WAHYU 6:12 - Alkitab Singog In Mongondow Masa In Tanaa

¹² Bo akuoi in nokoontongdon bui kon i Adí in Domba tatua nomukat kon meterai inggonomnea. Bo nobaḻídon in ḻinug inta totok mokoondok kon dunia naa. Mata in singgai irumondí naonda bo didit morondí inta nokasar bo buḷan sinimimpuya naonda bo dugú.

WAHYU 6:12 Iomraidhean Croise

YESAYA 24:23

Buḷan in simindip bo mata in singgai in diá bidon monindar, sin ki Tuhan Inta Totok in mokawasa in momarentabí mobaḻí datu. Sia in momarentabí kon Yerusalem, kon tudu in Buḷud in Sion, bo mopoontong in koagung-Nea kon itoi mita in umat-Nea.

YESAYA 29:6

Ki Tuhan Inta Totok in mokawasa mopoḷuatbí in kotá tatua pongin deḷang bo ḻinug inta motoyang totok. Sia in mopoangoibí in deḷang bo tuḷú inta tumagab.

YESAYA 34:4

Mata in singgai, buḷan bo tundi mita in morimumudbí. Ḷangit in ḻitodon naonda bo karatas. Tundi mita in moḷabúbí naonda bo daun mita inta mototak nongkon pangkoinea.

YESAYA 50:3

Ḷangit binaḻí-Ku irumondí komintan, kinoḷoban-Ku intua naonda bo kaeng pinatoian.”

YOËL 2:10

Kon tungkuḷ in mosia minayá butá nogugur, bo ḷangit in nodandú doman. Bo nosindipdon in mata in singgai bo buḷan, bo sindar in tundi mita noinggamádon.

YOËL 3:15

Mata in singgai bo buḷan in simindipdon, bo tundi mita in diádon monindar bui.”

AMOS 1:1

Ki Amos in gombala tobatú in domba nongkon kotá in Tekoa. Sia in nobaḻí nabi kon tungkuḷ in butá in Yohuda pinarentaan i Datu Uzia, bo Israel in pinarentaan in Datu Yerobeam, ki adí ḷoḷaki i Yoas. Doyowa notaong kon tungkuḷ in diápa nobaḻí in ḻinug, ki Allah in noponiata kon i Amos in inta mobaḻí mita kon Israel.

AMOS 8:9

Moiangoibí in wakutunea baḻíon-Ku in mata in singgai tumoyop moutupa in singgai bo dunia in simindipdon kon dodai in singgaipa. Akuoi, ki Tuhan, Inta Totok in moḷantud, ain nosingog.

ZAKHARIA 14:5

Moiko in moḷaguibí mongin ḷopá inta nomotak kon tombuḷud tatua nobaḻí doyowa. Moiko in moḷaguibí ná mogoguyangmu kon tungkuḷ in ḻinug kon dodai in ki Uzia datu in Yohuda. Bo namangoidon in ki Tuhan Allahku, sinakinan in bayongan in malaekat.

MATIUS 11:21

Ki Yesus noguman, Koboditodon iko Korazim! Koboditodon iko Betsaida! Sin aka intau in Tirus bo Sidon in nokoontong kon soaḷ mita inta mokoherang inta ain nobaḻí kon yua-yuak monimu, yo noonggotdon in mosia in nogogai nogaid kon dosa mita monia takin nomaké in ḷambung kinopatoian.

MATIUS 24:29

“Naonda in mopaḷutdon roriga wakutu intua, yo mata in singgai mosindip, bo buḷan diádon monindar. Bo tundi mita in mongoḷabú nongkon ḷangit, bo kawasa mita kon baḷangon moirangkap.

MATIUS 24:7

Sin bangusa bo bangusa mosiparangan bo dodatuan moparang doman takin dodatuan. Moiangoi in wakutu kon bayongan intau kodaitan in kaanon bo ḻinug kon bayongan tampat.

MATIUS 27:45

Pinangkoi kon jam mopuḷú bodoyowá moutu in singgai nodapot in jam nogintoḷu sinimindip in ḻipú tatua.

MATIUS 27:54

Itoi in tontara takin prajurit-Nea inta noḷukad kon i Yesus noondokdon totok naonda in nokoontong kon ḻinug bo onu inta aindon nobaḻí tatua, bo mosia nosingog, “Totuubí, kon Sia naa in ki Adíbí i Allah!”

MATIUS 28:2

Bo daḻíbí dinandúan noropot totok. Tobatú malaekat i Tuhan noponag nongkon soroga bo noḻitoi kon batu inta pinonaḷob tatua, bodongka iḻitúannea.

MARKUS 15:33

Naonda in noutudon in singgai, dunia sinimindip toḷu no jam in koonggotnea.

WAHYU 11:13

Dá dodai intua nobaḻídon in ḻinug inta totok in moropot. Bo sepersepulú nongkon kotá tatua norimumud. Pitu noribu intau minatoi wakutu in ḻinug tatua. Intau mita ibanea in totokdon in noondok, dá nodayowdon in mosia kon koḷoḷoben in kawasa i Allah inta kon soroga.

WAHYU 16:18

Bo nongilatdon moyo-moyodudui bo gonugur in gotup mokoondok totok, bo ḻinug inta totok in motoyang. Diápa dodai onda in noḻinug námai tua in koropotnea, mulaipamai dunia naa pinomia. Tua in ḻinug inta totok in motoyang!

WAHYU 16:8

Nopaḷut mako kon tua, malaekat inggopatnea in nopobutak doman bonu in palonea kon mata in singgai, dá mata in singgai inogoidon momokak kon intau takin patúnea inta totok in motoyang tua.

WAHYU 8:12

Onda intua malaekat inggopatnea nogirup domandon kon torompetnea. Dá noidatongdon in sepertiga in mata in singgai, sepertiga in buḷan bo sepertiga doman in tundi mita, sahingga noinggamádon sepertiga nongkon ropot in sindar monia. Ná doman tua, sepertiga nongkon bayag in diádon notarang bo ná doman tua in doḷom.

WAHYU 8:5

Nopaḷut mako kon tua malaekat tatua in nogamá kon tampat pototubáan kon kamania bodongka binonuannea in tuḷu inta nongkon tampat pobobogoian kon sosumba. Nopaḷut mako pinogarabnea kon butá naa. Dá totokdon nonggotup bo nongilat inta moyodudu-duduimai bo nobaḻídon in ḻinug.