WAHYU 1:1 - Alkitab Singog In Mongondow Masa In Tanaa

¹ Buk tanaa in nongonguman kon onu inta pinoontong i Yesus Kristus soaḷ mita inta mobaḻí. Pinotaau i Allah kon i Kristus, sinbá potaau i Kristus kon intau mita inta nogaid kon oaidan i Allah in onu inta diádon moonggot bo mobaḻí. Ki Kristus nopotabádon in malaekat-Nea namangoi kon i Yohanes, intau inta mogogaid kon oaidan-Nea, sin mopotaau kon inia in bayongan soaḷ inta mobaḻí tua.

WAHYU 1:1 Iomraidhean Croise

MAZMUR 25:14

Ki Tuhan in yobayat in intau inta mopirisaya, Sia in moponiata in makusud-Nea kon i monia.

DANIEL 8:16

Dinongogku in singog inta nomaḷú nongkon ḷoḷan in Ongkag in Ulai, kainia, “Gabriel, insilangaidon kon inia in mangaḻe oontongon tatua.”

DANIEL 9:21

Koyogot in akuoi nosambayang, ki Gabriel inta ain inontongku inta kon ontongonku inta muna, iḷumayug mangoi kon inakó. Tungkuḷ intua wakutudon in intau moposumba in kuruban muḷoi in ḷoḷabungnea.

DANIEL 9:23

Kon dodai in iko nomangkoidon nopoigum kon i Allah, Sia in nobogoidon in tubag. Akuoi in namangoi sin mopotaau intua sin Sia in notabi kon inimu. Yo, indongogaidon kopiaan koyogot in akuoi moginsilang kon mangaḻe in oontongon tatua.

AMOS 3:7

Ki Tuhan Inta Totok in moḷantud in diábí kon dodai in onda in mogaid kon oaidan-Nea aka diápa muna moponiata in tomayá-Nea kon nabi mita, mogogundoi-Nea.

YOHANES 12:49

Sin Akuoi in mosingog deemanbí podudui in ibog-Ku tontaní; Táe ibogbí i Amá inta nopotabá kon i-Nakó. Siabí tua in nomarenta kon i-Nakó kon onu i musti singogon-Ku bo potaau-Ku.

YOHANES 15:15

Moiko in diá bidon oiníon-Ku ata, sin aka ata yo diábí kotaauannea onu in yogot aidan i tuangnea. Moiko in inoiní-Ku Yobayat, sin bayongan inta ain dinongog-Ku kon i Amá in pinotaau-Kudon kon i monimu.

YOHANES 17:8

Pinotaau-Kudon kon i monia in singog inta inogoi i Amá kon i-Nakó; bo sinarimadon monia. Kinotaauan monia kon Akuoi in totu-totuubí namangoi nongkon i Amá bo mosia in mopirisayabí kon ki Amábí in nopotabá kon i-Nakó.

YOHANES 3:32

Sia in nongonguman kon soaḷ inta inontong bo dinongog-Neadon, táe diá tobatúmai in intau in mopirisaya kon onu in inouman-Nea.

YOHANES 8:26

Mobayongpabí in musti poguman-Ku bo hakimon-Ku soaḷ moiko nion. Táe Sia inta nopotabá kon i-Nakó in diábí mouboḷ. Bo Akuoi in mopotaau kon dunia naa onu inta dinongog-Ku nongkon i-Nia.”

SURAT I PAULUS KON JAMAAT RUM 16:25

Dinayo-dayowdon in ki Allah! Sia in mongawasa moginrigon kon pirisaya monimu podudui in Habar Mopia nongkon i Allah inta pinotaauku soaḷ ki Yesus Kristus. Habar inta pinotaauku tua in notongkai in onu inta pinoontong i Allah kon inakó; tuata in soaḷ tomayá i Allah inta noonggotdon totok in kinotaauan intau.

GALATIA 1:12

Sin tua in deemanbí inogoi in intau kon inakó, bo deemanbí doman intau in notundú kon inakó, táe tua in nouḻíku sin ki Yesusbí tontaní in nobogoi kon inakó.

EPESUS 3:3

Ain pinoguman i Allah in tomayá-Nea inta binuni-Nea tua bo ain pinotaau-Nea kon i nakó. (Soaḷ tanaa in pinaiskudon kino poḷok kon ḻimonik,

TITUS 1:1

Titus adíku! Akuoi, ki Paulus in nomais kon surat tanaa saḷaku mogogaid kon oaidan i Allah bo rasul i Yesus Kristus. Akuoi in piniḻí bo pinotabá sinbá motuḷung kon intau mita inta ain piniḻí i Allah sinbá umuran morigon in pirisaya monia kon i Tuhan Yesus. Bo mustibí umuranku tundúon in mosia sinbá totokdon in monotaau kon onu inta moitutui podudui in agama naton.

