WAHYU 2:10 - Alkitab Singog In Mongondow Masa In Tanaa

¹⁰ Dikabí moondok kon yoyiga inta diádon moonggot in musti korasaan monimu. Pokotorop, oyúon in tongonumai intau kon sigad monimu in potuoton Ibilis kon bonu in ponjara sin mosoba kon i monimu. Moiko in mokorasa kon yoyiga kon bonu in mopuḷú nosinggai. Táe kotoinduduibí tantú in moiko kon i-Nakó modapot in matoi, dá moiko ogoian-Ku in kobiagan mononoi saḷaku tombuinag sin nountungdon.

WAHYU 2:10 Iomraidhean Croise

MAZMUR 31:23

Kon dodai in notoboḻingo kon inakó kamai yo akuoi in iḷumbú bidon i Tuhan kon tayowon-Nea. Táe noniatadon kon ki Tuhan in nokidongogdon kon oigumku kon tungkuḷ in akuoi nokuani kon i-Nia.

DANIEL 1:12

“Tungkuḷaidon in kami kon bonu in mopuḷú nosinggai; ogoiaidon in kami in tongákabí kuyat bo tubig.

DANIEL 1:14

Noibog in moḷoḷukad tatua bo sinungkuḷannea kon bonu in mopuḷú nosinggai.

HABAKUK 2:3

Paisdon intua, sin deemanpabí orasnea in naa. Táe oras tatua in ḷagi bidon moiangoi, bo onu inta poponiata-Ku kon inimu in notantú bidon kon mobaḻíbí. Umpaka koontongan in ná moonggotpa, táe oḷatdon mako! Oras tatua in notantúbí kon moiangoibí bo diá bidon pampingon.

MATIUS 10:22

Moiko in saturuon in bayongan intau sin moiko in murí-Ku. Táe ki ine in mokotahang modapot in kopaḷutannea, sia tua in mosaḷamat.

MATIUS 10:28

Bo donaaibí moondok kon i monia inta moḻimod kon awak, táe diá inogoian in kawasa morabut kon nyawa. Kotoguondokbí kon i Allah inta kokawasa moḻimod kon awak bo morabut kon nyawa kon bonu in naraka.

MATIUS 24:13

Tongá intau inta monahang modapot in kopaḷutan tua komintan mosia in mosaḷamat.

MARKUS 13:13

Moiko in kodoí in bayongan intau sin dumodudui-Ku. Táe mosia inta mokotahang dapot in pangabisan in posaḷamatonbí.”

MARKUS 8:35

Sin intau inta moibog moposaḷamat in kobiagannea, kobuḻianbí in kobiagannea. Táe intau inta moposarakan kobiagannea sin kopontingan-Ku bo kopontingan in Habar Mopia inta nongkon i Allah, yo tuabí in mokosaḷamat kon inia.

LUKAS 21:12

Táe kon wakutu in diápa mobaḻí intua komintan, moiko in domokondon muna monia bo pogutúon. Moiko in diaan monia pobayá in baḷoi pososambayangan bo adilon poḷat potuoton kon ponjara. Diaan potayow kon datu bo pongawasa sin moiko in murí-Ku.

YOHANES 12:25

Intau inta motabi kon kobiagannea, yo kobuḻian sia in kobiagannea tatua. Táe intau inta diá motabi kon kobiagannea kon dunia naa, yo sia tua in moḷukadbí kon kobiagannea inta mononoi.

YOHANES 13:2

Kon wakutu in ki Yesus bo murí-Nea mita yogot mongaan, Ibilis nopogonúdon in niat moraat kon bonu in gina i Yudas Iskariot ki adí i Simon sinbá sia in momaḻidawan kon i Yesus.

YOHANES 13:27

Naonda in ki Yudas notarima kon roti tatua, ginanea in kinogonúandon in Ibilis. Bo ki Yesus in noguman kon inia, “Aidaidon koḻikat onu in kino ibogmu pomiaan.”

OUMAN IN RASUL MITA 20:24

Táe tua in diábí hirauonkumai matoi kabí asaḷ bo oaidan inta pinoki aid i Tuhan Yesus kon i nakó in moḷapatku aidan bo ginaku in umuran motantú modapot in kopaḷutan kobiaganku naa kon akuoi in mustibí mopoyaput in Habar Mopia inta ain pinonotabi i Allah kon i naton.

