buḷawan.

WAHYU 5:11

Noiduduimai oyúon in inontongku bui. Akuoi in nokodongog kon singog in malaekat inta ribuan sedang bo jutaanbí in kobayongnea. Mosia in sinimindog iḻimibu kon tampat pomomarentaan bo kon mahaḷuk opat tatua takin itoi mita tatua.

WAHYU 5:9

Mosia nopodondong in tobatú dondong mobagu, nanaa: “Iko in patus mogamá kon buk tatua bo moḷosi kon meterainea mita. Sin Iko ain iḻimod, bo dugú-Mu tatua, in pinoguboḻi-Mu kon intau nongkon bayongan suku, bahasa, negara bo bangusa sin ogoi kon i Allah.

WAHYU 6:11

Mosia in sinukidan in jubah nobudó. Bo mosia in pinoki pogogaianpa bui motoyong sin pogoḷa-goḷatan kon kotompodan in kobayong yobayat mita inta topogaidan monia bo ki utat mita monia inta ḻimodon ná mosia.

WAHYU 7:8

Zebulon, Yusup bo Benyamin.