WAHYU 20:2 - Alkitab Singog In Mongondow Masa In Tanaa

² Bo dinomoknea in naga tatua inta uḷag guranga, inta Ibilis ande dimukud moraat tatua bo sinokignea in rante tatua toribu notaong in koonggotnea.

WAHYU 20:2 Iomraidhean Croise

KINOBAḺIAN 3:1

Uḷag naa in mahaḷuk inta totok in mopandoi monguboḷ nongkon sigad in bayongan mahaḷuk inta pinomia i Tuhan Allah. Uḷag tatua in noḻibó kon bobay tatua, “Totuu degá kon ki Allah in nogimaḷow kon i monimu mokaan kon bungai mita in pangkoi ayop kon taman tanaa?”

KINOBAḺIAN 3:15

Iko bo bobay tatua in mobaḻí mososaturuan, buínea bo buímu umuran mososaturuan. Buínea in moritak kon uḷumu, bo tobakonmu in singkod monia.”

AYUB 1:7

Ki Tuhan in noḻibó kon inia, “Nongkon onda in iko?” Tubag in Ibilis, “Bobantung naa in bagupa nodondaḷoi magí-mako bo noḻibu kon bayongan in butá.”

YESAYA 24:22

Mosia in sipunonbí moyotakin naonda bo intau mita in ponjara kon bonu in bubú, bo pobonu kon ponjara modapot in moiangoi in wakutunea hukumon.

YESAYA 27:1

Kon dodai intua ki Tuhan in momakébí in pitow-Nea inta moropot bo moḷanit sin mohukum kon Lewiatan, uḷag inta ḷumandai bo iḻimibo-ḻibod tua, bo moḻimod kon naga in dagat.

YEHEZKIEL 47:5

Komintanpa doman in sia nogukur kon ḻima nogatut nometer, bo kon tua tubignea in noiḻiudon in ḻinow ḷoḷanan in sioḷ. Aka intau moibog in intau ḷumoḷan yo mustibí in sia ḷumanguy.

MATIUS 19:29

Bo pomuḷoi intau inta nonaḷámai kon baḷoinea, kon i utatnea ḷoḷaki bo bobay, kon i amá bo kon i inánea, kon i adínea mita andeka nonaḷámai kon gobánea sin dumudui kon i-Nakó, yo sia tua in motarima bui kon moiḻiu kon tua. Bo sia in mokodungkuḷ domandon kon kobiagan mopia bo mononoi.

MATIUS 8:29

Taya dua nomaḷú noropot, kai monia “Onuon-Mu in kami naa, ei Adí i Allah? Iko mamangoi degá mopoyoyiga kon inami umpaka deemanpa wakutunea?”

MARKUS 4:15

Bibit inta noḷabú kon daḷan in ibarat intau inta nokodongog kon habar soaḷ naonda in ki Allah momarenta. Naonda in sia nokodongog, Ibilis namangoi bo nogamá kon onu inta ain pinomuḷa kon bonu in ginanea.

MARKUS 5:7

Bo nomaḷú noropot, “Yesus, Adí i Allah inta Totok in Moḷantud! Onuon-Mu in akuoi ná? Podoyon kon tangoi i Allah, akuoi mopoigum kon ini-Mu, donaai rorigaan in akuoi!” (

YOHANES 12:31

Tanaa in wakutuneadon dunia hakimon; bo tanaadon mako in mongongawasa kon dunia naa pogarabdon kon ḷuai.

YOHANES 16:11

Poguman-Nea doman kon ki Allah in momangkoidon mohukum, sin mongongawasa kon dunia naa in ihukumdon.

SURAT I PAULUS KON JAMAAT RUM 16:20

Ki Allah inta mobogoi in kobiagan motompia kon intau, mopotungkudbí in Ibilis kon ḻimonag in kawasamu bo rimumudonmu in sia. Poigumon doman mako, moiko in umuran barakatan i Yesus Kristus, Tuhan naton!

IBRANI 2:14

Lantaran intau mita inta sinangoi-Nea adí tua, tongábí intau ilo-ilow inta mato-matoipabí, dá ki Yesus sinumongkaidon kon i monia bo nobiag naonda bo kaadaan intau. Tua pinomia-Nea, sinbá kinopatoian-Nea tua mokorimumud kon Ibilis inta nongawasa kon popatoi.

