WAHYU 18:7 - Alkitab Singog In Mongondow Masa In Tanaa

⁷ Ogoidon kon inia in roriga bo inta mokoajar kon gina inta motongkai in kobayong in kamuliaan bo kaoyúonan inta ain kinorasaannea tontaní. Sin sia in umuran moguman kon bonu in ginanea tontaní, ‘Akuoi naa in bokí inta momarenta! Akuoi naa in deemanbí mobobaḷu; akuoi in diábí mokorasa kon ajar in gina!’

WAHYU 18:7 Iomraidhean Croise

ESTER 6:10

Bo ki datu in noguman kon i Haman, “Koḷamemet, gamádon in ḷambung bo kabaḷo tatua bo ogoidon in bayongan in kahoromatan tatua kon i Mordekhai, intau in Yahudi tatua. Aidaidon ná inta pinogumanmu koina, bo dikabí gaatan in tobatúmai. Sia intua ḻimitú mako kon tayowon in bonawang in komaḻig.”

MAZMUR 10:6

Sia in mosingog kon bonu in gina, “Akuoi in diábí taḷowon, bo kinoouput in imbuían naonda bo intau inta diá nobiag moraat.”

MAZMUR 45:9

Ḷambungmu nobó in taḷong mobondu, gaharu, bo sondana; mopogogitog in musik kon komaḻig nokopia kon ginamu.

YEREMIA 13:18

Ki Tuhan in noguman kon inakó, “Potabá in datu bo ki inánea moponag nongkon pomomarentaannea, sin mahkotanea inta mopia in noḷabúdon kon uḷunea.

OMBAḶ 1:1

Totuubí kaasí kon moingongow in Yerusalem in tanaa mako, kotá inta dungkuḷmai totok in morame. Dungkuḷmai in noiḷontú kon sigad in bangusa mita, tanaa in nobaḻídon naonda bo boba-bobay. Dungkuḷmai in kotá inta totok in dinuí-duímai, tanaa in nobaḻídon ata.

OBAJA 1:3

Iko in koakaḷan in ginamu inta mododia. Ki iná in kotámu in buḷud batu inta moropot; pogogutunanmu in kon tudu in buḷud inta moḷantud. Sin kon raian monimu, ‘Ki ine in mokopoḷabú kon i nakó?’

ZEPANYA 2:15

Tuata in mobaḻí kon kotá inta norame tatua bo inta nonganggap noaman mako in sia. Intaunea mita in nonganggap kon kotá monia tua in kotá inta totok in moḷoben kon dunia naa. Totuudon moingongow in butá tatua, diá bidon in mogogutunnea koḻikud bidon in mahaḷuk mita in kayuon inta nonompugad kon tua! Bayongan in intau inta moitaḻib kon kotá tatua moitaḻikokogbí bo mokoningkim in awak.

TIMOTIUS 1 5:11

Aka boba-bobay inta diápa nongo umur yo donaaipabí poyoiapon, sin aka koaputan in ibog monia, yo mokipobuḷoibí in mosia bo taḷaanbí monia in ki Kristus.

WAHYU 18:3

Sin bayongan in bangusa ain nonginum kon anggur ibognea inta mokotor. Datu mita kon dunia naa ain nogaid kon kotor takinnea, bo intau mita inta modagangmai kon dunia naa nooyúondon in ibognea inta diádon kotahangan tua.”

WAHYU 18:9

Datu mita kon dunia naa inta noitakin nogaid kon inta mokotor takinnea bo ibog in bobay tatua, in mongombaḷbí bo mogamui kon kotá tatua aka mosia in mokoontong kon poyok mobunod nongkon tuḷú inta momokak kon inia.