WAHYU 1:19

Sin tuamai, paisdon in soaḷ mita inta inontongmu, tuata in soaḷ mita inta oyúon tanaa mako, bo soaḷ mita inta mobaḻí kon singgai moiduduimai.

WAHYU 1:9

Akuoi ki Yohanes, ki utatmu inta kinoantugan doman in roriga inta ná noiantug kon intau mita inta mopirisaya kon i Kristus. Mustibí mokoposabar in monahang kon roriga in kita saḷaku kapunyaan-Nea. Akuoi in iḷumbú kon Pulau Patmos popisí in nopotaau in koyow inta nongkon i Allah, inta inirigonan i Yesus pinongin onu inta inouman-Nea.

WAHYU 17:1

Onda intua tobatú malaekat nongkon malaekat pitu inta nokadai kon palo pitu tatua in namangoi kon inakó bo noguman, “Igai, bá popoontongku kon inimu in hukuman kon sundaḷ moḷoben, tuata in kotá moḷoben inta pinosindog kon bingkí in ongkag mita.

WAHYU 19:10

Dá sinumungkud in akuoi kon tayowonnea sin mosumba kon inia, táe sia in noguman kon inakó, “Donaai! Donaai mosumba kon inakó, sumbadon in ki Allah! Sin akuoi naa in tongábí doman bobantung ná iko nion bo notongkai doman i utatmu mita inta umuran kinumadai norigon kon onu inta pinoguman i Yesus!” Sin onu inta pinoguman i Yesus, tuatabí inta nopogonú kon gina in intau mita inta nopotaau in koyow i Allah.

WAHYU 19:9

Bo malaekat tatua in noguman kon inakó, “Paisdon in naa: ‘Mosanangdon totok in intau inta inoiní mamangoi in rame ponikaan i Adí in domba tatua.’ ” Malaekat tatua in noguman doman bui kon inakó, “Habar tanaa in totu-totuubí nongkon i Allah.”

WAHYU 21:2

Dá akuoi in nokoontong kon kotá motusi tatua, tuata in Yerusalem inta mobagu, noponag nongkon soroga i Allah. Kotá tatua in pinosadia naonda bo nonikaan bobay inta pinakeangan sin mokipodungkuḷdon kon nonikaan ḷoḷaki.

WAHYU 21:9

Noiduduimai kon tua noiangoidon in tobatú malaekat inta nongkon sigad in malaekat taya pitu inta nokadai kon palo mita inta nopuḻing in roriga pangabisan tatua. Sia in noguman kon inakó, “Igai! Poontong-Ku kon inimu in Nonikaan, tuata in ki buḷoi i Adí in Domba.”

WAHYU 22:1

Bo malaekat tatua in nopoontong doman kon inakó in ongkag inta mobogoi in kobiagan. Ongkag tatua in nosilang totok naonda bo kristal inta moiḻig nongkon tampat pomomarentaan i Allah bo i Adí in Domba tatua,

WAHYU 22:16

“Akuoi, ki Yesus, ain nopotabá mangoi in malaekat-Ku kon i monimu, sinbá sia mopotaau in soaḷ mita inta pakéon kon kopontingan in jamaat mita. Akuoi naa in buí i Daud; Akuoibí naa in tundi dotá in pomukaan inta motarang totok tua.”

WAHYU 22:6

Nopaḷut mako malaekat tatua in noguman kon inakó nanaa, “Singog mita tanaa in totuubí bo motaaubí pirisayaan. Ki Tuhan Allah inta nobogoi in Roho-Nea kon nabi mita, aindon nopotabá in malaekat sin mopoontong kon bobantung-Nea mita in onu inta ḷagidon mobaḻí.”

WAHYU 22:8

Bo akuoi, ki Yohanes, ain nokodongog bo nokoontong kon bayongan in tanaa. Naonda in akuoi nokodongog bo nokoontong kon tua, akuoi in sinumungkud kon tayowon malaekat inta ain nopoontong in bayongan tua kon inakó, makusudku in mosumba kon inia,

WAHYU 22:9

táe sia in noguman kon inakó “Donaai momia naníon, táe sumbadon in ki Allah! Sin akuoi naa in atabí doman naonda bo iko, bo ná doman tai utatmu mita inta nabi bo bayongan intau inta dinumudui kon koyow mita inta kon bonu in buk tanaa!”

WAHYU 4:1

Nopaḷut mako intua nanaa in bui inontongku. Inontongku in tobatú ḷoḻingkop nobukat kon soroga. Bo dinongogkudon bui in singog inta noguman kon inakó koina inta naonda bo singog in torompet. Singog tatua in noguman, “Poponikdon mangoi kon naa, bá popoontong-Kudon kon inimu onu in mobaḻí kon singgai moiduduimai.”

WAHYU 5:7

Onda intua ki Adí in Domba tatua inumuna bo nogamá kon ḻitodan in buk tatua nongkon ḻima koḷanan in intau inta iḻimitú mako kon tampat pomomarentaan tatua.