WAHYU 3:3 - Alkitab Singog In Mongondow Masa In Tanaa

³ Tuamai in toropdon bui in onu inta ain sinundú kon i monimu koḻipod bo onu inta ain dinongog monimu. Duduiai intua bo pogogaidon in mogaid kon dosa mita. Aka moiko bo diá mobangon, yo Akuoi in mamangoi kon i monimu naonda bo mononakow; bo diábí kotaauan monimu mongo toonu in Akuoi in mamangoi.

WAHYU 3:3 Iomraidhean Croise

YEHEZKIEL 20:43

Kon tua kotoropandon monimu in bayongan in oaid inta mokorongó inta ain nokonajis kon awakmu. Dá morongódon in moiko in mokotorop kon bayongan inta nobaḻí tatua.

YEHEZKIEL 36:31

Kotoropanbí monimu in dodiamu inta moraat bo aidmu inta diá patus tua, bo morongódon bui in moiko kon awakmu tontaní popisí in dosamu mita bo aidmu inta diá mopia tua.

MATIUS 25:13

Bo pangabisannea ki Yesus in noguman, “Manangka intua umuran kiḷuka-ḷukadmai, sin diábí kotaauan monimu in singgai bo wakutunea.”

MARKUS 13:33

Manangka intua moiko in musti umuran mobasadia, sin diá kotaauan monimu in wakutunea.

MARKUS 13:36

Sinbá aka sia daḻi-daḻí mamangoi, yo diá koangoianmai moiko in koyogot in mosiug.

TESALONIKA 1 5:2

Sin kinotaauan bidon monimu kon singgai koangoian bui i Tuhan naonda bo singgai koangoian in mononakow kon wakutu in doḷom.

TIMOTIUS 1 6:20

Uḻe Timotius, adíku, onu inta pinoki aidku bo inta pinogumanku kon inimu, yo ḷukadai totok intua kopira! Donaai tongá mongonguman kon soaḷ inta diá in mangaḻenea bo inta moraat, dika tongá mobobayowan kon soaḷ mita inta sinangoian “Pongotahuan”.

TIMOTIUS 2 1:13

Duduiaibí totu-totuu in totundú noitutui inta ain inogoiku kon inimu. Dika umukat kon onu inta ain pinirisayamu bo kon tabi inta ain nobaḻí kapunyaan naton, sin kita in notobatúdon i Kristus Yesus.

IBRANI 2:1

Manangka intua, mustidon totu-totuu in kita kumadai kon totundú mita inta ain dinongog naton, sinbá diá mobaḷui in pirisaya naton.

PETRUS 2 1:13

Kon dodai in akuoi mobiagpa, nobaḻíbí kowajibanku in moponorop intua kon i monimu.

PETRUS 2 3:1

Utatku mita inta kinotabiku! Naa in suratku inta induaneadon kon i monimu. Kon bonu in suratku induanea tanaa, akuoi noramujidon totok sinbá moiko in tongá umuran morai kon inta mopia bo inta mokobiag.

PETRUS 2 3:10

Táe Singgai koangoian i Tuhan in diábí butungonmai, sin naondabí bo koangoi in mononakow. Kon singgai tatua ḷangit moyoyang takin gotup inta totok in mokoondok, bo onukadon in kon ḷangit modaitbí mopokak, natua doman in butá bo bayongan in tombonunea modait doman moinggamá.

WAHYU 16:15

“Indongogaidon! Akuoi in mamangoi ná mononakow! Mosanangdon totok in intau inta umuran mobasadia bo inta umuran monarukiramai kon pakeangnea, simbá diá mopilang in sia in maya-mayá mako, bo koontongan intau moantó in dodiaannea!”

WAHYU 2:25

Táe dapot Akuoi in mamangoidon bui, moiko in musti dumudui kon onu inta aindon sinundú-Ku kon i monimu.

WAHYU 2:5

Tuamai, torop kon totuudon moyayú in kinoḷabúan monimu! Dá pogogaidon in mogaid kon dosa mita bo aidaidon in onu inta inaidan monimu muna. Aka diá, yo angoion-Kudon rabuton sioḷ in togámu tua nongkon tampatnea.

WAHYU 22:7

“Tarukiradon in naa!” Guman i Yesus, “Akuoi in ḷagi bidon mamangoi. Koḷungangadon totok in intau inta umuran dinumudui kon singog mita inta pinotaau kon bonu in buk tanaa!”

WAHYU 3:11

Akuoi in ḷagibí mamangoi! Ḷukadai kopira in onu inta oyúondon kon i monimu, sinbá diá tobatúmai in intau in mokoagow kon tombuinag kinountungan monimu.

WAHYU 3:19

Intau mita inta kotabi-Ku, mosia tuata in toboḷowon-Ku bo sambokon-Ku. Manangka intua koropotdon in gina monimu bo pogogaidon in mogaid kon dosa mita.

WAHYU 3:2

Manangka intua pobangondon bo irigonai onu inta oyúonpa kon i monimu kon dodai in tua komintan diápa matoi. Sin diápa tobatúmai nouḻí-Ku in inaidan monimu inta nosompurna kon tayowon i Allah.