OUMAN IN RASUL MITA 21:13

Táe ki Paulus in noguman kon i monia, “Nongonu sin mongombaḷbí in moiko naníon, bá kotaauan monimu kon ombaḷ monimu nion totokbí in mokororiga kon ginaku! Akuoi in diá bidon moondok, deemanbí tongá togoton, umpakabí modapot in matoi kon Yerusalem sin mopotaau in Habar Mopia nongkon i Tuhan.”

KORINTUS 1 9:25

Pomuḷoi intau inta mobasadia tumakin kon poyotandingan, musti monahang kon yagi-yagi, sinbá mokouḻí kon tombuinag inta diá mononoi kon dunia naa, táe kita in monahang kon yagi-yagi sinbá mokouḻí kon tombuinag inta mononoi.

EPESUS 2:2

Wakutu intua moiko in dinumudui kon kabiasaan mita in dunia naa; tua in mangaḻenea moiko in dinumudui kon mongongawasa kon baḷangon, tuata in roho inta masai naa nongawasa kon gina in intau mita inta diá motoindudui kon i Allah.

EPESUS 6:12

Sin kita in moparang deemanbí moyogintayow in intau, táe moyogintayowbí in ropot in bayongan dimukud moraat inta nongawasa kon singgai moraat mita tanaa. Kita in monayow kon ropot in roho mita moraat inta nongawasa kon ḷangit.

YAKOBUS 1:12

Kosanangdon in intau inta motaba wakutu in kinoantugan in sobaan. Sin aka sia bo mokotahangdon kon sobaan tatua, yo tarimaanneabí in bungainea. Bungainea tua in kobiagan inta ain pinodandi i Allah kon intau inta motabi kon i-Nia.

PETRUS 1 5:4

Sahingga in kon wakutu Gombala inta momulia mamangoi bui, moiko in motarima kon tombuinag moḷoben inta diá mogogu-goguyaat.

PETRUS 1 5:8

Mokopoingatdon bo umuran pobasadia in moiko! Sin Ibilis inta saturumu in maya-mayá mako naonda bo singa inta sindaḷan moganggor motayak kon onu inta motaaunea kaanon.

WAHYU 13:14

Bo bayongan in intau inta nobiag kon dunia naa akaḷannea in aidnea inta pinomianea kon tayowon in mahaḷuk inta muna tatua. Mosia in pinoki aidannea in patong mahaḷuk inta ain kinekeban in pitow, táe umuranpa nobiag.

WAHYU 13:2

Mahaḷuk inta inontongku tua, batangannea in naonda bo macan tutul, sioḷnea naonda bo sioḷ in boruang, bibignea naonda bo bibig in singa. Mahaḷuk tatua inogoian i naga in ropot, inogoian in tampat pomomarentaannea bo kawasa inta moḷoben.

WAHYU 13:7

Sia inogoianpa doman in wakutu moḷawang kon umat i Allah takin monaḷow kon i monia. Bo inogoian doman in kasampatan mongawasa kon bayongan suku, umat, bahasa bo bangusa.

WAHYU 17:14

Mosia in noyopakat kon moparang kon i Adí in Domba tatua. Táe ki Adí in domba tatua takin dumodudui-Nea mita inta mosatia bo inta ain inoiní bo piniḻí-Nea tatua in monaḷow kon datu mita tatua, sin Siata in Tuang in bayongan tuang, bo Datu in bayongan datu.”

WAHYU 2:13

Kinotaauan-Kubí in pinogutunan monimu. Moiko in nogutun kon tampat inta pinomarentaan in Ibilis, táe moiko in motoinduduibí kon i-Nakó. Sedang bo wakutu in ki Antipas, sakusi-Ku inta motoindudui tua iḻimod kon tayowonmu kon tampat poyoyosipunan in Ibilis, yo moiko in umuranbí doman nongaku saḷaku intau mita inta mopirisaya kon i-Nakó.

WAHYU 2:9

Kinotaauan-Kubí in yoyiga mita monimu; Kinotaauan-Kubí kon moiko in nomasiking – táe sabanarnea moiko nion in nooyúonbí! Kinotaauan-Kubí doman in bayongan inta pinonapud kon i monimu i intau mita inta dumuí intau in Yahudi, bokaka deemanbí; mosia tua in dumoduduibí in Ibilis!