WAHYU 11:10 - Alkitab Singog In Mongondow Masa In Tanaa

¹⁰ Moḷungangabí totok gina in bayongan intau kon dunia naa in mokoontong kon mayat in sakusi doyowa tatua. Porameanbí monia in kinopatoian nayadua tua. Bo mosia mosiogoianbí in tombuinag, lantaran nabi doyowa tatua ain nopoangoi in roriga moantó kon bayongan intau kon dunia naa.

WAHYU 11:10 Iomraidhean Croise

DATU MITA IMITÁNEA 18:17

Kon dodai in ki Ahab nokoontong kon i Elia, ki Ahab nomaḷú, “Naa in sia mononuyayow kon i Israel!”

DATU MITA IMITÁNEA 21:20

Naonda in ki Ahab nokoontong kon i Elia, sia in noguman, “Ei musung, imbuitnea nouḻímudon in akuoi!” “Totuu,” tubag i Elia. “Sin ki Tuang in takin ḻimbatú in gina nogaid kon inta moraat kon tayowon i Tuhan,

DATU MITA IMITÁNEA 22:18

Bo ki Ahab in noguman kon i Yosapat, “Totuubí in gumanku! Diábí kon dodai in onda in sia mopotaau kon onu inta mopia in mobaḻí kon inakó! Umuranbí inta diá mopia!”

DATU MITA IMITÁNEA 22:8

Ki Ahab notubag, “Tobatúpa, ki Mikha ki adí i Yimla. Táe mobú in akuoi kon inia, sin diábí kon dodai in onda in sia in moguman kon onu in mopia in mobaḻí kon inakó; tantúbí inta diá mopia.” “Uḻe, dikabí natua!” tubag i Yosapat.

MAZMUR 13:4

Indoiaidon in akuoi, kaasí o Tuhan Allahku, tubagaipa kaasí in sambayangku. Poguḻídon in ropotku, bo dikadon pomayá mako in akuoi matoi.

MAZMUR 35:19

Dikabí pomayá mako in akuoi in poyambáan in intau inta nondoí kon inakó takin diá in popisínea. Dika pomayá mako in akuoi in giowan in intau inta nondoí kon inakó takin diá in kinodoyonan.

MAZMUR 89:42

Bayongan in intau inta moitaḻib in mogagow kon kapunyaannea, sia in tososingkuḻe mako in topodiugneamai.

AMSAL 24:17

Dikabí mopia in ginamu aka musungmu bo mobodito, bo dikabí moḷunganga in ginamu aka moḷabú in sia.

YEREMIA 38:4

Dá minayádon in pojabat mita tatua kon i datu bo noguman, “Intau tanaa in mustibí hukumon matoi. Sin pongin singognea natua sia in mokoinggamá kon ibog in bayongan tontara bo intau ibanea inta nogutunpa kon kotá tanaa. Sia in diábí motuḷung kon rayat, táe mopoboditobí kon i monia.”

YEREMIA 50:11

Ki Tuhan in noguman, “Ei intau in Babel, moiko in nogagow kon umat-Ku. Moiko in ḷumansi-ḷansik sin mopia in gina naonda bo kabaḷo inta kumurik, bo naonda bo sapi inta koyogot in mokaan kon bonok.

OBAJA 1:12

Diábí patus moḷunganga in ginamu in mokoontong kon ukur diá mopia in intau mita in Yohuda bo moḷunganga in gina kon singgai koyopúan i utatmu. Diábí patus in iko umambungangaḷ kon dodai in sia mosusa.

MIKHA 7:8

Diábí in kinodoyonan in musung mita naton in moḷunganga in gina sin kon kinorimumudan naton. Sin umpakabí noḷabú in kita, yo kita in bui mobangon. Tanaa kita in kon bonu in sindip, táe ki Tuhan in monimbayagbí kon i naton.

MATIUS 10:22

Moiko in saturuon in bayongan intau sin moiko in murí-Ku. Táe ki ine in mokotahang modapot in kopaḷutannea, sia tua in mosaḷamat.

YOHANES 16:20

Poguman-Kudon kon i monimu, moiko nion in mongombaḷbí bo mogamui, táe mopiabí in gina in dunia naa. Morobonoḷbí in gina monimu, táe robonoḷ in gina monimu tua in mobaḷuibí ḷunganga in gina.

YOHANES 7:7

Moiko in diábí kodoí in dunia naa. Táe Akuoi in memang kodoíbí in dunia naa, sin Akuoi in umuran moguman kon dunia kon oaidnea in moraat.

OUMAN IN RASUL MITA 5:33

Nokodongogmai kon tua, totok in mosia sinumorú, dá ibogon monia ḻimodonbí in rasul mita tatua.

KORINTUS 1 13:6

Diábí mopia in ginanea aka intau mogaid kon inta moraat, sin koibognea in tongábí inta mopia.

WAHYU 12:13

Kon wakutu in naga tatua nosadardon kon sia ain pinogonag kon butá, mulaidon in sia mogaḷow kon bobay inta nopononggadí in adí ḷoḷaki tatua.

WAHYU 13:14

Bo bayongan in intau inta nobiag kon dunia naa akaḷannea in aidnea inta pinomianea kon tayowon in mahaḷuk inta muna tatua. Mosia in pinoki aidannea in patong mahaḷuk inta ain kinekeban in pitow, táe umuranpa nobiag.

WAHYU 13:8

Mahaḷuk tatua sumbáanbí in bayongan intau inta nobiag kon dunia naa. Intau mita inta diápa kinopaisan in tangoi monia kon bonu in buk kobiagan inta kapunyaan i Adí in Domba inta ain iratá, pinangkoipamai kon dunia naa diápa pinomia.

WAHYU 16:10

Bo malaekat iḻimanea in nopobutak doman bonu in palonea kon tampat pomomarentaan in mahaḷuk tatua. Dá bayongan dodatuan in mahaḷuk tatua in sinimindip. Bo popisí in moiḻiudon totok in nakitea, dá mosia in moikaḷut kon dilá.

WAHYU 3:10

Lantaran moiko ain dinumudui kon parenta-Ku kon bá umuran mosabar mogoḷat mako kon i-Nakó. Dá umuran-Ku doman ḷukadan mako in moiko nongkon kasusahan inta moiantug kon dunia naa. Soaḷ tatua in mobaḻíbí sin monungkuḷ kon bayongan in intau kon dunia naa.