PETRUS 1 5:8

Mokopoingatdon bo umuran pobasadia in moiko! Sin Ibilis inta saturumu in maya-mayá mako naonda bo singa inta sindaḷan moganggor motayak kon onu inta motaaunea kaanon.

PETRUS 2 2:4

Malaekatpa mita inta nogaid kon dosa, diábí doman pinilatan i Allah nongkon hukuman. Mosia tua in komintanbí doman pinogonag kon naraka. Mosia in pinobonu kon irang inta mosindip sin pogoḷa-goḷatan kon Singgai Ponantúan.

YUDAS 1:6

Torop domandon in malaekat mita inta iḻimimpat kon kawasa inta inogoi kon i monia, sahingga in minayá nonaḷámaidon kon tampat pogogutunan monia. Mosia tua in sinoko togot i Allah in rante inta diá mobonto-bontow kon bonu in tampat inta mosindip kon ḻimonag in butá. Mosia in umuranpabí sinahang kon tua modapot in hukuman popoḷabúdon kon i monia kon Singgai inta ponantúandon.

WAHYU 12:13

Kon wakutu in naga tatua nosadardon kon sia ain pinogonag kon butá, mulaidon in sia mogaḷow kon bobay inta nopononggadí in adí ḷoḷaki tatua.

WAHYU 12:15

Dá uḷag tatua in noporoput in tubig moḷoben naonda bo ongkag. Pinoroputnea kon bobay tatua sinbá moḷomot kon tubig tatua.

WAHYU 12:17

Naga tatua totokdon in sinumorú kon bobay tatua, sahingga minayá nogaḷow kon buí in bobay tatua inta ibanea. Mosia inta umuran dinumudui kon parenta i Allah bo inta nobogoi in kosakusian soaḷ ki Yesus bo kawasa-Nea.

WAHYU 12:3

Bo inontong domandon in tanda mokoherang ibanea kon ḷangit. Oyúon tobatú naga nopura inta totok moḷoben, pitu in uḷunea bo mopuḷú in tungoinea. Pomuḷoi in uḷu pinakéan in mahkota.

WAHYU 12:4

Iputnea pinomorotnea, sahingga sepertiga in tundi nongototak kon butá. Naga tatua in simindog mako kon tayowon in bobay inta koyogot mononggadí tatua; sin monomayá moḻiom kon adí tatua aka pononggadídon i inánea.

WAHYU 12:9

Naga inta moḷoben tatua in pinogarab kon ḷuai! Sia tua in uḷag guranga, Ibilis in tangoinea ande Dimukud Moraat, inta monguboḷ magí-mako kon dunia naa. Sia in iḷumbú kon dunia naa takin malaekatnea mita.

WAHYU 13:2

Mahaḷuk inta inontongku tua, batangannea in naonda bo macan tutul, sioḷnea naonda bo sioḷ in boruang, bibignea naonda bo bibig in singa. Mahaḷuk tatua inogoian i naga in ropot, inogoian in tampat pomomarentaannea bo kawasa inta moḷoben.

WAHYU 13:4

Mosia in nosumba kon naga tatua, sin sia in nobogoi in kawasa kon mahaḷuk tatua. Mosia in nosumba doman kon mahaḷuk tatua takin noguman, “Diábí in notongkai mahaḷuk tanaa! Diábí in monahang in tumayow moparang takinnea naa!”

WAHYU 20:10

Onda intua Ibilis inta nonguboḷ kon i monia tua, pinogambat kon yua-yuak in tuḷu bo balerang. Tua in tampat pinoḷumbúan kon mahaḷuk bo intau mita inta deeman totuu nabi, bo roriga monia tua in diábí mogoga-gogai doḷom bo singgai.

WAHYU 20:7

Naonda in toribu notaong tatua mopaḷutdon, Ibilis in buḻiandon bui nongkon tampat pinohukuman kon inia,

WAHYU 9:11

Oyúon datu nomarenta kon i monia, datu tatua in ki malaekat inta noḷukad kon irang in popatoi tangoinea aka kon bahasa Ibrani Ki Abadon; bo aka kon bahasa Yunani Ki Apolion (mangaḻenea “Momoguyaat”).